சதுர் வர்ணம் மயா சிருஷ்டம் !

உலகில் இருக்கும் அனைத்தையும் படைத்ததவன் இறைவன் என்பதாக அவ்வப்போது ஆன்மிகவாதிகளால் சொல்லப்படுகிறது, இதே கருத்து மதவாதிகளிடமும் பலமாகவே உள்ளது. மதவாதிகள் மதத்தை மார்கெட் செய்யும் உத்தியில் தங்களை முழுமனதாக ஊக்கப்படுத்திக் கொள்ளுவதற்கு 'தங்கள் இறைவனும், தங்கள் வேதபுத்தகமுமே' முழுக்க முழுக்க உண்மையானது மற்றவையெல்லாம் மனிதர்களே படைத்துக் கொண்டார்கள், போலியானவை என்று விளம்பரம் செய்வார்கள் அல்லது பிற மதங்களைப் பின்பற்றும் மனிதக் குழுக்களிடம் இருக்கும் குறைகளைக் குறிப்பிட்டு, அவை நீங்கள் பின்பற்றும் மதத்தின் காரணாமாக அமைந்தது என தூற்றுவார்கள்.

அனைத்தையும் படைக்கும், இயக்கும் இறைவன், நடைபெறும் மதவெறிச் செயல்களுக்கும், இயற்கைச் சீற்றங்களுக்கும் காரணமா ? என்றால், அது மனிதர்களின் தவறான செயல் என்றும், இயற்கைச் சீற்றங்கள் பற்றிய மழுப்பலான பதில்களே வருவதுண்டு. இதற்கெல்லாம் ஏற்றுக் கொள்ளும் வகையிலான சிறப்பான விளக்கம் எந்த ஒரு மதத்திலும் இல்லை என்பதே உண்மை. தனிமனித, இனக்குழு செயல்களுக்கும், இயற்கையின் போக்கில் ஏற்படும் மாற்றங்களுக்கெல்லாம் மதமோ, மதங்கள் காட்டும் இறைவனோ பொறுப்பு ஏற்றுக் கொள்ளமுடியுமா என்ன ? விட்டுத்தள்ளுவோம், அவை என்றுமே பதில் பெற முடியாத கேள்விகள். வேதப்புத்தகங்களிலும், மதப்பற்றாளிடமும் அனைத்து கேள்விகளுக்கும் விடை இருக்கும் என்று நினைப்பது ஞாயமற்றது

தன்மதம் மனிதர்களிடையே ஒற்றுமை போற்றும் என்பதாகவும், பிற மதங்கள் பிரிவினையை ஏற்படுத்தக் கூடியதாக அம்மதங்களிலேயே சொல்லப்பட்டுள்ள உண்மை என்றெல்லாம் வியாக்யானங்கள் வருவது உண்டு.

இந்துக்களின் வேதம் எனச் சொல்லப்படும் பகவத் கீதை பற்றிய சர்சைகள் ஒருபுறம் இருந்தாலும் (இதை பொதுவான இந்து வேதம் என்று சொல்லமுடியாது, பிற மதங்களுக்கு வேதப்புத்தகங்கள் இருக்கிறது, அவை நீதிமன்றங்களில் சத்தியவாக்குப் பெற பயன்படுத்தப்படுகிறது என்பதால் வைணவ தத்துவ நூல்களில் ஒன்றான பகவத்கீதை பாலகெங்காதாரா திலகர் போன்றோரால் முன்மொழியப்பட்டது, இந்திய சமயங்கள் அனைத்தையும் இந்து மதம் என்று சொல்வதால், பகவத் கீதை பொதுவானது என்று சொல்லப்படுவது நிராகரிக்கக் கூடியதும் ஆகும், குறிப்பாக சிவனை வழிபடுபவர்களுக்கு பகவத் கீதை சிவ நெறிகளைவிட உயர்ந்தது கிடையாது) , பகவத் கீதையின் கீழ்கண்ட செய்யுள் எப்போதும் பெரிதும் சர்சை செய்யப்படுகிறது, குறிப்பாக பகவத் கீதையின் தத்துவங்கள் சார்ந்த பிற செய்யுள்களை அறிந்திடாத பகுத்தறிவாளர்களும், பிறமதத்தினரும் தெரிந்துவைத்திருக்கும் ஒரே செய்யுள்,

"சதுர் வர்ணம் மயா சிருஷ்டம் குண கர்ம விபாகஷ:
தஸ்ய கர்தாரம் அபி மாம் வித்யாகர்தாரம் அவ்யயம்" - பகவத் கீதை

இதன் பொருளாகக் கூறப்படுவது யாதெனில்,

நான்கு வர்ணங்களை உருவாக்கியவன் நானே. ஒருவனின் குணத்திற்கும் கர்மத்திற்கும் செயலுக்கும் ஏற்றவாறு நான் உருவாக்கினேன். மனிதர்கள் தம்மை செம்மைப்படுத்தி மேன்மை அடைய நாம் அவற்றை படைத்தோம், மனிதர்களின் செயல்கள் குணம் அமைப்பு படி அவர்களுக்கான வருணம் அவர்களுக்கு கிடைக்கிறது அவற்றை நான் படைத்திருப்பினும், நான் செயலற்றவன், அழிவற்றவன் என்று உணர்.

அண்மையில் இஸ்லாம் தொடர்புடைய சில நூல்களைப் படிக்கும் போது கீழ்கண்ட குரான் வசனம் ஒன்றையும் அதன் பொருளையும் படிக்க நேர்ந்தது

“மனிதர்களே! நாம் உங்களை ஓர் ஆணிலிருந்தும் பெண்ணிலிருந்தும் படைத்தோம். பிறகு நீங்கள் ஒருவருக்கொருவர் அறிமுகமாகிக் கொள்ளும் பொருட்டு உங்களை சமூகங்களாகவும், கோத்திரங்களாகவும் அமைத்தோம். உண்மையில், உங்களில் இறைவனிடத்தில் அதிக கண்ணியம் வாய்ந்தவர்கள் அதிக இறையச்சம் கொண்டவர்கள்தாம்“. (குர்ஆன் 49:13)

மேற்கண்ட குரான் வசனங்களில் இன அமைப்பைக் குறிப்பிடும் 'உங்களை சமூகங்களாகவும், கோத்திரங்களாகவும் அமைத்தோம்' என்பதற்கும், பகவத் கீதைக் குறிப்பிடும் 'நான்கு வருணமாக அமைத்தோம்' என்பதற்கும் பெரிய வேறுபாடு இருப்பது போல் தெரியவில்லை, ஏனெனில் இவை கூறப்பட்ட காலங்களில் இனங்களை ('உங்களை சமூகங்களாகவும், கோத்திரங்களாகவும் அமைத்தோம்') இருந்ததை குரான் சுட்டி இருப்பதும், 'நான்கு வருணங்கள்' இருந்ததை பகவத்கீதை சுட்டுவதாகவும் தான் கொள்ள முடிகிறது. நான்கு வருண அமைப்புகள் அரேபியாவில் இருந்திருந்தாலும், இன அடிப்படை அமைப்புகள் இந்தியாவில் இருந்திருந்தால் பகவத்கீதை மற்றும் குரான் வசனங்களில் இடம் பெரும் சொற்கள் அதற்கேற்றவாறு மாறி இருந்திருக்கும் என்பதைத் தவிர்த்து வேறெதும் வேறுபாடு இருக்காது என்றே நினைக்கிறேன். ஏனெனில் நடப்பில் இருந்ததைத்தான் இரண்டுமே சொல்கின்றன.

வருண அமைப்பிற்கும், இன அமைப்பிற்கும் பொறுப்பேற்கும் இரு வேதங்களில் ஒன்று மட்டுமே எப்போதும் தூற்றப்படுகிறது. இனக்குழுக்குள் வருணம் வேற்றுமை போற்றுகிறது என்றால், உலக அளவில் மனிதருக்குள் இனவேறுபாடுகள் அதைச் செய்கின்றன. இந்தத் தூற்றலை பகுத்தறிவாளர்களும் ஒருபக்கச் சார்பாக செய்துவருவது தான் வேடிக்கை.

என்னைக் கேட்டால், இவைகள் முறையே பகவத் கீதை காட்டும் வருணம், குரான் குறிப்பிடும் இனம் ஆகியவை உண்மை என்று ஒப்புக் கொள்ளும் போது, "வருணங்களைப் படைத்தோம் என்பதும், உங்களை சமூகங்களாகவும், கோத்திரங்களாகவும் (இனம்) அமைத்தோம்" என்கிற இரண்டுமே நிராகரிக்கக் கூடியதே, ஏனெனில் மனிதர்கள் பிரிந்து கிடப்பதே இது போன்ற பேதங்களினால் தான்.

வேதங்களுக்கு முன்பான இயற்கை மற்றும் இயக்கம் !

மனிதன் உட்பட விலங்குகள் அனைத்தின் இனப்பெருக்க உறுப்புகளைவிட மிகவும் பாதுகாப்பான அமைப்பில் இருப்பது கடினமான ஓட்டினுள் அமைந்த மூளையும், மார்ப்புக் கூடுகளினுள் அமைந்த இதயமும் தான். அதே போன்று பிற உயிர்தோற்றதிற்கான விதைகள், முட்டைகள் பாதுகாப்பான மேலோடுகளோடு அமைந்திருகின்றன. திடீர்தாக்குதல், விபத்து, கடுமையான நோய் என்பதைத்தவிர்த்து இவ்வுறுப்புகள் நேரிடையாக நலிவுறாது. கருவளர்ச்சியுறும் போது முதல் நிலை செல்களில் இருந்து முதலில் தோற்றுவிக்கப்படுவது இதயம், பிறகு மூளை, இவ்விரண்டு உறுப்புகள் செயல்பாட்டில் தான் ஏனைய உறுப்புகளும் இயங்குகின்றன. உலக வியப்புகள் (பிரம்பிப்பு, அதிசயம், ஆச்சரியம்) என்று பட்டியல் இட்டிருப்பவைகளைப் பார்த்து மனிதர்கள் வியப்படைவதைவிட வியப்பானவை உயிரினங்கள் ஒவ்வொன்றின் உடல் அமைப்புகள் மற்றும் அவற்றின் இயக்கம்.

உயிரினங்கள் ஒவ்வொன்றின் தோற்றம்(Shape) மற்றும் அதன் செயல்பாடுகள்(Activities), இயக்கம் மற்றும் அதன் தொடர்சிக்காக இனப்பெருக்கச் சுழற்சி அமைப்புகளில் உள்ள நுண்ணறிவுடன் ஒப்பிடுகையில் கணிணி, செயற்கைக்கோள், செவ்வாய் ஆய்வு வரை நீண்டுவிட்ட நம் அறிவியல் கண்டுபிடிப்புகள் யாவும் மிகச் சாதாரணமானவை ஏனெனில் மிகவும் நுட்பமான மனித மூளையே கூட இயற்கையில் அமைந்த ஒன்று அதனை பயன்படுத்துவதைத் தான் மனிதர்களான நாம் செய்துவருகிறோம். அறிவியலாளார் ஐன்ஸ்டீன் கூட முழுமையாக மூளையின் செயல்பாடுகளைப் பயனபடுத்தியவர் அல்ல ஆனால் மூளையின் செயல்பாடுகளை மற்றவர்களைவிட மிகுதியாகப் பயன்படுத்தியவர் என்று (IQ படி) சொல்கிறார்கள்.

இப்படி பெரும் வியப்புக்குள்ளான பெருவெளி(பிரபஞ்சம்), வெளித்திரள்கள் (கேலக்ஸி) சூரியன், கோள்கள், உயிரினம், அவற்றின் இயக்கம் இவற்றை ஏற்படுத்தியது யார் என்ற மனித மனக் கேள்வியின் ஒற்றை விடையாக இறை நம்பிக்கையாளர்களின் ஒரே மற்றும் இறுதிக் கூற்றான 'இறைவனின் படைப்பு' என்று சொல்லப்படுவதும் கூட என்னைப் பொறுத்தளவில் ஏற்றுக் கொள்ளக் கூடியது அல்ல. அதே சமயத்தில் இவை பெருவெடிப்பு மற்று பரிணாம வளர்ச்சியின் கூறுகள் என்பதும் சரியானக் கூற்று என்பதை அறிவியல் இன்னும் எட்டவில்லை, அவை ஒரு கோட்பாடு, அறிவுக்கு மற்றும் சிந்திக்க ஏற்றவை என்ற அளவில் ஏற்றுக் கொள்ளப்பட்டு இருக்கிறதே அன்றி முடிவாக பரிணாமம் தான் காரணம் என்பதாக அறிவியல் உலகம் எந்த வரையறையையும் செய்யவில்லையே, அதன் தொடர்பாக பெருவெடிப்பு பற்றிய ஆராய்ச்சிகள் தொடர்ந்த வண்ணம் மட்டுமே இருக்கின்றன.

ஆறுநாளில் உலகம் படைக்கப்பட்டது, இரத்தக்கட்டியில் / களிமண்ணில் இருந்து மனிதனைப் படைத்தோம், பிரம்மா விழித்தான் உலகம் உண்டாகிற்று போன்ற மதங்கள் காட்டும் படைப்புக் கொள்கைகள் சூரியன் உலகைச் சுற்றிவந்ததாக நம்பப் பட்டக் காலத்தில் ஏற்கக் கூடிய ஒன்றாக இருந்திருக்கலாம், ஆனால் இன்றைக்கு இவை அந்த காலத்தில் மனித மனம் கண்டுபிடிக்க முடியாதவற்றிற்கான சொல்லப்பட்ட விடை என்பதைவிட அவை என்னாளும் அன்னாளும், அதற்கு முந்தேயும் மனித மனக் கேள்வியாக இருந்திருக்கின்றன என்பதையும் காட்டும் குறிப்புகள் என்பதாகத்தான் என்னால் புரிந்து கொள்ளமுடிகிறது.

மதங்கள் என்னதான் இறுதி, உறுதி என்று உயிரினங்களின் தோற்றம் குறித்த அனைத்தையும் 'படைப்பு' , 'இறைச்சித்தம்' என்று முடிவுரை எழுதி இருந்தாலும் அவற்றிற்கான விடைகள் இன்றும் தேடலாகத்தான் இருக்கிறது. மேலும் ஒவ்வொரு மதமும் அவற்றிற்கான விடையை தங்கள் சிந்தனைகளுக்கு ஏற்ப வரையறை செய்திருப்பதுடன் அவை ஒவ்வொன்றும் மாறுபட்டு இருப்பதால் மதங்கள் காட்டும் படைப்புக் கொள்கையில் யாதொரு உண்மையும் இருப்பது போலோ அல்லது பொதுவான ஒன்றாகவோ ஏற்றுக் கொள்ளத் தக்கது அல்ல என்றே நினைக்க முடிகிறது.

இயற்கையின் வியப்புகளை, அமைப்புகளை கடவுள் செயலாக நினைத்துப் பார்ப்பதில் இருக்கும் அபத்தம் போல் வேறெதும் அபத்தம் எதுவுமில்லை, ஏனெனில் இந்த அபத்தம் மூளையின் சிந்தனைத் திறனை மழுங்கடிக்கக் கூடியது அல்லது சிந்தனையைத் தடுப்பது ஆகும், மனித முயற்சியினால் ஆவது எதுவுமில்லை என்று மனிதன் நினைத்திருந்தால் இயற்கையை கட்டுப்படுத்துகிறோமோ அல்லது அதற்கு முயற்சிக்கிறோமா என்பதைவிட விமானப் பயணம் முதல் வின்வெளிப்பயணம் வரை இயற்கை அதன் தன்மையைப் புரிந்து கொண்டதால் ஏற்பட்ட இயற்கையின் மீதானப் பயணம் கூறு இல்லாத ஒன்றாக ஆகி இருக்கும். இது கடவுளால் அமைந்த ஒன்று என்று எந்த ஒரு பொருளையும் உறுதியாகக் காட்டமுடியாத போது ஒட்டுமொத்த பருப்பொருள்களையும் கடவுள் படைப்பாகப் பார்ப்பதில் நினைப்பதும் அபத்தம் தானே. இது கடவுள் செயல் என்று உணர்ச்சி வசப்படுவதாலோ அல்லது அல்ல என்று சொல்வதாலோ இயற்கையும் அதன் தன்மையும் செயல்பாடுகளும் ஒரு நாளும் மாறப் போவதுமில்லை.

வேதப்புத்தகங்களும், குறிபிட்ட சில முதிர்ந்த சாமியார்களும் உலகைப் பற்றிய முழு அறிவு(ஞானம்) அளிப்பதாகக் கூறுவதெல்லாம் எந்த ஒரு காலத்திலும் முழுமையான உண்மையாக இருந்திருந்தால் இன்றும் உலகம், இயற்கைப் பற்றிய அறிவுத் தேடல் என்பற்கான தேவைகளே இல்லாது போய் இருக்கும். எந்த ஒரு கடவுள், மத, அறிவியல் நம்பிக்கைகளும் முழுமையானதொரு பிரஞ்ச இயக்க அறிவைக் கொண்டு கொடுத்துவிடும் என்பது எப்போதும் நடந்ததே இல்லை. இந்த சாமியார், இந்த மதம், இந்த நம்பிக்கை முழுமையான ஒரு அறிவை, ஞானத்தைத் தருகிறது என்று எவரும் நம்பினால் அவை வெறும் நம்பிக்கை மட்டுமே.

இயற்கை என்னும் மாபெரும் பரவெளியையும் அடக்கிய இயக்கத் தொகுப்பு அல்லது பரவெளியுடன் இயங்கும் பேரறிவு அதன் சொந்தக்காரர், உரிமையாளர், படைப்பாளி என்பது போன்ற இறைக்கட்டுமானங்கள் அதன் மீது இல்லாத காலத்திலும் இயற்கை அதன் போக்கிலேயே தொடர்ந்து இயங்கி வந்து கொண்டுதான் இருக்கிறது என்கிற உண்மை வேதப்புத்தகங்கள் எதிலும் எழுதப்படவில்லை.

சர்வேசனுக்காக நஒக : பயணிகள் கவனிக்கவும் (சிறுகதை) !

நேற்று இரவு 'டிஸ்கோத்தே பார்டியில்' க்ளாசுடன் போட்ட ஆட்டம் செந்தில்வேலனை காலை 9 மணி வரையில் அசதியில் கிடத்திவிட்டது, எழுந்து நேரம் பார்த்தான் 9.05. பதறி அடித்து கிளம்பிக்க் கொண்டே இன்னும் 45 நிமிட நேரத்தில் விமானத்தைப் பிடிக்க வேண்டும், கல்கத்தா செல்லும் காலை விமானம் அது ஒன்று தான். இல்லை என்றான் இன்னும் ஒரு நாள் காத்திருக்க வேண்டும், அன்றைக்கு மதியம் கல்கத்தா அலுவலக கான்பிரன்சில் அவன் கலந்து கொண்டே ஆகவேண்டும். என்ன செய்வது என்று யோசித்தான். இங்கிருந்து விமான நிலையம் செல்ல எப்படியும் ஒரு மணி நேரமாவது ஆகும். எல்லா உடைமைகளையும் எடுத்துக் கொண்டு ஒரு ஓட்டல் பில் மற்றும் அனைத்தையும் நடைமுறைகளையும் முடித்து நகத்தைக் கடித்துக் கொண்டே பரபரப்புடன் வெளியே நடந்தான்.

*****

விமான நிலையத்தை அடைந்த போது விமான நிலையம் பரபரத்துக் கொண்டிருந்தது, அனைத்து விமானங்களும் காலதாமதமாக புறப்படுவதாக "பயணிகள் கவனிக்கவும்..." அறிவிப்புகள் காட்சி பெட்டிகளில் ஓடிக் கொண்டிருந்தனர். உள்ளே செல்லும் பயணிகள் பாதுகாப்பு சோதனைகளை கடுமையாக செய்தே அனுமதித்தனர். தான் செல்லும் விமானமும் தாமதமாக புறப்படும் என்கிற அறிவிப்பைப் பார்த்ததும் செந்தில் வேலனுக்கு மனம் நிம்மதியாக இருந்தது.

நுழைவாயில் செக்கியூரிட்டியிடம் விமானச் சீட்டைக் காட்டிவிட்டு உள்ளே சென்றான், அடுத்து உள் நுழையும் இடத்தில் போர்டிங் பாஸ் வழங்கும் இடத்தின் நுழைவாயில் அருகில் இருந்த காவலர் செந்தில் வேலனின் பயணச் சீட்டை பார்த்ததும் அதிர்ந்தவராக அவன் கைகளை அழுத்தமாகப் பிடித்து வலுக்கட்டாயமாக இழுத்துக் கொண்டு அப்படியே கண்டோர்ல் அறைக்கு அழைத்துச் சென்றார்.

"நீ ஏன் லேட்டு......."

ஒருமையில் உரிமை இல்லாக் குரல் அதிர்ந்தான்

"அது வந்து......."

அவர் அவன் குரலை உறுதிப் படுத்திக் கொண்டதும், டேப்பை ஓடவிட்டார்

செந்தில் வேலனின் கைகளை பின்பக்கமாக முறுக்கி பிணைத்துக் கொள்ள

"கல்கத்தா செல்லும் விமானத்தில் வெடிகுண்டு இருக்கு..........."
பதட்டத்துடன் செந்தில்வேலன் ஓட்டல் அருகில் இருந்த எஸ்டிடி பூத்தில் பேசிய அவன் குரலே செந்தில் வேலனுக்கு கேட்டது

'வாயல பேசியதும் இல்லாமல், சிக்குவோம் என்று தெரியாமல்.....இப்படி வசமாக சிக்கி இருக்கக் கூடாது' நினைத்துக் கொண்டே, வேறு வழி இன்றி உண்மையை ஒப்புக் கொண்டவனாக

"விமானம் புறப்படுவதைத் தள்ளிப் போட முயன்று முன்யோசனை இல்லாமல் இப்படிச் செய்துவிட்டேன்.....என்னை மன்னிச்சிடுங்க..."

அவன் முகத்தில் விழுந்த குத்து அதற்கு மேல் அவன் பேசமுடியாமல் சுய நினைவை இழக்க வைத்தது.

யாதும் நாடே யாவரும் பாரீர் (Swiss, Singapore And Expenses) - 9

ஓவியங்களில் புகைப்படங்களில் பார்ப்பதும் செலவுகள் குறைவானது தான் இருந்தாலும் மண் வாசனையுடன் காட்சிகளை நம் முன் சாட்சியாக நிற்க, முப்பரிணாமாக பார்ப்பதில் இருக்கும் துய்புகளே தனி. வின்வெளிப் பயணம் பற்றி நாம் எவ்வளவு தான் படித்தாலும், படமாக பார்த்தாலும் கூட அதற்கு சென்றுவருபவரின் துய்புகளை நாம் பெற முடியாது, அவை போன்றவையே சுற்றுலா தளங்களுக்கு சென்று வருவதின் அனுபவம் என்பதை இந்தச் சுற்றுலா எனக்கு உணர்த்தியது. செலவுகள், கடனட்டை பயன்பாடு பயமுறுத்தினாலும் சென்று வரும் வாய்ப்புகள் கிடைப்பதும் கூட அரிது என்றே தேற்றிக் கொண்டேன்.

*****
முந்தைய பகுதிகள்:
பகுதி 1 (ஏற்பாடு,புறப்பாடு)
பகுதி 2 (இலண்டனில் தீபாவளி, அரண்மனை)
பகுதி 3 (இலண்டன் மெழுகு அருங்காட்சியகம்)
பகுதி 4 (இலண்டன் கடற்கரை)
பகுதி 5 (பாரிஸ் - ஈபிள் கோபுரம்)
பகுதி 6 (பாரிஸ் - டிஸ்னி பொழுது போக்கு பூங்கா)
பகுதி 7 (பாரிஸ் - அருங்காட்சியகம்)
பகுதி 8 (சுவிஸ் - ஐரோப்பாவின் உயரமான இடம்)

24/அக்/2009 பயணத்தின் நிறைவு நாள், அன்று மதியம் 11 மணிக்கு விடுதியில் இருந்து புறப்பட வேண்டும், சூரிக் - சிங்கப்பூர் விமானம் இரவு 10:05க்கு புறப்படும். காலை 6 மணிக்கே எழுந்து கொண்டேன். நான் மட்டும் வெளியே சென்றேன். பொழுது விடியும் நேரம் மலைகள்உருவம் காட்டத் தொடங்கி இருந்தன. மாடுகள் மணி ஓசையுடன் மேய்ந்து கொண்டிருந்தன. விடுதிக்கு திரும்பிஎல்லோரும் குளித்து முடித்துவிட்டு, பெட்டிகளை ஆயத்தம் செய்து, விடுதிக்கு பணம் செலுத்திவிட்டு, மதியம் வந்து எடுத்துக் கொள்வதாகச் சொல்லி பெட்டிகளை அங்கே பாதுகாப்பில் வைத்துவிட்டு, வெளியே வந்து காலை உணவு எடுத்துக் கொண்ட பிறகு காலை 8 மணி ஆகி இருந்தது.



அருகில் உள்ள ஏரிகளைப் பார்த்து வரலாம் என்று நடந்தே கிளம்பினோம். விடுதிக்கு அருகில் உள்ள புல் வெளிப் பாதைவழியாக நடந்து ஒரு Interlaken கிழக்கையும் மேற்கையும் இணைக்கும் சாலைக்கு வந்தோம். சாலையைக் கடக்கும் இடத்தில் காசினோ எனப்படும் சூதாட்ட விடுதி ஒன்று மிக அலங்காரமாக காட்சி தந்தது, அதை அடுத்து Interlaken ல் இருக்கும் இரு அழகிய ஏரிகளையும் இணைக்கும் சிறிய ஆறு ஒன்றின் பகுதிக்கு வந்து ஆற்று பாலத்தில் சற்று நேரம் நின்றோம்.





இங்குள்ள தண்ணீர் தேக்கங்கள் அனைத்தும் ஒருவித நீலப்பச்சை (மயில் கழுத்து நிற) வண்ணத்தில் இருக்கின்றன. அந்த நிறம் மலைகளிலிருந்து வரும் இரசாயணக் கலவை சேர்த்திருக்கும் நிறமாக இருக்கலாம், ஆனாலும் அருகில் சென்று கரையோரம் பார்க்கும் போது மிகவும் தெளிந்த நிலையில் இருந்தன. தூய்மையான நீர் தான் என்பதற்கு சாட்சியாக வாத்துகளும் சில நீர்பறவைகளும் அதில் நீந்திக் கொண்டு இருந்தன. சற்று தொலைவில் வான்குடை வழியாக கீழே சிலர் இறங்கிக் கொண்டு இருந்தனர். அதுவும் இங்கே ஒரு சுற்றுலா பொழுது விளையாட்டாக நடத்தப்படுகிறது.





ஆற்றின் மறு கரையில் இருப்புப் பாதை அமைக்கப்பட்டு தொடர்வண்டிப் போக்குவரத்து நடைபெற்றது. ஆற்றின் கரையோரமாக நடந்து Interlaken கிழக்கு நிலையத்தை அடைந்தோம். அங்கு ஏரிகரைகளுக்குச் செல்லும் பேருந்து வரும் என்கிற தகவல் படி நின்றோம். சில நிமிடங்களில் பேருந்து வந்தது.


விடுதிகளில் தங்குவோருக்கு ஊருக்குள் எங்கு செல்லவும் தங்கும் நாட்களில் பேருந்தில் இலவச பயணம் தான், அதற்கான அடையாளச் சீட்டை விடுதிக்காரர்கள் கொடுக்கிறார்கள். Interlaken ஊரின் இருபுறமும் சற்றுத் தொலைவில் Brienzersee, Thunersee என இரு பெரும் ஏரிகள் இருக்கின்றன. பேருந்து Interlaken மேற்கு நிலையத்தின் வழியாக நாங்கள் சொன்ன இடமான Brienzersee கரையில் எங்களை இறக்கிவிட்டது. வெளி நாடுகளில் இருந்து படகு பயணத்தை பொழுது போக்காகக் கொண்டவர்கள் பலர் படகுகளுடன் அங்கு கூடாரம் அமைத்து தங்கி இருந்தார்கள்.




ஒரு சில படகுகள் சிறிய லாரிகளில் இருந்து இறக்கப்பட்டு ஏரித் தண்ணீருக்குள் விடப்பட்டு கொண்டு இருந்தது. ஏரியின் மறுபுறம் மலைப் பகுதி, அந்தப் பகுதியை ஒட்டி இருப்புப் பாதைகள் அமைக்கப்பட்டு தொடர் வண்டி சென்று கொண்டு இருந்தது. சிறுதி நேரம் ஏரியின் அழகை ரசித்துவிட்டு திரும்பினோம்.


அங்கே ஒரு பேரிக்காய் மரம் கூட இருந்தது. அந்த இடத்திற்கு சற்று தொலைவில் அங்கும் வண்ண வான்குடையில் சில சுற்றுலாவாசிகள் பறந்து பயிற்சி செய்து கொண்டு இருந்தனர். பேருந்து 5 நிமிடம் காத்திருந்தோம், வந்தது. புறப்பட்ட இடத்திலேயே (Interlaken Ost) இறங்கினோம் அங்கு அருகில் இருந்த COOP எனும் பேரங்காடியில் சில பொருள்களை வாங்கிக் கொண்டு, திரும்பவும் பேருந்து நிலையம் வந்தோம்.

பதிவர் மகேஷ் Interlaken Ost அருகே Mystery Park எனப்படும் அறிவியல் பூங்கா இருக்கிறது, இரண்டு பேருந்து நிறுத்தத் தொலைவு தான் நேரம் இருந்தால் அங்கு சென்றுவாருங்கள் என்று முதல் நாள் அலைபேசி வழி தொடர்பு கொண்டு தெரிவித்து இருந்தார். காலை மணி 11 இருக்கும், அன்று மாலை 5 மணிக்கு புறப்படும் தொடர்வண்டியில் சூரிக் செல்வதாக இருந்தது. எனவே Mystery Park சென்றுவரலாம் என்று பேருந்தில் ஏறி அமர்ந்து அங்கு சென்றோம். அங்கு கட்டணக் காட்சியும் இலவசக் காட்சி என இரு பகுதி வைத்திருந்தார்கள், கட்டணக் காட்சிக்கு நுழைவு சீட்டு வாங்கினால் முடிந்து வெளியே வர 3 - 4 மணி நேரம் ஆகும் என்பதால் இலவசக் காட்சியையும் அந்த பூங்காவின் உள் அரங்குகளைப் பார்த்து வந்தால் போதும் என்று இலவச வழியில் நுழைந்தோம்.



அக்கால, இக்கால அறிவியல் நம்பிக்கைகளை காட்சியாக வைத்திருந்தார்கள் அதில் இந்தியர்களின் புராணங்களில் இடம் பெறும் விமானம் பற்றிய கூடம் ஒன்று கூட இருந்தது, எகிப்து பிரமீடுகள், வான வெளி ஆராய்சிகள் போன்றவற்றிற்கான கூடங்கள் என எட்டு கூடங்கள் இருந்தன. நடுவில் சிறுவர்களுக்கான விளையாட்டுத் தளம் ஒன்றும் இருந்தது.

அதில் பல்வேறு உருவங்கள் அமைக்கும் ஒரு சட்டம் போன்ற அமைப்பில் மூவரும் சாய்ந்து எங்களது உருவங்களை அமைத்தோம், அதற்கு முன் சிலர் நாடுகளின் வரைபடங்கள், விலங்குகள் போலெல்லாம் அமைத்துப் பார்தார்கள். அந்த பூங்காவை பார்வை இட்டு மீண்டும் பேருந்தில் ஏறி Interlaken Ost வர மணி 2 ஆகியது.

மூன்று மணிக்கு ஒரு தொடர்வண்டி இருந்தது அதில் முன்கூட்டியே சூரிக் செல்லலாம் எனவே விரைவாக விடுதிக்குச் செல்லலாம் என்று முடிவெடுத்தோம். நடந்து விடுதிக்கு வேறொரு வழியாகச் சென்றோம், அங்கே முன்பு பதிவில் போட்டு இருந்த நாய் சிறுநீர் கழிக்க அமைக்கப்பட்ட தனிப்பட்ட இடம் இருந்தது. அதைத் கடந்து வேறொரு சாலை வழியாக செல்ல வழியில் செர்ரி பழம், பச்சை ஆப்பிள், சிவப்பு ஆப்பிள் மரங்கள் வீட்டுத் தோட்டங்களிலும் வெளிப்பகுதியிலும் இருந்தன.



அவற்றையெல்லாம் பார்த்துவிட்டு விடுதிக்குச் செல்லவே 2:50 ஆகி இருந்தது, 3:00 தொடர் வண்டியைப் பிடிக்க முடியாது என முடிவு செய்து, விடுதியில் ஒரு காஃபி குடித்துவிட்டு, பெட்டிகளை பொறுமையாக இழுத்துக் கொண்டு தொடர்வண்டி நிலையம் வர மாலை 3:30 ஆகி இருந்தது, அப்போது ஒரு தொடர்வண்டி புறப்படத் ஆயத்தமாக இருந்தது என்றாலும் அதில் சென்றால் இருமுறை தொடர்வண்டி மாறிச் சென்றால் தான் சூரிக் செல்ல முடியும் என்று நிலைய உதவியாளர் சொன்னார். அடுத்து 4:05க்கு ஒரு தொடர்வண்டி இருந்தது, அது Bern என்கிற ஒரு இடத்தில் நிற்கும், அங்கிருந்து சூரிக் செல்லும் மற்றொரு தொடர் வண்டிக்கு மாறிச் செல்ல வேண்டும்.அரை மணி நேரம் காத்திருந்து 4.05 வண்டியில் ஏறினோம்.

தொடர்வண்டி புறப்பட்டது, மீண்டும் Brienzersee ஏரியை நீளம் முழுவதையும் தொடர்வண்டி பயணத்தின் வழியாக பார்க்கும் படி அந்தப் பகுதி வழியாகவே வண்டி பயணித்தது. ஏரியில் பல படகுகள் மிதந்து கொண்டு இருந்தன. வயல் வெளிகள், வீடுகள் என காட்சிகள் மாறி மாறி ஓட Bern நிலையத்தில் இறங்கினோம். அங்கிருந்து வேறொரு வண்டிக்கு மாறினோம். சூரிக் நகரை நெருங்க நெருங்க தொழிற் பேட்டைகள்
தென்பட்டன.




இவை எல்லாம் முதலில் சூரிக்கிலிருந்து - இண்டர்லக்கான் வரும் போது காணாத காட்சிகள் ஏனெனில் அன்று இரவு தொடங்கி இருந்தது. வண்டி சூரிக் விமான நிலையத்தில் நிற்கும் போது 6:30 மணி ஆகி இருந்தது. அங்கே நிலையத்தில் மூன்று அடுக்கில் இரண்டு அடுக்கில் சுற்றுலாவினர் பொருள் வாங்கும் கடைகள் இருந்தன அங்கு சிறிது நேரம் பார்வை இட்டுவிட்டு, 7:30 மணிக்கு பெட்டிகளை விமானத்திற்கு அனுப்பிவிட்டு கைப் பைகளுடன் மீண்டும் கடைப் பகுதிக்கு வந்து சில நினைவுப் பொருள்களை வாங்கித் திரும்பும் போது 8:30 ஆகி இருந்தது.



மீண்டும் விமான நிலையத்திற்குச் சென்று பாதுகாப்புச் சோதனைகளை முடித்துவிட்டு இணைப்பு இரயில் வழியாக விமானம் இருக்கும் முனையத்திற்கு வந்தோம். அங்கு பயணிகள் அனைவரின் கைப் பைகளையும் கடுமையாக சோதித்தே அனுப்பினார்கள். பிறகு விமானத்திற்குள் செல்லும் முன் பயணிகள் காத்திருக்கும் அறைக்குள் வந்தோம், மணியும் 9:40 ஐ நெருங்கியது, ஐந்து நிமிடத்தில் விமானத்திற்குள் அனுப்பினார்கள். விமானம் சரியாக இரவு 10:05 க்கு புறப்பட்டது.




இந்த முறை பயணம் 13 மணி நேரம், சிங்கை நேரப்படி 25 அக் 2009 மாலை 4 மணிக்கு சிங்கையும் அடையும். சிங்கையில் இருந்து லண்டன் செல்லும் போது கொடுக்கப்பட்ட அதே போன்ற உணவு சாப்பிட்டுவிட்டு தூங்கிவிட்டேன். எழும் போது பார்த்தால் சிங்கை நேரப்படி மாலை 1:45 ஆகி இருந்தது. ஒவ்வொருவருக்கும் பணிப்பெண்கள் 'குட் மார்னிங்' சொல்லி முகம் துடைத்துக் கொள்ள வெது வெதுப்பான ஈரத் துணியை கொடுத்துக் கொண்டிருந்தனர். பல்விளக்க பலர் விமான கழிவரையில் வரிசையில் நின்று கொண்டிருந்தனர் சாப்பாடு வந்தது, அதே போன்ற சாப்பாடு. எல்லாம் முடித்துவிட்டு 3 மணி நேரம் தூக்கத்திற்கு பிறகு சிங்கப்பூரில் மூன்றாம் முனையத்தில் விமானம் தரை இறங்கியது. இம்முறை இந்துமா கடலை குறுக்காக கடக்காமல், இந்தியா, பங்களாதேஷ்,பர்மா,தாய்லாந்து, மலேசியா நிலப்பரப்பு மீது பறந்து சிங்கையை அடைந்திருந்ததை விமானத்தின் பயணப்பாதை காட்டியது.

சிங்கப்பூர் பயணிகள் வெளியோறும் சோதனைக்குச் செல்லும் இட விமானக் கூடத்தில் மலரால் அலங்கரிக்கப்பட்ட, செய்யப்பட்ட அழகிய யானை உருவங்கள், துளசி அம்மா நினைவு வரவே க்ளிக்கினேன். வெளியே வந்து காஃபி குடித்துவிட்டு, வாடகை சிற்றுந்து எடுத்து வீட்டுக்கு வரும் வழியில் "மீண்டும் சென்று சென்று வரவேண்டும்" என்ற எண்ணம் இருந்து கொண்டே இருந்தது.

*****
பயணச் செலவுகள் :

(செலவுகள் எவ்வளவு ஆகும் என்று கேட்ட சிலருக்காகவும், செல்ல விரும்புபவர்களுக்கு விமானம், தங்கும் செலவு, மற்ற செலவுகள் குறித்த திட்ட உதவிக்காக இதை தருகிறேன்)

1. விமான வழி

அ. சிங்கப்பூர் - லண்டன்

ஆ. பாரிஸ் - சூரிக்

(இதை இரயில் பயணமாக மாற்றினால் 800 சிங்கப்பூர் வெள்ளி மீச்சப்படுத்த முடியும், இதற்கு மட்டுமே இருவழி விமானச் சீட்டு 1200 வெள்ளி, ரயிலில் 400 வெள்ளிகள் வரையில் தான் இருக்கும், விமானம் 1 + மணி நேரத்தில் செல்கிறது என்றாலும் விமான நிலையத்திற்கு 2 மணி நேரம் முன்னதாகச் செல்ல வேண்டும், ரயில் 3 - 4 மணி நேரத்திற்குள் பாரிஸிருந்து சூரிக் சென்றுவிடும்)

இ. சூரிக் - சிங்கப்பூர்

(பெரியவர் இருவர், சிறுவர் ஒருவருக்கு)

5,200.00 SGD = 2,510.99 EUR

2. தொடர் வண்டி (ஈரோ ஸ்டார்) : லண்டன் - பாரிஸ்

Outward journey: London St Pancras to Paris Nord
Standard Non flexible2 x Adults @ £35.00
1 x Child @ £29.00

99 பவுண்டுகள் (110.428 EUR)

3. பாரிசில் 2 நாள் தொடர் வண்டி பயணச் செலவு32+12+10 = 52 EUR

4. டிஸ்னி லேண்ட் நுழைவுச் சீட்டு
52+52+48 = 152 EUR

5. பாரிஸ் விடுதி 2 நாள்களுக்கு
225 EUR

6. ஸ்விஸ் ரயில் பயணம்
230.00 CHF = 152.293 EUR

7. ஸ்விஸ் விடுதி இரண்டு நாள்
296.00 CHF = 195.985 EUR


8. இதர செலவுகள் (சாப்பாடு மற்றும் பிற பொருள்கள், மியூசியங்கள், ஈபிள் டவர் நுழைவுச் சீட்டு, )

300 EUR

2,510 EUR + 110 EUR + 52 EUR + 152 EUR + 225 EUR + 152 EUR + 195 EUR + 300 EUR = 3696 EUR

பயணச் செலவு ஏறக் குறைய = 3700 EUR
குளிராடைகள் மற்றும் காலணிகள் = 150 EUR
நுழைவு அனுமதி விசா (செங்கன் விசா மற்றும் பிரிட்டீஸ் விசா) மூவருக்கும் = 450 EUR

மொத்த செலவு 4,150.00 EUR = 8,595.21 SGD

(இலண்டனில் மூன்று நாட்கள் உறவினர் வீட்டில் தங்கி இருந்ததால் விடுதி செலவும், வாகனச் செலவும் இல்லை, அதன் சேமிப்பு ஒரு 400 EUR = 825 SGD = 27,800.94 INR ஆக இருக்கலாம் )

8,595.21 SGD = 289,701.82 INR (இந்திய ரூபாயில்)

ஏறக் குறைய 300,000 INR

(இந்தியாவில் இருந்து ஐரோப்பா செல்ல சிங்கையில் இருந்து செல்வதைக் காட்டிலும் 25 விழுக்காடு விமானப் பயணச் செலவும் குறைவு, வளைகுடாவில் இருப்பவர்களுக்கும் இன்னும் 35 விழுக்காடு குறையும்)

இவை சேமிப்பாக இருந்தால் 'கையிருப்பு' என்னும் மன அமைதியைக் கொடுக்கும், இப்படி செலவாகினால் 'நாமும் சென்று வந்தோம்' என்கிற மன மகிழ்ச்சியைக் கொடுக்கும். செலவே இல்லை என்றால் எந்த ஒரு துய்புகளையும் (அனுபவங்களையும்) பெற முடியாது என்பதும் உண்மை. உண்பது, உறைவிடம் ஆகியவற்றிற்கு செலவழிப்பது போலவே மன அமைதிக்கும் உலக நாடுகள் சிலவற்றை கண்ணுற்று வருவதற்கு ஆகும் செலவுகள் கூட நமக்கே நமக்காக செய்து கொள்ளும் செலவுகளில் ஒன்று தான்.

*****



தொடரில் தொடர்ந்து பயணித்து, படங்களை ரசித்தும், கருத்துகளை சொல்லியும், படித்தும் வாழ்த்திய உள்ளங்களும், லண்டனில் என்னை சந்தித்து மகிழ்ச்சி ஏற்படுத்திய வெ.இராதாகிருஷ்ணன் அவர்களின் இல்லத்தினருக்கும், பாரிசில் வீட்டுக்கு அழைத்துக்கொண்டு போய் விருந்து வைத்து நெகிழ வைத்த 'யோகன் - பாரிஸ்' அண்ணன் இல்லத்தினருக்கும், சுவிஸ்பற்றிய குறிப்புகள் கொடுத்து உதவிய பதிவர் நண்பர் துக்ளக் மகேஷ், விமான நிலையம் வந்து வழியனுப்பி வாழ்த்திய நண்பர் முகவை இராம் குமார், விமானப் பயணச் சீட்டு ஏற்பாடு செய்த கொடுத்து உதவிய மேக்னட்ரான் பயண நிறுவனத்தின் ஈஸ்வரன் ஆகிய அனைவருக்கும் நன்றி.

யாதும் நாடே யாவரும் பாரீர் (Top Of The Europe) - 8

பருவகால மாற்றங்களில் ஏற்படும் கடும் குளிரின் சோம்பல்களிலிருந்து உற்சாகப்படுத்திக் கொள்ள பண்டிகைகள், அக்காலங்களில் விழாக்கள் நடைபெறுகின்றன. மார்கழி மாதக் குளிரையும் புறந்தள்ள தமிழ் நாட்டில் கார்த்திகை முதல் மார்கழி வரை கோவில் விழாக்கள் நடைபெறும், ஐரோப்பிய நாடுகளில் கடுங்குளிர், பனிப்பொழிவு காலங்களில் கிறிஸ்மஸ் விழா என்னும் ஏசு பிறப்பு நிகழ்ச்சி நடைபெறுகின்றது, கிறிஸ்மஸ் அலங்காரங்களில் பனிப் படர்ந்த கிறிஸ்மஸ் மரங்களைக் காட்சியாக வைக்கிறார்கள். பருவகால மாற்றத்தினால் ஏற்படும் இயற்கை சூழல் மாறுபாடுகளை தனக்கு ஏற்றவாறு மாற்றிக் கொள்வது மனித இனப் போக்காகக் இருக்கிறது, பிழைப்பு, வாழ்கை என்னும் வாழ்வியலில் அது இயல்பானதும் கூட. ஐரோப்பிய நாடுகளில் தற்பொழுது பனிக்காலம் தொடங்கி இருக்கிறது, Winter எனப்படும் (கடும்)குளிர் காலமான நவம்பர் - ஜனவரி திங்கள்களில் ஹாலோவின், கிறிஸ்மஸ் புத்தாண்டு கொண்டாட்டங்களுக்கு ஐரோப்பிய நாடுகள் ஆயத்தமாகிவருகின்றன.

*****

23 / அக்/2009 ஐரோப்பிய சுற்றுலாவின் நிறைவு நாளில் இருந்தோம். அன்று முதன்மையானதும் நிறைவாகவும் பார்க்க வேண்டிய இடம் ஐரோப்பாவின் உச்சி என்று அழைக்கப்படும் Jungfraujoch எனப்படும் பனி மலைக்குச் சென்று வருவது தான் திட்டம், அதற்கான பயணச் சீட்டுகள் எல்லாம் ஆயத்தமாக இருந்தது. அன்று காலை 8 மணிக்கு எழுந்து, 9 மணிக்கு ஆயத்தமாகி, விடுதியில் கொடுக்கும் ரொட்டி, பழச்சாறு காலை உணவுகளை முடித்துக் கொண்டு 9.30 மணிக்கு விடுதியை விட்டுக் கிளம்பினோம், அந்த விடுதியில் பல மஞ்சள் இன ஆசியர்களும், ஒரு சில இந்திய இல்லத்தினரும் கூட தங்கி இருந்தனர்.





குளிர்காலம் தொடங்கப் போகும் பருவ மாற்றத்தை உணர்த்த வெளியே லேசான மழைத்தூரல் பெய்து கொண்டிருந்தது, குடையை எடுத்துக் கொண்டு Interlaken OST எனப்படும் கிழக்கு தொடர் வண்டி நிலையத்தை நடந்தே அடைந்தோம். செல்லும் வழியெங்கும் வண்ண இலைகளுடன் காட்சி கொடுத்த மரங்கள், அந்த ஊரும் மிகத் தூய்மையாகவும், குளிருமாக மிக இனிமையாக இருந்தது. சுற்றிலும் மலைகள், அந்த மலைகளில், சில மலைகள் தலையில் வெண் பனி அணிந்திருந்தன. மலைகளின் மீது உரசிக் கொண்டும் , தழுவியும் நின்றபடி மேகக் கூட்டங்கள் பார்க்க கண் கொள்ளாக் காட்சி.

சாலை ஓரத்தில் நாய்களுடன் சிலர் சென்று கொண்டு இருந்தனர். நாய்கள் சிறுநீர் கழிக்க குத்துக் கல்லுடன் தனி இடம் கூட சாலை ஓரத்தில் இருந்தது வேறெந்த நாட்டிலும் பார்க்காத ஒரு காட்சி.



தொடர்வண்டி நிலையத்தில் விவரம் கேட்க மாறி மாறி மூன்று தொடர்வண்டிகள் மூலம் பயணிக்க வேண்டிய விவரம் சொல்லி, கூடவே தொடர்வண்டி புறப்படும் நேரம் தொடர்பான கையேடு ஒன்றையும், குறிப்புகளையும் கொடுத்தனர்.

முதலில் பயணம் செய்யப் போகும் தொடர்வண்டி Interlaken லிருந்து Grinde Wald என்ற நிலையத்துக் செல்லும், அங்கிருந்து பேருந்து ஒன்றில் ஏறி 1 கிமி தொலைவில் இருக்கும் அடுத்த நிலையத்துக்கு மாறவேண்டும். ஒவ்வொரு 30 நிமிடத்துக்கும் ஒரு தொடர்வண்டி என அப்போது 10:30 மணிக்கு புறப்படும் Grindel Wald தொடர்வண்டி புறப்பட காத்திருந்தது, ஏறி உட்கார்ந்தோம். இரண்டு நிமிடத்தில் புறப்பட்டது. மேல் கீழ் என இரண்டு தளங்கள் இருந்தன. வேடிக்கைப் பார்க்க வசதியாக மேல் தளத்தில் உட்கார்ந்தோம். அகலமான கண்ணாடி சன்னல்கள் வழியாக நன்றாக பார்க்கும் படி அமைத்திருந்தார்கள். சுற்றிலும் சற்று தொலைவில் மரங்களுடன் கூடிய மலைகள், அருகே புல்வெளிகள் அதில் பசுமாடுகள், ஆடுகள் மேய்வது, சிற்றோடைகள் வழியெங்குமான காட்சிகளாக இருந்தன. அங்காங்கே பள்ளத்தாக்குகள் அதன் சரிவில் தனித்தனி வீடுகள் இருந்தன.






விரைவான, சற்று நீளமான தொடர்வண்டி தான் 35 நிமிட பயணத்தில் Grindel Wald அடைந்தோம். அங்கே அருகே பேருந்து நிற்கும் இடத்திற்கு பயணிகள் சென்றனர், அடுத்த தொடர்வண்டி இணைப்புகாக இயக்கப்படும் தனிப்பட்ட பேருந்து, அதில் ஒரு மூன்று நிமிடப் பயணம் Grund என்ற இடத்தில் இருந்து அடுத்து மேலே அழைத்துச் செல்லும் தொடர்வண்டி நிலையத்திற்குச் சென்றது, மூன்று பெட்டிகளுடன் தொடர்வண்டி அங்கே ஆயத்தமாக நிற்க அதில் ஏறினோம், புறப்பட்டது, இந்த முறை மலையில் தொடர்வண்டி மேலே ஏறுவது உணரும்படி இருப்புப் பாதைத் தடம் ஏற்றத்தில் செல்வது நன்கு
தெரிந்தது, அதே லேசான மழை இங்கும் தொடர்ந்து பெய்து கொண்டு தான் இருந்தது.





மலைச் சரிவில் நிறைய வீடுகள், மாடுகள் தெரிந்தன. சிறிது நேரப் பயணத்திற்கு பிற வீடுகள் இல்லை, குறைவான உயர மரங்களும், நடந்து மேலே செல்லுவோருக்கான வழிகளும், கம்பித் தடத்தில் தொங்கிக் கொண்டு செல்லும் கயிறுந்து (Rope Car) மேலும் கீழுமாக சென்று கொண்டிருந்தன. சுமார் 20 நிமிட பயணத்திற்கு பிறகு அங்கங்கே வெளியில் உறைபனித் திட்டுகள் காணப்பட்டன, தொலைவில் தெரிந்த மலைகள் யாவும் பனிப்படந்து காணப்பட்டன. அடுத்த ஐந்து நிமிடப் பயணத்தில் தொடர்வண்டிக்கு வெளியே எங்கும் பனி வெளிகள்...காணப்பட்டன, அங்கே ஒரு நிறுத்தம் அதன் பெயர் KL.Scheidegg அத்துடன் அந்த தொடர்வண்டியில் இருந்து மலை உச்சிக்கு செல்லும் மற்றொரு தொடர் வண்டிக்கு மாற வேண்டு அனைவரும் இறங்கிக் கொண்டனர்.


அங்கு இறங்கியதும் இதுவரை தண்ணீர் துளிகாக மேலே விழுந்த மழைத்துளிகள் அந்த இடத்தில் பூப்போன்ற பனித் துளிச் சாரல்களாக கீழே விழுந்து கொண்டிருந்தன. அவை நம் உடல் மீது பட்டதும் உடல் சூட்டில் தண்ணீர் துளிகாக மாறிவிடுகிறது. இருப்புப் பாதைத் தவிர்த்து அனைத்து இடங்களும் உறைப் பனித்துளிகளால் மூடப்பட்டு இருந்தன. அதன் மீது நடக்க மென்மையாக இருந்தது, இரண்டு நிமிடம் அந்த பனிமழையில் நினைந்து மகிழ்ந்து அடுத்து மழை உச்சிக்குச் செல்லும் தொடர் வண்டியில் ஏறினோம். அதில் இரண்டே பெட்டிகள் இருந்தன.

பெரிய பெரிய சர்கஸ் கூடாரங்கள் வெண்ணிற ஐஸ்கிரிமை உடலெங்கும் பூசிக் கொண்டது போன்று சுற்றிலும் மலைகள் அதன் சரிவில் வெண்ணிற பனிப் பள்ளத்தாக்குகள், உறைப் பனி தலையில் தாங்கி நின்று கொண்டு இருந்த மிகக் குறைந்த மரங்கள் தென்பட்டன, வெண்பனி மூடிய சிறிய சமவெளி மீது அந்த சிறிய தொடர் வண்டி ஊர்ந்து சென்றது., சுமார் ஒரு கிலோமீட்டர் தொலைவுக்கு திரைப்படங்களில் மட்டுமே பார்த்து வந்த க்காட்சிகள் கண்ணுக்கு முன் சாட்சியாக வந்து கொண்டு இருந்தன, அதன் பின் பனிமலையின் குடைந்த குகைப்பாதை வழியாக வண்டி சென்றது.



குகைப்பாதையின் இடையிடையே பார்வையாளர்கள் மலைத் தொடரை ரசிப்பதற்காக நிறுத்தங்கள் வைத்திருந்தனர். அங்கே ஐந்து நிமிடங்கள் நின்றன, இப்படியாக Eigergletscher, Alpiglen, , Eismeer என்ற மலை ஏற்ற இடங்களில் நின்றது, அன்று கடும் பனிப்பொழிவு ஆகையால் அங்கே அமைந்திருந்த கண்ணாடி வழியாக பார்க்க முடியவில்லை, கண்ணாடிகளின் வெளிப்பக்கம் முழுவதுமே வெண்புகை போன்று பனிப் படர்ந்திருந்தால் அந்த உயரக் காட்சிகள் காணமுடியாமல் போனது.

நிறைவாக Jungfraujoch எனப்படும் மலை உச்சியில் அமைக்கப்பட்ட பார்வையாளர்கள் பார்பதற்காக அமைக்கப்பட்ட கட்டி இடத்தின் அடித்தள நிலையத்தை அடைந்தது.

(இணையத்தில் தேடி எடுத்தப் படம்)

அந்த இடம் முழுவதும் உச்சி மலையை குடைந்து அமைக்கப்பட்ட இடம், மேல் தளமாக பெரிய பார்வையாளர் கட்டிடம், அதில் நான்கு தளங்கள். மேல் தளத்திற்கு சென்றோம், அங்கே திறந்த வெளியில் நிற்பதற்கு பாதுகாப்பு கம்பிகளுடன் ஒரு தளம் அமைத்திருந்தார்கள், கதவை திறந்து கொண்டு அங்கு செல்ல.......லேசான பனிப்புயல் அதாவது கடுமையான காற்று.....பனித்துளிகளுடன் முகத்தில் அறையும் காற்று, நடுங்க வைக்கும் கடுமையான குளிர், ஒரு நிமிடம் அங்கு நின்றால் கைகள் விரைத்துப் போகும் அளவுக்கு கடும் குளிர். அங்கே நிற்க முடியவில்லை, இருந்தாலும் ஒரிரு முறைகள் உள்ளே சென்றுவிட்டு விட்டு அங்கு நின்று வந்தோம். வெளியே வெப்ப நிலை அளவு போட்டு இருந்தார்கள் - 8 டிகிரி.

அடுத்த தளத்தில் ஐஸ் பேலஸ் எனப்படும் பனி மாளிகை அமைக்கப்பட்டு இருந்தது, ஒரே சமயத்தில் இருவர் நடந்து போகும் அளவுக்கு குறுகலாக குகை போன்ற நுழைவாயில், அதனுள் பல இடங்களில் காட்சியாக வலப்பக்கமும் இடப்பக்கமும் பனிச் சிற்பங்கள் செய்து வைத்திருந்தனர்.






10 நிமிடம் ப்ரீசருள் இருந்தது போன்று இருந்தது அங்கிருந்து திரும்பிய பிறகு. போகும் போதே தேவையான அளவுக்கு ஒன்றுக்கும் மேற்பட்ட குளிராடைகள் அணிந்திருந்தால் அந்த கடும்குளிரை எதிர்கொண்டோம்.

அங்கே பிற தளங்களில் கண்ணாடி சன்னல் அமைக்கப்பட்டு வெளிக்காட்சிகள் தெரிந்தன. சுற்றுலா பொருள் விற்கும் கடைகளும், பானங்கள், உணவுகள் விற்கும் கடைகளும், ஒரு உணவு விடுதியும் இருந்தன, இரண்டு தளங்களில் கழிவரை வசதிகள் இருந்தன.
ஐரோப்பாவின் மலை உச்சியான அந்த இடத்தில் சுமார் 1 மணி நேரம் சுற்றிப் பார்த்து திரும்பினோம்.



வரும் வழியில் உறைபனி முடியும் தொடர் வண்டி மாறும் இடத்தில் சிறிது நேரம் பனிபொழிவில் பனியை உருண்டை உருட்டி வீசி எறிந்து விளையாடி கழித்துவிட்டு, பிறகு மாறுபட்ட வழி இருந்தும் சென்ற வழியிலேயே திரும்பினோம், மாற்று வழியை விட 30 நிமிடம் விரைவாக அழைத்துச் சென்றுவிடும் என்கிற தகவல் தெரிந்தது. மேலும் மலைக்காட்சிகள் இரண்டிலும் பெரிய மாறுதல் இருக்காது என்பதால் விரைவாக திரும்பும் வழியைத் தேர்ந்தெடுத்தோம்.






Interlaken OST திரும்ப மலை 6 ஆகி இருந்தது. அந்த ஊரை கொஞ்சம் நடந்தே சுற்றினோம்.


பிறகு விடுதிக்குச் சென்று சற்று ஓய்வெடுத்துவிட்டு, இரவு உணவுக்கு அங்கே சற்று தொலைவில் Interlaken West நிலையத்திற்கு அருகே இருந்த தாஜ் இந்திய உணவகத்திற்குச் சென்று இரவு உணவை முடித்தோம். மூன்று பேருக்கும் சேர்த்து இரவு உணவாக ஒரு புலாவ், நான்கு வட இந்திய ரொட்டி(Nan), உருளை கிழங்குடன் காலிப்ளவர் மசாலா 40 ஸ்விஸ் ப்ராங்க், மிகுதிதான். ஆனால் அந்த ஊரில் இந்திய உணவு கிடைப்பதற்கு கொடுக்கலாம். பனிப் பொழிவு மழை பெய்யும் போது தான் ஏற்படுகிறது, அன்று மழை தூறியதால் அதே போன்ற பருவ நிலையால் மலை உச்சியிலும் மழைக்குக்கு பதிலாக பனிப் பூப்பொழிவாக இருந்தது அன்றைய பருவ நிலையால் ஏற்பட்ட ஒன்று, இல்லை என்றால் உறைபனியை மட்டும் பார்த்துவிட்டு திரும்பி இருப்போம். ஆங்கிலத் திரைப்படத்தில் மட்டுமே பார்த்து வந்த பனித் தூறல், பனிப்பூக்கள் கண்களில் காட்சியாகவும், உடலிலும் பட்டதும் மகிழ்வானதொரு துய்பு.

பயணக்குறிப்புகள் : Jungfraujoch பனி மலைக்கு தொடர்வண்டி மற்றும் கயிறுந்து (Rope Car) தடவழிகள் இருக்கின்றன, நமக்கு விருப்பமானவற்றில் செல்லலாம். கடும் குளிர்காலத்தில் செல்லும் போது தேவையான குளிராடைகள், கையுறைகள், பொருத்தமான காலணிகள் (ஷூ) அணிந்து செல்ல வேண்டும். Interlaken லிருந்து சென்று, ஒரு மணி நேரம் பார்த்துவிட்டு, திரும்ப 6 மணி நேரங்கள் தான் ஆகிறது, Interlaken -ல் மற்ற விடுமுறை தளங்களைவிட குறைவான வாடகைக்கு விடுதிகள் கிடைக்கும். மற்ற கடைகளும், இந்திய உணவகங்களும் அமைந்திருக்கின்றன. Jungfraujoch மலை உச்சியில் உணவு மற்றும் சுற்றுலா நினைவு பொருள்கள் விலை மிகுதி, முடிந்த வரை உணவு பொருள்களையும் குடிநீர் ஆகியவற்றை உடன் எடுத்துச் செல்வது செலவைக் குறைக்கும்.
மலை உச்சியில் பனிச்சறுக்கு, நாய்கள் இழுத்துச் செல்லும் வண்டியில் மூன்று நிமிடப் பயணம் போன்ற விளையாட்டுகள் இருக்கின்றன. இருந்தும் பருவ நிலையைப் பொருட்டே இவைகள் நடக்கும், நாங்கள் சென்ற அன்று மோசமான பருவ நிலை. விளையாட்டுகள் எதுவும் நடைபெற வில்லை.




(படத்தின் மீது அழுத்து பெரிதாகப் பார்க்கவும்)

கடைசி மூன்றும் இணையத்தில் இருந்து எடுத்தப் படங்கள்)

நாய்களுக்கு ஏன் மூச்சா போகக் கூட இட வசதி செய்து தருகிறார்கள் என்பது இப்பதான் புரிகிறது :) பயணிகளை ஈர்பதில் அவைகளும், மாடுகளும் ஸ்விசர்லாந்தில் தன்னுடைய பங்கையாற்றுகின்றன :) மாட்டு மணி மாதிரிகள் பயணிகள் விரும்பி வாங்கிச் செல்லும் பயண நினைவுப் பொருள்களில் ஒன்றாக இருக்கிறது.

இங்கே எழுதி இருப்பவை அனைத்தும் சென்ற வாரம் இதே வெள்ளிக் கிழமை முழுவதும் நடந்த நிகழ்வு, எழுதும் போதே ... மீண்டும் அங்கெல்லாம் செல்ல மனம் ஏங்குகிறது.