எந்திரன் சொல்லும் தீர்ப்பு !

வழக்கமாக காது பிளக்க அடிக்கப்படும் விசில்கள் கூட நான் பார்த்த திரையரங்கில் இல்லை. திரையரங்கில் அத்தனை பேருமே 'டீசண்ட் பீப்பிள்ஸ்' தானா என்று வியக்க வைத்தது. படத்தில் இரஜினி எங்கே என்பதற்கு படம் முடிவதற்கு முன் 40 நிமிடங்கள் காத்திருக்க வேண்டி இருக்கிறது. வழக்கமாக ரஜினி செய்யும் ஸ்டைல்கள் படத்தில் இல்லை. ஆனால் அந்த ஒட்டுமொத்த எதிர்ப்பார்பையும் வில்லன் ரோபோவில் சிறப்பாக செய்திருக்கிறார். இவ்வளவு திறமையான நடிகர் ஏன் விசிலடிப்பதற்கு மட்டுமே இதுவரை படங்கள் நடித்தார் ? இரஜினி படங்களில் மாறுபட்ட படம் எந்திரன் என்றால் மிகை அல்ல. வழக்கமான ரஜினியின் அதிரடி கதாநாயகன் எந்திரனில் இல்லை என்பதால் இரஜினி ரசிகர்களுக்கு இந்தப் படம் ஏமாற்றம் தான். படத்தில் ரோபாக அவரே நடித்திருக்கிறார் என்பதை நம்பும் படி இல்லை அந்த அளவுக்கு இரஜினி ரோபோவாகவே மாறி இருக்கிறார். விஞ்ஞானி ரஜினியும் ரோபோ இரஜினியும் ஒருவருக்கொருவர் முற்றிலும் மாறுபட்டவராக ரஜினி அந்த பாத்திரங்களுக்குள் நுழைந்தே நடித்திருக்கிறார். மற்ற படங்களில் நடித்த போது அவருக்கு கிடைத்த சிறந்த நடிகருக்கான விருது எந்திரனுக்கு கிடைத்தால்/ கொடுத்தால் சிறப்பாக இருந்திருக்கும்.

இரஜினியின் எந்திரன் அவதாரம் அட்டகாசம். இரஜினிக்குள் இருந்த வில்லன் நடிப்பு அப்படியே தான் இருக்கிறது, இதுவரை அதை வில்லன் பாத்திரங்களுக்கு அறைகூவல் விடும் கதாநாயகனுக்காக மட்டுமே வில்லானாக தெரியும் படி நடித்தார். இந்தப் படத்தில் முழுமையாக இல்லாவிட்டாலும் வில்லன் பாத்திரத்தில் சிறப்பாக நடிக்க முடியும் என்று நிருபனம் செய்திருக்கிறார். இவ்வளவு நாட்களாக இவருக்குள் இருந்த வில்லனை தூங்கவைத்தவர்கள் தயாரிப்பாளர்களா இயக்குனர்களா ? அல்லது மாஸ் ஹிரோ என்று இவரே போட்டுக் கொண்ட வேடமா ? தெரியவில்லை. இருந்தாலும் முதல் முறையாக பல ஆண்டுகளுக்கு பிறகு நடிப்பு அறைகூவல் விடும் வில்லன் பாத்திரத்தில் தன்னாலும் செய்ய முடியும் என்று காட்டி இருப்பது திரை ரசிகர்களுக்கு மகிழ்ச்சி மற்றபடி இது போன்ற நடிப்பு இரஜினி ரசிகர்களுக்கு ஏமாற்றமே. காதல் பாடல்களில் இரஜினி ரசிகர்களுக்கான ஸ்டைல் இருக்கிறது. மற்றபடி சயின்டிஸ்ட் ரஜினி ஒரு பயந்தாங்கொள்ளிக் கேரக்டர் என்பதை ரஜினி ரசிகர்களால் ஜீரணிக்க முடியாது. சூப்பர் ஸ்டாரின் நடிப்பு அட்டகாசம், இன்னும் ஒருமுறை பார்க்கக் கூட எனக்கு தோன்றுகிறது. என் மகளுக்கும் எந்திரன் மிகவும் பிடித்திருந்ததாம்.

ஷங்கர் படம் தான் என்பதற்கு கிராபிக்ஸ் காட்சிகளைத் தவிர்த்தும், ரிச் சீன்ஸ் எனப்படும் செலவு மிக்கக் காட்சிகளைத் தவிர்த்து படத்தில் ஷங்கர் முத்திரைகள் இல்லை. வழக்கமாக ஊழலை ஒழிக்கிறேன். லஞ்சத்தை எதிர்க்கிறேன் என்று காட்சிப்படுத்துபவர் துவக்கத்தில் ரோபோவை இராணுவத்திற்கு பயன்படுத்தப் போவதாக கதையை நகர்த்தி அதையும் இடையில் மீட்டுக்கொண்டார். அவருக்கே அவரது தேசியவா(வியா)தி அவதாரம் போரடித்துவிட்டது போலும், அதனால் கதையை மாற்றும் கட்டாயத்தில் ரோபோ ஐஸ்வர்யாவை (சனா) காதலிக்க எடுக்கும் முயற்சியில் கொள்ளையடிப்பது, அதை விஞ்ஞானி ரஜினி எப்படி முறியடிக்கிறார் என்பதாக ஒரு வித காதல்கதை போல் சொல்ல முயற்சித்திருக்கிறார். ஒரு சில நையாண்டி வசனங்கள் சுஜாதா எழுதியவை என்பதாக தெரிகிறது. படத்தில் முழுதுமாக சுஜாதா பணியாற்றி இருந்திருந்தால் படம் கலகலப்பாக நகர்ந்திருக்கும். 2 1/2 மணி நேரத்திற்கும் மேலாக படம் ஓடுவது அயர்ச்சியைத் தருகிறது.

இடைவேளை வரையிலும் கூட ரோபோவை வைத்து ஸ்பைடர் மேன் அவதாரம் போல் எதுவும் பெரிதாக காட்சிகள் வைக்கப் போகிறார்களோ என்பதற்கு ஒரு ட்ரைன் சண்டைக்காட்சியைத் தவிர்த்து எதுவும் இல்லை. பிற்பாதியின் பாதியில் தான் படம் வேகமாக நகர்கிறது. பாடலுக்கு அழகாக நடனம் ஆடுகிறார் ஐஸ். விஞ்ஞானி ரஜினியின் ஐஸும் சந்திக்கும் காட்சிகள் ஒருவருக்கொருவர் கோவித்துக் கொள்வதாகவும் அதன் முடிவில் பாடல் என்பதை அமைத்திருக்கிறார்கள், படத்தில் ரஜினிக்கும் ஐஸுக்கும் காதல் எவ்வாறு வந்தது என்பதைக் காட்ட மெனக்கடாமல் அவர்களை காதலர்களாகவே அறிமுகப்படுத்துகிறார் ஷ்ங்கர். பிறகு ரோபோ ரஜினி ஐஸை காதலிக்கக்த் துவங்குவதால் இரண்டுமுறை காதல் உருவாகும் காட்சிகளை அமைப்பது போர் என்று விட்டிருப்பார் போலும். ஐஸுக்கும் ரஜினிக்கும் படத்தில் கெமிஸ்ட்ரி பிசிக்ஸ் எதுவும் தெரியவில்லை, காட்சிகளில் சேர்ந்து நடிக்கிறார்கள் அதுவும் ரசிகர்களுக்கு அவர்களின் வயது தெரிந்திருப்பதால், இருவரிடமும் அது போல் பெரிதாக ரொம்பவும் எதிர்பார்க்க முடியவில்லை.

ரஹ்மான் இசைதான் படத்தை முழுதாமாக தூக்கி நிறுத்தி இருக்கிறது. அத்தனை பாடல்களும் ஏற்கனவே கேட்டுச் சென்றதால் படத்தில் காட்சிகளுடன் பார்க்க இன்னும் சிறப்பாகவே இருந்தது.

மனிதர்களைப் போல் சிந்திக்கத் தெரியும், உணர்ச்சிவசப்படும் ரோபாக்களால் மனித இனத்துக்கு பலன் எதுவும் இல்லை, மனித இனத்துக்கு போட்டியாகவும் எதிரியாகவும் அமையும், அதை அழித்துவிட வேண்டும் என்பதாக ஷங்கர் நீதிபதிகள் மூலம் தீர்ப்பு எழுதி இருக்கிறார். வருணாசிரம தருமத்தில் ஊறிய இந்தியாவில் சிந்திக்கத் துவங்கினால் உருவாகும் பிரச்சனையை நன்று அறிந்து, அதனால் தானே சூத்திரன் படிக்கக் கூடாது அவன் உடல் வழியான வேலையை மட்டும் பார்த்தால் போதும் என்று சொல்லி சூடுவைத்தார்கள், அதையே சன்குழுமம் ஷங்கரும் இரஜினி என்கிற ரோபோவை வைத்து சொல்லி இருக்கிறார். எந்திரன் ஷங்கரின் மனுதர்மம்.

ரஜினி, ரஹ்மான் இவர்களின் உழைப்பிற்காகவும், தமிழில் இதுவரை வராத கிராபிக்ஸ் முயற்சிக்காக படம் பார்கலாம்.

எந்திரனுக்கு உயிர் கொடுக்கும் எஸ்பிபி !

எந்திரனில் அனைத்துப் பாடல்களும் எனக்கு திரும்பக் கேட்டப் போது பிடிக்க துவங்கினாலும், முதல் முறை கேட்ட போதே பிடித்தப் பாடல் 'புதிய மனிதா பூமிக்கு வா'. படத்தில் இந்தப் பாடல் முதல் பாடலாக இருக்கும் என்று நினைக்கிறேன். எந்திரனை வடிவமைக்கும் ரஜினி அதை எழவைக்கும் போது பாடும் பாடல் போன்று வரிகள் இருக்கின்றன.

ரஜினிப் படங்கள் எனக்கு பிடிக்கக்காரணமானது எஸ்பிபி குரலில் படத்தில் ஒரே ஒரு சூப்பர் பாடலாகவது அதில் இருக்கும் என்பதால் தான், ரஜினிக்கு எஸ்பிபி பாடாத படங்கள் மிகக் குறைவு. எஸ்பிபியின் குரல் ரஜினிக்கு மட்டுமல்ல எந்த ஒரு நடிகருக்கும் பொருந்தும் குரல் தான். எம்ஜிஆர் துவங்கி இன்றைய முன்னனி நடிகர்கள் அனைவரும் எஸ்பிபி பாடல்களுக்கு வாயசைத்திருக்கிறார்கள். சர்கரையில் பிசைந்த பலாச்சுளைப் போன்ற எஸ்பிபி குரல் தமிழுக்குக் கிடைத்தது எம்ஜிஆரின் முயற்சி. அன்று துவங்கிய பாடும் நிலா... என்றுமே இசைவானின் முழு நிலவு தான்.

எந்திரனில் எஸ்பிபி பாடலில் குரல் ஏற்றக் இரக்கம் (ஹைப் பிச், லோ பிச்) அடுத்து அடுத்து அமைந்தப் பாடல் 'புதிய மனிதா பூமிக்கு வா'. பல்லவி சரணங்களுக்கு பிறகு எஸ்பிபியின் குரல் பாட்டில் வருகிறது. 'அரிமா...அரிமா' பாடலும் எஸ்பிபி பாடியிருந்தால் இன்னும் சிறப்பாகவே இருக்கும் என்று நினைக்கிறேன்.

கருவில் பிறந்தது எல்லாம் மரிக்கும்,
அறிவில் பிறந்தது மரிப்பதே இல்லை -

என்பதாக எந்திரன் என்னும் ரோபோவினை உருவாக்கும் இறுதியில் அதன் சிறப்புகளைச் ரஜினி சொல்லி சொல்லி எந்திரனை உயிரூட்டுவதாக எழுதப்பட்டப் பாடல். இடையே 'எந்த மொழி அறிந்திருந்தாலும் என் தந்தை மொழி தமிழ் அல்லவா' என்ற வரிகள் ரஜினியைக் குறிப்பதாக வருகின்றன. ரஜினியின் தமிழ் பால் தற்போது அதே வைரமுத்துவினால் 'தந்தை மொழி' ஆகி இருக்கிறது. தந்தை மொழி, தந்தையர் நாடு இவை போன்றவை வலதுசாரி சிந்தனை என்பதாகச் சொல்லுவார்கள். திராவிடர்கள் தாய்நாடு என்றும் ஆரியர்கள் தந்தையர் நாடு என்று சொல்லுவார்கள் (தந்தையர் நாடெனும் போதினிலே சக்தி பிறக்குது மூச்சினிலே - பாரதியார்) வைரமுத்து எதை வைத்து அப்படி எழுதினார் என்றே தெரியவில்லை. தமிழர் பண்பாட்டுக்கேற்ப தாய்மொழி என்றே சொல்லி இருக்கலாம்.

'புதிய மனிதா பூமிக்கு வா' பாடல் ஏஆர் ரஹ்மானின் குரலில் பல்லவியாகத் தொடங்குகிறது, தொடர்ந்து ரஹ்மானின் மகள் கதீஜா தொடர்கிறார், பிறகு எஸ்பிபி பாடுகிறார். கதீஜாவின் குரல் கிடதட்ட இந்திராவில் 'நிலா...காய்கிறது ' பாடிய போது இருந்த ஹரினியின் குரல் போன்றே இனிமையாக இருக்கிறது. முழுநேரப் பாடகி ஆகும் குரல் வளம். முதன் முறையாக கதீஜா எஸ்பிபியுடன் இணைந்து பாடும் பாடலாக அமைந்திருப்பதும் அவருக்கும் மற்றொரு சிறப்பு.

எனக்கு எல்லா பாடகர்/பாடகிகளின் குரலும் பாடலுக்கு ஏற்ப பிடிக்கும் என்றால் எஸ்பிபி பாடும் எந்தப் பாடலும் அவரது குரலுக்காவே பிடிக்கும்.

எஸ்பிபி ரஜினிகாகப் பாடிய 'ஒருவன் ஒருவன் முதலாளி', 'எம்பேரு படையப்பா', 'தேவுடா தேவுடா' போன்ற படு வேகப் பாடல்கள் போல் அல்லாது எந்திரனில் கொஞ்சம் அதிரடி, கொஞ்சம் அமைதியான பாடலாகத்தான் இருக்கிறது. பின்னரவில் அமைதியான சூழலில் கேட்க சிறப்பாக இருந்தது.

இராவணன் பற்றி வாய்திறக்காத இந்துத்துவாக்கள் !

க(ளி)ம்புகளை கையில் வைத்துக் கொண்டு இந்து மதம் திரைப்படங்களில் புண்படுத்தப்பட்டு, காயப்படுத்தப்பட்டு இருக்கிறதா என்று கண் காணித்து மருந்து போடவும், மண்டையை உடைக்கவும் தயாராகும் இந்துவாக்கள், இராவணன் படம் பற்றி வாய்த் திறக்காதது வியப்பளிப்பையும் வியப்பின்மையையும் ஒருசேரவே அளிக்கிறது. கருணாநிதி இந்து மதத்தை கொச்சைப்படுத்திவிட்டார், இராமனை இழிவு படுத்திவிட்டார் என்றெல்லாம் கூப்பாடு போட்டு கண்டனம் தெரிவிப்பவர்கள் இராமயணம் பின்னனியில் எடுக்கப்பட்ட ஒரு கதையில் இராமன் இழிவாகவும், இராவணன் உயர்வாகவும் காட்டப்பட்டிருப்பதை பார்த்து இவர்கள் கொதித்திருப்பார்கள் என்றே பலரும் நினைத்தது சற்று ஏமாற்றம் தான்.

* படத்தில் (அசோக) வனச் சீதையாக வலம் வந்த ஐஸ்வர்யா ஆடைகளில் கண்ணியம் இல்லை, படம் முழுவதும் ஜாக்கெட்டை திருப்பிப் போட்டுக் கொண்டதைப் போன்றே அணிந்து இருந்தார் (நன்றி திரு பரிசல்காரன்)

* சீதை மீது இராவணன் விழுவது போன்ற காட்சியாக ஐஸ்வர்யா மீது விக்ரம் தடுமாறி விழுவது, பிறகு சீதையை நெருங்கி உடலெங்கும் கையால் படர்வது போன்ற காட்சிகள், இந்த காட்சி இந்திப் படத்தில் இல்லை. (இந்தி ரசிகர்கள் டென்சன் ஆவார்கள் என்று தவிர்தார்களோ), இராமயணக் கதைபடி இராவணன் சீதையை தொடவே மாட்டான், பெண்ணின் விருப்பமில்லாமல் பெண்ணைத் தொட்டால் தலை வெடித்துவிடும் என்கிற சாபம் இருந்ததாம். முதல் காட்சியில் தண்ணீரில் தள்ளிவிடப் படும் சீதையை பிற ஆடவன் தொட்டு தூக்கி காப்பாற்றுவது போன்றவை இவை எல்லாம். இராவ(ண)ன் படங்களில் சீதை மீது இராவணன் விழுவது போன்ற காட்சி இதிகாச மீறல்.

* இராமயணக் கதையில் சீதை மீது சந்தேகப்படுபவன் பிற ஆடவன் தான், குறிப்பாக துணி துவைக்கும் ஒருவர் சீதை மீது சந்தேகப்பட இராமன் சீதையை தீக்குளிக்கச் சொல்லுவான். இதில் இராமன் பாத்திரமே சீதை ஐஸ்வர்யா மீது சந்தேகம் கொண்டு மருத்துவ சோதனைக்குச் செல்லச் சொல்கிறது.

* அனுமாராக வரும் கார்திக்கை படம் முழுவதும் தண்ணி அடிக்கும் குடிகாரன் பாத்திரமாகக் காட்டி அனுமாரைக் கொச்சைப் படுத்தியது

* இதைவிடக் கொடுமையோ கொடுமை..... சொல்லவென்னா கொடுமை தமிழில் வரும் இராவணன் இந்தியில் வரும் சீதைக்கு கணவன் :)

* இராமயணத்தில் சீதை மீட்கப்படுவதற்கு முன்பே இராவணன் அழிந்துவிடுவான், அல்லது அழிந்த பிறகு மீட்கப்படுவாள், இதில் சந்தேகப்படும் இராமனிடமிருந்து விலகி இராவணனைத் தேடி வருவதாகக் காட்டுகிறார்கள். கடைசி காட்சியில் இராவணன் சீதையை தொட்டு அப்புறப்படுத்துகிறான். இவை எல்லாம் இதிகாச மீறல்
. இவையெல்லாம் இராமயணத்தின் மீது விழுந்த கீறல். :)

புனிதனாகவே பார்த்துவரும் இராமனையும், சீதையும் ஏகத்திற்கும் பந்தாடி, இராவணனை குற்றமற்றவன், நல்லவனாகக் காட்டி இருப்பதை இந்துதுவ ஆதரவாளர்கள் எப்படிப் பொறுத்துக் கொண்டார்கள் என்பது வியப்பென்றாலும். வியப்பின்மைக்கு காரணம், படம் எடுத்தது மணிரத்னம் என்கிற பார்பனர் என்பதால் இந்த புதினா (எழுத்துப் பிழை இல்லை) இராமயணம் புதுமை, புரட்சி என்று நினைக்கிறார்களோ, இவையும் எதிர்ப்பார்த்து தானே என்கிற வியப்பின்மையும் ஏற்படுகிறது. எந்த ஒரு மாறுபட்ட நிகழ்விலும் 'அவா செய்தா புரட்சி மத்தவா செய்தால் அபத்தம்' என்பது தான் வழக்கமான பார்பன பொது புத்தி விமர்சனம், அதற்கு மேல் சொல்லிக் கொள்ள ஒன்றும் இல்லை.

இரவின் கரிய வண்ணத்தைக் நிறமாகக் கொண்டவன் என்கிற பெயர் காரணத்தைக் பெயராக வைக்கப்பட்ட இராவ(ண்)ணன், இரவணன் > இராவன் என்பது திரிந்த தமிழ் பெயர், இராவணன் என்பவன் தமிழன், திராவிட இனத்தைச் சார்ந்தவன், வழக்கமாக திராவிடர்களை அசுரர்களாகக் காட்டுவதே வட இந்திய பாணிக் கதைகள் என்பதாகவும் சொல்லபப்டும் இராமயணக் கதையின் மீள் பதிப்பில் இராவணனை நல்லவனாக மாற்றி வட இந்தியாவிற்கு புதிய இராமயணம் வழங்கிய இயக்குனர் மணிரத்னத்தை வெகுவாக பாராட்டுகிறேன்.

ராவணன் ராமாயணம் அல்ல..! - மணிரத்னம்

படம் : ராவணன் இணைய தளம்

சுறா - வுல எல்லாமே இருக்கு !

கடந்த 10 ஆண்டுகளில் வந்த விஜய் படங்களில் 80 விழுக்காடு படங்களைப் பார்த்திருப்பேன். விஜய்படங்களுக்கு திரையரங்கில் கூட்டம் அள்ளுது, குருவி படத்தை பினாங்கில் பார்த்த போதும் அங்கு அலைமோதிய கூட்டம் (லோக்கல் மலேசிய மக்கள்) விஜய் தனக்கான ரசிகர் பட்டாளத்தை கட்டியமைப்பதில் வெற்றி பெற்றிருக்கிறார் என்று தான் தெரிந்தது, குருவிக்கு பிறகு வந்த நான்கு திரைப்படங்களுக்கும் முதல் நாள், முதல் வார இறுதிகளில் திரையரங்கில் கூட்டம் அலைமோதியது. விஜய் படங்கள் வெற்றியா தோல்வியா என்பதைவிட எப்போதும் விஜய் படங்களை எதிர்பார்த்து பெரிய கூட்டம் திரையரங்கிற்கு வருகிறது என்பது உண்மை. அவர்களில் யாரும் விஜய் படங்கள் மாபெரும் வெற்றிபெரும் என்று எதிர்பார்ப்பதில்லை என்பதை அவர்களின் தொடர்சியான வருகை சொல்லிவிடுகிறது.

இதனால் தான் என்னவோ விஜய் பாணி படங்களை மட்டுமே விஜய் செய்ய முடிவு செய்து இருக்கிறார், என்று தெரிகிறது. நான்கு சண்டைகள், நான்கு பாடல்கள், அதில் இரண்டு குத்து பாட்டு, அரசியல் தனமான வில்லன், அவனை எதிர்க்கும் விஜய் இவைதான் விஜய்படங்களின் கதையாக இருக்கிறது. சுறா படத்தில் மீனவ இளைஞன் சுறாவாக வருகிறார், வழக்கம் போல் மீனவர்கள் குடியிருக்கும் புறம்போக்கு நிலத்தை தீம் பார்க் கட்ட குறிவைக்கும் வில்லனுடன் மோதி தன்னைச் சார்ந்த மீனவர்களுக்கு காங்கிரீட் வீடு கட்டித்தருகிறார். சைட் டிஸ் போல கவர்ச்சிக்கு அப்போதைக்கு சரியான மார்கெட் உள்ள ஒரு நடிகை, இதில் தங்கத்தாரகை என்று ரசிகர்களால் விசில் அடிக்கப்படும் தமன்னா. படத்தின் நகைச்சுவைக்காக வடிவேலு. வெண்ணிறாடை மூர்த்தியை ரசிக்க பெரும் கூட்டம் இருக்கிறது என்பதை அவர் வரும் ஒரு காட்சியில் விசிலடித்து மகிழ்ச்சியை தெரிவித்தனர் பலர். பழம்பெரும் நடிகர்களில் எஞ்சி இருப்பவர் வெண்ணிறாடை மூர்த்தி, அவரின் வசனங்கள் இருபொருள் கொண்டது என்ற விமர்சனம் இருந்தாலும், தெருக் கூத்துகளில் அதுபோலவே கேட்டுப் பழக்கப்பட்டதால் வெண்ணிறாடை மூர்த்தி வசனங்களை பலரும் உள்ளுக்குளாவது ரசிக்கவே செய்கின்றனர். இந்த வயசிலேயும் பிட்டு ரோலாக இருந்தாலும் பட்டுன்னு நடிச்சு கொடுத்து சும்மா மனுசன் அசத்தி இருக்கிறார்.

விஜய்படம் கலைப்படம் என்று விளம்பரப்படுத்தப்படுவதில்லை. பொழுது போக்குபடம் தான். சினிமாவுக்கு போவது பொழுது போக்குக்குத்தான் என நினைக்கும் ரசிக மனநிலையை விஜய் படங்கள் பூர்த்தி செய்கின்றன. அதுக்கு மேல எதுவும் இருப்பதாக எனக்கு தெரியவில்லை. எனக்கு படத்தில் இடைவேளை எப்போ வரும் என்ற அயற்சி மிஞ்சியது, அதன் பிறகு விறுவிறுப்பாக படம் சென்றது. மீனவர்கள், (ரிக்ஷா காரர்கள்) ஆட்டோகாரர்கள் என்று அடையாளப்படுத்தும் அளவுக்கு உள்ள பெரும் திரளான கடைநிலை வாழ்க்கை வாழும் திரைப்பட ரசிகர்களை குறி(த்து)வைத்து படம் செய்த எம்ஜிஆர், ரஜினி இவர்களின் வரிசையில் விஜய் பயணிக்கிறார். எம்ஜிஆர், ரஜினி அப்படியான படம் செய்யும் போது இவர் செய்யக் கூடாதா ?

படத்தைப் பார்த்துவிட்டு விஜயை திட்டுகிறவர்கள் எம்ஜிஆர், ரஜினியை கூட திட்டலாம், ஏனெனில் அவர்களும் அவர்களின் ரசிகர்களுக்காக அவர்கள் பாணி படங்களைத்தான் எடுத்தார்கள். விஜய்படத்திற்கு என்ன எதிர்ப்பார்ப்பு வைத்துச் செல்கிறோமோ அது இந்த படத்தில் இருக்கிறது. விஜய் ரசிகர்களுக்கான மற்றொரு படம் சுறா.... நன்றாக கவனித்தேன் படம் பார்த்து விட்டு வெளியே வந்தவர்கள் வரும் போது எதிர்மறையாக விமர்சனம் செய்து முனுகியது போல் தெரியவில்லை. வெளியீடு ஆகி இரண்டாம் நாள் என்பதால் படத்தின் பார்வையாளர்கள் 90 விழுக்காடு விஜய்ரசிகர்கள் தான். நான் விஜய் ரசிகன் இல்லை, இருந்தாலும் விஜய் படம் இப்படித்தான் இருக்கும் என்று நினைத்தே சென்றேன். படம் ஏமாற்றவில்லை.

பை(ன்)யா !

படத்தின் நாயகன் முரட்டு பையன், முன் கோபக்காரன், நக்கலாக பேச்சும் பெண்கள் மீது ஜொள்ளு சிவக்குமாரின் சின்னப் பையனை அந்த கேரக்டரில் போடுங்க என்று நினைக்கும் படி கார்த்தியின் மூன்றாவது படமும் அவருக்கு அப்படி ஒரு தோற்றம் கிடைக்கும் படி வந்திருக்கு. இருந்தாலும் இந்தப் படத்தில் கார் ஓட்டும் கார்த்திக், ஜீன்ஸ் பேண்ட், கைமடித்த டெனிம் ஸ்டைலிஸ் சட்டைகள் என்று சற்று மாறுபட்டு இருக்கிறார். எந்த ஒரு கோணத்திலும் அப்பா சிவக்குமாரையோ, அவரது அண்ணன் சூர்யாவையையோ கொண்டு வரும் முகத் தோற்றம். கதையில் கார்த்தி கச்சிதமாக பொருந்தி இருக்கிறார்.

நான்கு நண்பர்கள், அவர்களுடன் ஒரு நண்பி என ஐவர் கூட்டணியான கார்த்தியின் நண்பர்கள் கார்திக்குக்கு பெங்களூரில் வேலைக்கு முயற்சிக்க......எதிர்பாராவிதமாக ஒரு ஷாப்பிங் காம்பெளெக்சில் தமன்னாவைப் பார்த்தத்தில் கார்த்தி அவரின் மீது பைத்தியமாக ஆகிறார். இடையில் இவர்களுக்கு கார் கொடுத்த நண்பரை அழைத்துவரச் செல்லும் போது தம்மானாவை வில்லன் உறவினர் சென்னைக்கு கடத்த முயற்சிக்க வாடகைக் கார் தேடும் போது கார்த்தி ஜொள்ளுவிட்டபடி முன்வருகிறார். உறவினரை ஏமாற்றி மும்பைக்கு தமன்னா தப்பிக்க முயற்சிக்க இருவரும் காரில் பயணிக்கிறார்கள். இதற்கிடையே ஏற்கனவே வேறுரொரு வில்லன் கும்பலுடன் கார்த்தி மோதி இருக்க, தமன்னாவின் உறவினர் வில்லன் பட்டாளம் இரு எதிரிகள் இவர்களை துறத்துகிறார்கள்.

நகைச்சுவைக்காக தனி ட்ராக் இல்லாவிட்டாலும் இயக்குனர் லிங்கு சாமி கார்த்தியை வைத்தே சரி செய்திருக்கிறார். இடைவேளைக்கு சற்று முன்பும் இடைவேளைக்கு பிறகு கனல் கண்ணன் அமைத்த சண்டைக் காட்சிகள் சண்டைக் கோழி ரகம். கார்த்தியின் அசத்தலான சண்டைக் காட்சிகளில் தேறி இருக்கிறார்....அசத்தல்.



அவருடன் ஒட்டிக் கொண்ட வெடவெட கோழிக்குஞ்சு போல தமன்னா வசனம் குறைவாகப் பேசினாலும் இரண்டு ஜோடிக்கும் கெமிஸ்ட்ரி நன்றாக பொருந்தி இருக்கு.

யுவன் இசையில் மூன்று பாடல்கள் இனிமை, பின்னனி இசையும் இளைய ராஜாவின் இளைய ராஜா சிறப்பாக செய்திருக்கிறார்.

நெடுஞ்சாலைகள் படம் முழுக்க வருகிறது. நன்றாக படமாக்கி இருக்கிறார்கள். ரன், சண்டைக் கோழி வகையில் லிங்கு சாமி செய்திருக்கும் மற்றொரு படம். 2:45 மணி நேரம் ஓடுகிறது.

கார்த்தி படம் என்பதற்காகவே நான் பார்த்த இரண்டாவது கார்த்தி படம். இயக்குனர் லிங்குசாமி என்று எழுத்து போடும் போது திரையரங்கில் கைத்தட்டல், இயக்குனருக்காகவும் படம் பார்க்கவந்தவர்கள் மிகுதி. படவெளியிடு கருணாநிதி பேரன் தயாநிதி அழகிரி

நாயகன் நாயகிக்கு பெற்றொர்கள் பாத்திரம் எதுவும் திரையில் காட்டப்படவில்லை. நான்கு நண்பர்கள், 10 - 10 இரு எதிரி குழுக்கள், கடைசியில் ஒரு உறவினர் கூட்டம், மும்பை நண்பனாக அயனில் நடித்த நண்டு நொரண்டு நடிக்கிறார். ஒரு சில காட்சிகள் என்றாலும் கலகல.

வேகமான திரைக்கதையும், சண்டை காட்சிகள் பிடித்தவர்களுக்கு லிங்குசாமியின் பைய.....fine fine. மற்றவர்களுக்கு சாலை இரைச்சல், கார் சத்தங்கள், சண்டைகள் அனைத்தும் சத்தமாக இருக்கும்.......பையா fine

பையா.......பைன் எனக்கு பிடித்து இருக்கு. சிவக்குமாரின் சின்னப் பையன் பாஸ் பாஸ்.

ஆனால் தொடர்ந்து இதே போன்றே பாத்திரப் படைப்பில் நடித்தால் போரடித்துவிடும்

அங்காடித் தெரு - திரைபார்வை !

ஸ்டார் வேல்யூ, டைரக்டர் வேல்யூ என்ற பிரிவாக திரைப்படங்கள் பார்க்கப்படுவதும் விமர்சனம் செய்வதும் நடைமுறை, இந்த வகையில் ஒரே படத்திற்கு பல்வேறு பதிவர்களிடமிருந்து 50க்கும் மேற்பட்ட விமர்சனங்கள் வரும். செல்வராகவன், கவுதம் மேனன் படங்களுக்கு மிகுதியான விமர்சனங்கள் வந்தது. அங்காடித் தெரு பற்றி கேபிள் சங்கர் பதிவைப் படித்ததும் பார்க்க வேண்டும் என்று நினைத்தேன். மற்றப் படங்களின் விமர்சனங்களை விட இந்தப் படம் பற்றி எழுதும் போது 'இவருமா ?' என்று சிலருக்கு சலிப்பு ஏற்படுத்தினாலும், மேலும் பார்க்காத ஒருவர் படம் பார்க்க விரும்புவார் என்கிற நம்பிக்கையில் எழுதுகிறேன்.

விளிம்பு நிலைக்கும் நடுத்தரவர்கத்திற்கும் இடைப்பட்ட மக்களின் வாழ்க்கையின் போக்குகள் பற்றி நன்றாக சொல்லி இருக்கிறார்கள். ஐந்து மாடி ஜவுளிக்கடைகளின் கிழிந்த பக்கங்கள் படத்தில் காட்சி படுத்தப்பட்டு இருக்கிறது. கூலித் தொழிலாளிகளுக்கு முடிந்த அளவில் பிடித்தம் செய்து ஊதியம் வழங்கிவிட்டு கோடிகளில் லாபம் பெரும் நிறுவனங்கள் உபரிப் பணத்தை (விளம்பர) நடிகைகளின் படுக்கை அறையில் நிறைத்துவிடுகிறார்கள் என்பது நாம் அறிந்த தகவல் தான்.

கொத்தடிமை முறை தற்போது இல்லை என நினைக்கிறோம், ஆனால் அது வேறொரு வடிவமாக தொடர்ந்து கொண்டு தான் இருக்கிறது. இது போன்ற படங்களைப் பார்க்கும் போதும், உழைப்பால் உயர்ந்தவர்கள் என்று ஒருசிலரை அடையாளம் காட்டி தன் முனைப்பு கட்டுரையாக எழுதுவதையெல்லாம் படித்த பிறகு, தான் கஷ்டப்பட்டு வந்ததை உணர்ந்த ஒருவன் அதே போல் கஷ்டப்படுபவர்களுக்கு எந்த ஒரு உதவியும் செய்யாமல் முடிந்த அளவுக்கு அவர்களை பிழிந்தே, சுரண்டியே தான் மேலும் மேலும் வளர்கிறான் என்பது மென்று விழுங்கக் கூடிய உண்மையாக இருக்கிறது.

ஒருமுறை அசோக் நகர் சரவண பவனுக்குச் சென்றேன். அங்கு சப்ளையராக பல சிறுவர்கள் இருந்தார்கள். இவர்களுக்கு 18 வயதிற்கும் குறைவாக இருக்கலாம் என்று நினைத்து ஒருவனிடம் கேட்டேன். 'தம்பி உனக்கு என்ன வயது ?' கொஞ்சம் யோசித்துவிட்டு 18 என்றான். 18 என்று சொல்ல அவ்வளவு யோசனையா ? என்று நினைக்கும் போதே அவன் பொய்தான் சொல்கிறான் என்று விளங்கியது.

பல ஐந்து மாடிகள் அண்ணாச்சி கடைகளில் வேலை செய்யும் சிறுவர்கள் 15 - 18 வயதிற்குள் இருப்பவர்களே மிகுதி என்று நினைக்கிறேன். 18 வயதிற்கும் மேல் அவனுக்கு விவரம் தெரிந்துவிடும், இது போன்ற கடைகள் பிழிந்து எடுக்கிறார்கள் என்று கண்டிபாக உணர்ந்தே ஓடிவிடுவார்கள்.

சிறுவர்களுக்கு வேலை கொடுப்பது சட்டபடி குற்றம் என்றாலும் அவர்களின் வயதைக் கூட்டிச் சொல்லச் சொல்லி எப்படியோ வேலையில் வைத்துக் கொள்கிறார்கள். சிறுவர்கள் வேலைக்கு வருவது வெறும் வறுமை தான் காரணம் என்பதைவிட சிறுவயதில் பீடி சுற்றி, வெடி சுற்றி அவர்கள் காசுகளைப் பார்ப்பதால் பிறகு படிப்பதற்கு அவர்களால் இயலாமல் போய் பதினைந்து வயதிலேயே ஐந்து மாடிக் கடைகளின் விறிந்த வலையில் விழுந்துவிடுகிறார்கள்.

திரைப் படம் என்பது நம் கண் முன் நடக்கும் காட்சியின் பதிப்பு என்பதாக அமைந்திருக்கும் மற்றொரு படமாக அங்காடித் தெரு மனதில் நிறந்திருக்கிறது. இது வெற்றிப்படமா தோல்வி படமா என்பதைவிட இது போன்ற படங்களின் மூலம் நடப்புகளை தமிழ் திரை பதிவு செய்துள்ளது என்று எதிர்காலத்தில் நினைவு கூறத்தக்கப்படம் என்று தான் சொல்லுவேன்.

திருநெல்வேலி வட்டார மொழியில் கைதேர்ந்தவர் என்பதால் ஜெயமோகனின் பேச்சுரை படத்திற்கு சிறப்பாகவே பொருந்துகின்றன. பாடல்கள் நன்றாக இருந்தாலும் பின்னனி இசை அவ்வளவு சிறப்பாக இல்லை.

வசந்தபாலன் மற்றொரு பாலா என்று தினமலரில் யாரோ ஒருவர் பின்னூட்டங்களில் குறிப்பிட்டு இருந்தார். எனக்கும் சரி என்றே தோன்றுகிறது.

வாழ்க்கைச் சூழலில் ஒன்றாக இருக்கும் நம்மில் ஒருவன் தான் நமக்கான படைப்பை உருவாக்க முடியும் என்பதை நிருபனம் செய்யும் மற்றும் ஒரு இயக்குனர் வசந்த பாலன்.

படத்தின் இயல்பான முடிவு, வாழ்ந்து காட்டுகிறேன் என்கிற நாயகனின் அறைகூவல்.....மற்ற படங்களில் என்றால் ஐந்து மாடி முதலாளிக்கு பதிலாக பத்து மாடிக்கு முதலாளியாக நாயகன் உயர்ந்ததாக காட்டுவார்கள். இங்கு அந்த வாழ்ந்து காட்டுதல் என்பது இவனிடம் வேலையை விட்டா வழியே இல்லையா ? இருக்கே...வேறொரு வேலை என்பதாக முடிகிறது. மேலும் மேலும் வாழ்க்கையில் உயர்வது என்பது மட்டுமே வாழ்க்கை என்று நம்ப வைக்கப்படும் திரைச் சூழலில் இயல்பாக தொடர்வதும் கூட வாழுதல் தான் என்று சொல்லப்படுகிறது. குள்ளமனிதன் - விலைமகள் மனைவி, கண் தெரியதா பெரியவரின் கடை, கட்டண கழிப்பிடம் நடத்தும் மற்றொரு வேலை அற்ற இளைஞன் என அதற்கேற்றபடியே கதையில் வரும் பிற பாத்திரங்களின் வாழ்க்கைச் சூழலும் கூட காட்டப்படுகிறது. நம்பிக்கையும், பொருளியல் சமூக உயர்வு மட்டுமே வாழ்க்கை அல்ல....பிரச்சனைகளில் இருந்து, விபத்திலிருந்து மீண்டு(ம்) தொடர்வது கூட வாழ்க்கை தான் எனச் சொல்லும் படத்தின் தகவல் (மெசேஜ்) ரொம்ப புடிச்சிருக்கு.

துவக்கத்தில் அதிர்ச்சியை ஏற்படுத்தும் சிறைக் கூடம் போன்ற உணவுக் கூட மற்றும் இரவு நேரக் காட்சிகள் படத்தில் பிற்பகுதியில் வேறு மாதிரி இயல்பாக காட்டப்படும் போது அவ்வளவு அதிர்ச்சி ஏற்படுத்தாதது திரைக்கதையின் சிறு தொய்வு.

கலைப்படம், கருத்துப் படம், சிறப்பான வசனங்கள் என்ற அளவில் அங்காடித் தெரு பல்பொருள் அங்காடி.