*****
23 / அக்/2009 ஐரோப்பிய சுற்றுலாவின் நிறைவு நாளில் இருந்தோம். அன்று முதன்மையானதும் நிறைவாகவும் பார்க்க வேண்டிய இடம் ஐரோப்பாவின் உச்சி என்று அழைக்கப்படும் Jungfraujoch எனப்படும் பனி மலைக்குச் சென்று வருவது தான் திட்டம், அதற்கான பயணச் சீட்டுகள் எல்லாம் ஆயத்தமாக இருந்தது. அன்று காலை 8 மணிக்கு எழுந்து, 9 மணிக்கு ஆயத்தமாகி, விடுதியில் கொடுக்கும் ரொட்டி, பழச்சாறு காலை உணவுகளை முடித்துக் கொண்டு 9.30 மணிக்கு விடுதியை விட்டுக் கிளம்பினோம், அந்த விடுதியில் பல மஞ்சள் இன ஆசியர்களும், ஒரு சில இந்திய இல்லத்தினரும் கூட தங்கி இருந்தனர்.
![](https://blogger.googleusercontent.com/img/b/R29vZ2xl/AVvXsEi8OC117I4ijtnXHBP4oaVa8kmKx9A3NbGFFtDF_2HmoXJ_OFc0g293gx6Jvab278c7YXWCdbwwrCHDslyN4lNfJDvv3F38DMQBzhMFVQRsmN5dPek9qb84HSsO6nSedzgniwVnew/s400/IMG_4373.jpg)
![](https://blogger.googleusercontent.com/img/b/R29vZ2xl/AVvXsEiCQwFUIvTlmj5DX9j6XKmOucXMSbCK38vMZgrqk0Mio6SLlBbQ81eVDqX8nQXeplTmybmNh9ZzMviWR3tmP6GWAiElNRkvFxHEfZIoTjjtAMlmBuUg5N1ZW8LJUgxjVs8DGUFP2Q/s400/IMG_4374.jpg)
![](https://blogger.googleusercontent.com/img/b/R29vZ2xl/AVvXsEjsacYEiXumGrpK7CmPhbtE7KGrMzy90i_vJetRnaYCBkfJzlmxyu2_KhKmYDnJFtXXqD8zWsO31YyfUz0jZeGbwjhCWX_wGTpnCdni0n4rLG-8YMr72GCurUrJT7ICEl90SXdvIg/s400/IMG_4370.jpg)
குளிர்காலம் தொடங்கப் போகும் பருவ மாற்றத்தை உணர்த்த வெளியே லேசான மழைத்தூரல் பெய்து கொண்டிருந்தது, குடையை எடுத்துக் கொண்டு Interlaken OST எனப்படும் கிழக்கு தொடர் வண்டி நிலையத்தை நடந்தே அடைந்தோம். செல்லும் வழியெங்கும் வண்ண இலைகளுடன் காட்சி கொடுத்த மரங்கள், அந்த ஊரும் மிகத் தூய்மையாகவும், குளிருமாக மிக இனிமையாக இருந்தது. சுற்றிலும் மலைகள், அந்த மலைகளில், சில மலைகள் தலையில் வெண் பனி அணிந்திருந்தன. மலைகளின் மீது உரசிக் கொண்டும் , தழுவியும் நின்றபடி மேகக் கூட்டங்கள் பார்க்க கண் கொள்ளாக் காட்சி.
சாலை ஓரத்தில் நாய்களுடன் சிலர் சென்று கொண்டு இருந்தனர். நாய்கள் சிறுநீர் கழிக்க குத்துக் கல்லுடன் தனி இடம் கூட சாலை ஓரத்தில் இருந்தது வேறெந்த நாட்டிலும் பார்க்காத ஒரு காட்சி.
![மறுநாள் எடுத்தப்படம்](https://blogger.googleusercontent.com/img/b/R29vZ2xl/AVvXsEhGpTp_OBENAaaNQYxG8LnCu4VeaEfkZPrQlRP7Y5XYfyMmCA9dmoud-aL05G_c0Hn8i6kqbmaZO5mJzUKcxdCEamboH3fske5xBzZukpM7k9ZQsMW01lqnAbyDVj5pIx-SJLakdw/s400/IMG_4644.jpg)
தொடர்வண்டி நிலையத்தில் விவரம் கேட்க மாறி மாறி மூன்று தொடர்வண்டிகள் மூலம் பயணிக்க வேண்டிய விவரம் சொல்லி, கூடவே தொடர்வண்டி புறப்படும் நேரம் தொடர்பான கையேடு ஒன்றையும், குறிப்புகளையும் கொடுத்தனர்.
![](https://blogger.googleusercontent.com/img/b/R29vZ2xl/AVvXsEjVR8Vf0U7SLHvVPn70ftD0kDv1Gih3n1D0LYSYDh9tZ-l6wbVIXfzoXD907flTB8u8t2dNLKVmuumR-_ahPTFYhBR6Ane6ZWnKKpvGiZ0tTAAazMTfQUGRo8UEwfVcVMWm6DFLLQ/s400/IMG_4375.jpg)
முதலில் பயணம் செய்யப் போகும் தொடர்வண்டி Interlaken லிருந்து Grinde Wald என்ற நிலையத்துக் செல்லும், அங்கிருந்து பேருந்து ஒன்றில் ஏறி 1 கிமி தொலைவில் இருக்கும் அடுத்த நிலையத்துக்கு மாறவேண்டும். ஒவ்வொரு 30 நிமிடத்துக்கும் ஒரு தொடர்வண்டி என அப்போது 10:30 மணிக்கு புறப்படும் Grindel Wald தொடர்வண்டி புறப்பட காத்திருந்தது, ஏறி உட்கார்ந்தோம். இரண்டு நிமிடத்தில் புறப்பட்டது. மேல் கீழ் என இரண்டு தளங்கள் இருந்தன. வேடிக்கைப் பார்க்க வசதியாக மேல் தளத்தில் உட்கார்ந்தோம். அகலமான கண்ணாடி சன்னல்கள் வழியாக நன்றாக பார்க்கும் படி அமைத்திருந்தார்கள். சுற்றிலும் சற்று தொலைவில் மரங்களுடன் கூடிய மலைகள், அருகே புல்வெளிகள் அதில் பசுமாடுகள், ஆடுகள் மேய்வது, சிற்றோடைகள் வழியெங்குமான காட்சிகளாக இருந்தன. அங்காங்கே பள்ளத்தாக்குகள் அதன் சரிவில் தனித்தனி வீடுகள் இருந்தன.
![](https://blogger.googleusercontent.com/img/b/R29vZ2xl/AVvXsEhNIVFSAdzxX7q6fB_rkmo0kgLuSkypGygGbFg34q9RCAKfxVlNL-szm4VaVZPkyHA_-xaWXyZ1uLr3PnejxaDrEPpn4pufRjSYbdZ1bAQLwmyF0QIPjXXZ-ZzN1oF7gH2Imt1b4Q/s400/IMG_4393.jpg)
![](https://blogger.googleusercontent.com/img/b/R29vZ2xl/AVvXsEjEu4dgaTL2J_wxOi0s4KqPS9kqdsmaQf_AHJER-kaGyMbsZPDoNOXy3UDSGYF6B2ilBykmwbGwtQygPACRn0k8L-XCYYsXFZCzhdhbp1YLGfExaxIQGgfbTi2niKTQSc27_toj-Q/s400/IMG_4389.jpg)
![](https://blogger.googleusercontent.com/img/b/R29vZ2xl/AVvXsEi8ag9riZCw4jMOrapQpvKJVL7qsPCY_NMxfYZ9J00GQtMVSflTuHUZrMYabG6cRPqGiTwFE20MQ27xs1rswwF2O1VH8DjfkagjrOJ6b1F_oy_Qht4nqV7GE7GJR4cBpLSmVzLApg/s400/IMG_4383.jpg)
![](https://blogger.googleusercontent.com/img/b/R29vZ2xl/AVvXsEj-c4T_-z0MN8ab9isnXd975g1QKy5JhJhSvuo9E65jWjQ-mHFch7U-HmkK-JsGK7HZn0nBmXif6Z-3P5m7faAKvTlFRiLjVyBOdv5Os4Pfgu51KUfZ3yAq_5DgHhRWVhGraVZc2A/s400/IMG_4398.jpg)
![](https://blogger.googleusercontent.com/img/b/R29vZ2xl/AVvXsEjyiA47Kbi36nOuiX3W-X_RBUBFASHgvDsJYJ3Vy8xQ9HI84FYFiQYzoqLRn2IIcPVZFWpgmbKzIPyzBy6JgMHbJM1AeIub7jnA2H0fzSUGtVkWbYwMjCazfnwSXhrH4SnAVjZiIA/s400/IMG_4399.jpg)
![](https://blogger.googleusercontent.com/img/b/R29vZ2xl/AVvXsEhbRMyGZWGhIE-QNGjqTgK7jkUpZIGmLQavucDhem2jESX0MtIbNxC73yzeAEcxLg2ROU9Qnn2E164S7-2l-KNgm-CLJmbELiDQ_35JGv6HyJbXecoDxNJdbKgAfSR5SaGwtN-r5w/s400/IMG_4397.jpg)
விரைவான, சற்று நீளமான தொடர்வண்டி தான் 35 நிமிட பயணத்தில் Grindel Wald அடைந்தோம். அங்கே அருகே பேருந்து நிற்கும் இடத்திற்கு பயணிகள் சென்றனர், அடுத்த தொடர்வண்டி இணைப்புகாக இயக்கப்படும் தனிப்பட்ட பேருந்து, அதில் ஒரு மூன்று நிமிடப் பயணம் Grund என்ற இடத்தில் இருந்து அடுத்து மேலே அழைத்துச் செல்லும் தொடர்வண்டி நிலையத்திற்குச் சென்றது, மூன்று பெட்டிகளுடன் தொடர்வண்டி அங்கே ஆயத்தமாக நிற்க அதில் ஏறினோம், புறப்பட்டது, இந்த முறை மலையில் தொடர்வண்டி மேலே ஏறுவது உணரும்படி இருப்புப் பாதைத் தடம் ஏற்றத்தில் செல்வது நன்கு
தெரிந்தது, அதே லேசான மழை இங்கும் தொடர்ந்து பெய்து கொண்டு தான் இருந்தது.
![](https://blogger.googleusercontent.com/img/b/R29vZ2xl/AVvXsEgHbtdvQdwMQZgcts-6tL1ykeK5Y6NOl4qTwyFHbXi2ou30yp7E9_uI5OYQLolicawE_qsNRL5sMwhEXGSRbXBgl2UTP6LwkpsdHKt_hVuNlx6yxc1WI10cZT_HoTHgQxUgmPz7NA/s400/IMG_4406.jpg)
![](https://blogger.googleusercontent.com/img/b/R29vZ2xl/AVvXsEhkYN2Sd7w3RUb9sWz6jSlZa2iMuXX3KsQsG8E1VZLgqGrcvjVwX6NE5ecdSvL7-M_hsS046zwApf1mp13PHic70oySQCdbZBPy3MGAIiPN65RgLnm_cLJcqHUwzzomHM1m8dLGBQ/s400/IMG_4410.jpg)
![](https://blogger.googleusercontent.com/img/b/R29vZ2xl/AVvXsEhE0MAm_Ed6fdl2kwf31hGsZXYDW5hntiI8yddoDx8jHVUSSkHMizfTzhv_LyD65qYoDyBnQYHj5R9cqGlya3lwJ0enHhvx6htsu_b5x7oZ0IaVDO2IfkV8oAINuhRy6kB7WUN-9w/s400/IMG_4411.jpg)
![](https://blogger.googleusercontent.com/img/b/R29vZ2xl/AVvXsEiEbSw-zZM_pGyRjpaADg_zGw8A_F8dlvIJB9pRqitJDsY4rqqq5zEQ1DWlYuVI96tTO1eG-AiTWRlNgHvlKn_7fiSWSEjr66PmBrGeTOjtVpd73itQbIXnSkzG5SZ9LUUTs-X-6Q/s400/IMG_4412.jpg)
![](https://blogger.googleusercontent.com/img/b/R29vZ2xl/AVvXsEjQwvR5-xyQBzYhGxi-zIrC7PGtkd5nNBW87cDU-4QDX4KLYyEZ6z8foQAPjsgyqNhqd_J6Ua1vBSmN-Sbg79IyH_eBh5cbl8fnFNYXxE-nGsxYW5H-9VJ9avAk0e12Fn0Jj-XqSA/s400/IMG_4413.jpg)
மலைச் சரிவில் நிறைய வீடுகள், மாடுகள் தெரிந்தன. சிறிது நேரப் பயணத்திற்கு பிற வீடுகள் இல்லை, குறைவான உயர மரங்களும், நடந்து மேலே செல்லுவோருக்கான வழிகளும், கம்பித் தடத்தில் தொங்கிக் கொண்டு செல்லும் கயிறுந்து (Rope Car) மேலும் கீழுமாக சென்று கொண்டிருந்தன. சுமார் 20 நிமிட பயணத்திற்கு பிறகு அங்கங்கே வெளியில் உறைபனித் திட்டுகள் காணப்பட்டன, தொலைவில் தெரிந்த மலைகள் யாவும் பனிப்படந்து காணப்பட்டன. அடுத்த ஐந்து நிமிடப் பயணத்தில் தொடர்வண்டிக்கு வெளியே எங்கும் பனி வெளிகள்...காணப்பட்டன, அங்கே ஒரு நிறுத்தம் அதன் பெயர் KL.Scheidegg அத்துடன் அந்த தொடர்வண்டியில் இருந்து மலை உச்சிக்கு செல்லும் மற்றொரு தொடர் வண்டிக்கு மாற வேண்டு அனைவரும் இறங்கிக் கொண்டனர்.
![](https://blogger.googleusercontent.com/img/b/R29vZ2xl/AVvXsEhqpnXgcLvMl77_HyyMxG7B4oYqdM3kUjckry7cMWW49Wbw4LSxDeoFL1u9GqNxosJD-pTzyd4q3BMmd73rzXxN1yO3bwQ2DJ2i8lZKljJaL-qgiRUy5n3GquZ4GHei97wYd8cSOw/s400/IMG_4423.jpg)
![](https://blogger.googleusercontent.com/img/b/R29vZ2xl/AVvXsEgxbHYM1z0mMz0OjE0nz2_i6Z9pmmCH3qdwuZ4fKP6K2NxEfEh768zUJqof5lbAgOjnkeT-sRUAk6-HRa_ucJpMZ9xAti76WY90YlhctdN7eQRYgOKcaQZPzrLgNVmt97lPXuZoyA/s400/IMG_4430.jpg)
அங்கு இறங்கியதும் இதுவரை தண்ணீர் துளிகாக மேலே விழுந்த மழைத்துளிகள் அந்த இடத்தில் பூப்போன்ற பனித் துளிச் சாரல்களாக கீழே விழுந்து கொண்டிருந்தன. அவை நம் உடல் மீது பட்டதும் உடல் சூட்டில் தண்ணீர் துளிகாக மாறிவிடுகிறது. இருப்புப் பாதைத் தவிர்த்து அனைத்து இடங்களும் உறைப் பனித்துளிகளால் மூடப்பட்டு இருந்தன. அதன் மீது நடக்க மென்மையாக இருந்தது, இரண்டு நிமிடம் அந்த பனிமழையில் நினைந்து மகிழ்ந்து அடுத்து மழை உச்சிக்குச் செல்லும் தொடர் வண்டியில் ஏறினோம். அதில் இரண்டே பெட்டிகள் இருந்தன.
![](https://blogger.googleusercontent.com/img/b/R29vZ2xl/AVvXsEhZrZFaT4BKme7BjukgrO7r5d-WLAnTwTDUQPZ26yARau5GbIEs4WEgzg2LMLommowdezR6OedFnfptln-ZOA5q9SKW__Rv2N9Ojbw_K3zdKJqV5kgEEEBRu4aCcGAlb-DH2RcciQ/s400/IMG_4422.jpg)
பெரிய பெரிய சர்கஸ் கூடாரங்கள் வெண்ணிற ஐஸ்கிரிமை உடலெங்கும் பூசிக் கொண்டது போன்று சுற்றிலும் மலைகள் அதன் சரிவில் வெண்ணிற பனிப் பள்ளத்தாக்குகள், உறைப் பனி தலையில் தாங்கி நின்று கொண்டு இருந்த மிகக் குறைந்த மரங்கள் தென்பட்டன, வெண்பனி மூடிய சிறிய சமவெளி மீது அந்த சிறிய தொடர் வண்டி ஊர்ந்து சென்றது., சுமார் ஒரு கிலோமீட்டர் தொலைவுக்கு திரைப்படங்களில் மட்டுமே பார்த்து வந்த க்காட்சிகள் கண்ணுக்கு முன் சாட்சியாக வந்து கொண்டு இருந்தன, அதன் பின் பனிமலையின் குடைந்த குகைப்பாதை வழியாக வண்டி சென்றது.
![](https://blogger.googleusercontent.com/img/b/R29vZ2xl/AVvXsEghXzd5BEWkRB0L3OGv_GUC37KuZJ4mrhO-MV4wOSWbApo2zvyEdu-AulEW6fP0wwNKeEDNB2pbtz9oVTxLeCTiSu048jgyFdTAJPdfP_DupZ71Y6RaBkMTftYTsCh4lxfXrKfZPQ/s400/IMG_4433.jpg)
![](https://blogger.googleusercontent.com/img/b/R29vZ2xl/AVvXsEhAdGF-20vvjKDvOu6Och06mTGhgeWqRMLBkG83UO9qrEdGuCDeYOkl4LfLMm10NNmqt9UrVprbc3vDnd1taVJ91JNTb8tKb6BW9Sz8Fh84Q9tZC5ZYHYSP7vX47I-UbBNPsFYkEg/s400/IMG_4439.jpg)
![](https://blogger.googleusercontent.com/img/b/R29vZ2xl/AVvXsEg3ZMK0GYaQWdLFElkgDD5hO2Q_MSzhyphenhyphen33MlOrm-SHiYm_I8XjUVwOxB2XzHB0tmgcBh6LLYX8HSTiOb69WBuDK7Z5nWBrsc3JXj5g0azZleSul_fC3mVt7LiAMa4uqQvD88aEumw/s400/IMG_4440.jpg)
குகைப்பாதையின் இடையிடையே பார்வையாளர்கள் மலைத் தொடரை ரசிப்பதற்காக நிறுத்தங்கள் வைத்திருந்தனர். அங்கே ஐந்து நிமிடங்கள் நின்றன, இப்படியாக Eigergletscher, Alpiglen, , Eismeer என்ற மலை ஏற்ற இடங்களில் நின்றது, அன்று கடும் பனிப்பொழிவு ஆகையால் அங்கே அமைந்திருந்த கண்ணாடி வழியாக பார்க்க முடியவில்லை, கண்ணாடிகளின் வெளிப்பக்கம் முழுவதுமே வெண்புகை போன்று பனிப் படர்ந்திருந்தால் அந்த உயரக் காட்சிகள் காணமுடியாமல் போனது.
![](https://blogger.googleusercontent.com/img/b/R29vZ2xl/AVvXsEgBQe6PdDZ_KKaqXpL0YLvYsIuAlCXqfu4_xU3k9_IZXNqxQ7ZabrHZhvXt-92Tse4Xl3c2zFuDlNofCIq9wz5JiSi5R7CjuuHk_bqRwWqqHmYaU9mDyitmuARIF9jqcpQyvb70NQ/s400/IMG_4455.jpg)
![](https://blogger.googleusercontent.com/img/b/R29vZ2xl/AVvXsEi65sRJvdMMziLLiiiryWDJdGYIeskYpTKcwbVXORMX3xiO28v0DYFlf39ttMmGAXTG6tuOsg3yCbHkDx9sazgnoVLnJYLxv78214RQftUs1nTWE8htNpYKZBlvH_oxVEKpL9pIpw/s400/IMG_4449.jpg)
![இணையப் படம்](https://blogger.googleusercontent.com/img/b/R29vZ2xl/AVvXsEg2PMbz6qX9iBkl_2b1ehLY44l4xvaJ9GZuTIUHcSv1p_IA1POjqg4jBh_41Uz-kyHiVoUCOND2MU_II8K2KLksf86-rHwspez1svt4-r9o9ijUN-rDIM_0EU0S4mK9cwwTK4OX8w/s400/Jungfraujoch.jpg)
(இணையத்தில் தேடி எடுத்தப் படம்)
அந்த இடம் முழுவதும் உச்சி மலையை குடைந்து அமைக்கப்பட்ட இடம், மேல் தளமாக பெரிய பார்வையாளர் கட்டிடம், அதில் நான்கு தளங்கள். மேல் தளத்திற்கு சென்றோம், அங்கே திறந்த வெளியில் நிற்பதற்கு பாதுகாப்பு கம்பிகளுடன் ஒரு தளம் அமைத்திருந்தார்கள், கதவை திறந்து கொண்டு அங்கு செல்ல.......லேசான பனிப்புயல் அதாவது கடுமையான காற்று.....பனித்துளிகளுடன் முகத்தில் அறையும் காற்று, நடுங்க வைக்கும் கடுமையான குளிர், ஒரு நிமிடம் அங்கு நின்றால் கைகள் விரைத்துப் போகும் அளவுக்கு கடும் குளிர். அங்கே நிற்க முடியவில்லை, இருந்தாலும் ஒரிரு முறைகள் உள்ளே சென்றுவிட்டு விட்டு அங்கு நின்று வந்தோம். வெளியே வெப்ப நிலை அளவு போட்டு இருந்தார்கள் - 8 டிகிரி.
![](https://blogger.googleusercontent.com/img/b/R29vZ2xl/AVvXsEgU2DXroCvxQVoCarf0bPxvp_8U40igVBWdT6cxUP2JiVBsma-NH2dKco63Hb6NsDN_RGOsDYs9Hhb6ZzXp3Gh2iboOks4RlivRCe1s_sP6ZfGqKCAb9ltODzQItd14zcrjCXN47A/s400/IMG_4460.jpg)
![](https://blogger.googleusercontent.com/img/b/R29vZ2xl/AVvXsEiRujgff9mjgfrefmPUUVmPpAgao4Bku0OjYD3v1AMce7f4-Eaown6dFX5UcUU-F_4RX5RQBrWoPMnyqjxE_gdfj6YgiTz1v6QalOjEnGO303MKy5uf80sru0H26BfqLumCyfDF3g/s400/IMG_4474.jpg)
![](https://blogger.googleusercontent.com/img/b/R29vZ2xl/AVvXsEiR4UXD2P9ZAN_dY30k4jvhLnzCpUd-KIcN_FO2D4VpwtwpyztuZvj8Z86TjyyWCCBi1J5RELoMsD5MNF_NdQU__uU_-QPcohoSVeiQlImIxO9P1FQPyMAL1gDG49BmQ033Tp5_jw/s400/IMG_4494.jpg)
![](https://blogger.googleusercontent.com/img/b/R29vZ2xl/AVvXsEhimRRm5QprMni5jwzBMbqcxporqmxfeeeTpe_WyeFO-IUzybuJcfQ2brYED7M3rj0m5WJQg7QpQ7Uk7V7u6hWPlLq79W9y1_nRG0xWvuFAlOocmYM8LMqBgGJutl0vsfmJWsrc5w/s400/IMG_4493.jpg)
![](https://blogger.googleusercontent.com/img/b/R29vZ2xl/AVvXsEgPt30t3Oxgl0SnkNjjyvD1PiBOUEoHvf29A3kpfhvBlo_YeLL4ezN8mI0Ha4niV1dmLIBv5Au75JpJn-PSXlAvnNN0ZNVlotCVsoxBLmW36sbS59oTsmxe3FrvezjK6uz2ObJmzQ/s400/IMG_4458.jpg)
அடுத்த தளத்தில் ஐஸ் பேலஸ் எனப்படும் பனி மாளிகை அமைக்கப்பட்டு இருந்தது, ஒரே சமயத்தில் இருவர் நடந்து போகும் அளவுக்கு குறுகலாக குகை போன்ற நுழைவாயில், அதனுள் பல இடங்களில் காட்சியாக வலப்பக்கமும் இடப்பக்கமும் பனிச் சிற்பங்கள் செய்து வைத்திருந்தனர்.
![](https://blogger.googleusercontent.com/img/b/R29vZ2xl/AVvXsEgQrHG4G02mnYOxMWFB2m-xCGtwFofLsj37EmmO0YdSxNhv653xPn1Rjyqdh73CEACI8NHKqmnNFWsyBnGIFvg3hUU003P0hj169LMlTM_47i-lBpw6L-lxV_7QPSIAsz01jh518w/s400/IMG_4477.jpg)
![](https://blogger.googleusercontent.com/img/b/R29vZ2xl/AVvXsEhQsq-ffV0LsmOVoWAdO-9pb9YQ_JYLCXagyAFuIfbFu4x7dtgvHR36TJV-5-gzVCY73Rxh9RWWVO626ORMll7f44b5L8COYpEcQVqT9FBCzmNLfI6n3fAkaqErsNqBMTZACnzE-Q/s400/IMG_4491.jpg)
![](https://blogger.googleusercontent.com/img/b/R29vZ2xl/AVvXsEgSqknKFJTmRaXR362972LkWrZBse4BQGZYvBNGX2ih784fRBk_0kdbWVxHCV14g9NKxS2GQVCC8czlQQsI45oUdwG07s6onf6nB1XvIQkOHZ1iqkOqukauAPvd7sJIi522Q_xKPQ/s400/IMG_4490.jpg)
![](https://blogger.googleusercontent.com/img/b/R29vZ2xl/AVvXsEhdqAZ1ZpvvX02otm1SjIyObBVvhkh1z7e03JJfvJDztkd3lMkhRvc9nuoM2WPS8GMDU_Jt3WNLA4XA4A6gRg6kuPqG92x61Xi10UNV4JENugTsSxId7j0NNvNREKRPDR9yRO6ang/s400/IMG_4487.jpg)
![](https://blogger.googleusercontent.com/img/b/R29vZ2xl/AVvXsEg2u00guocWDIXQsMOLLFp2hsaigM9_kcIjcT0XYT2VjvT5qYAn1IV5Tch9YJI0EGbdfMrHj2oZb5K5gdi4J07vLbOVsjylJs3o2l1ticbz4O87pTzisyF5T_fmulZ-c_vWtKmmVA/s400/IMG_4483.jpg)
10 நிமிடம் ப்ரீசருள் இருந்தது போன்று இருந்தது அங்கிருந்து திரும்பிய பிறகு. போகும் போதே தேவையான அளவுக்கு ஒன்றுக்கும் மேற்பட்ட குளிராடைகள் அணிந்திருந்தால் அந்த கடும்குளிரை எதிர்கொண்டோம்.
அங்கே பிற தளங்களில் கண்ணாடி சன்னல் அமைக்கப்பட்டு வெளிக்காட்சிகள் தெரிந்தன. சுற்றுலா பொருள் விற்கும் கடைகளும், பானங்கள், உணவுகள் விற்கும் கடைகளும், ஒரு உணவு விடுதியும் இருந்தன, இரண்டு தளங்களில் கழிவரை வசதிகள் இருந்தன.
ஐரோப்பாவின் மலை உச்சியான அந்த இடத்தில் சுமார் 1 மணி நேரம் சுற்றிப் பார்த்து திரும்பினோம்.
![](https://blogger.googleusercontent.com/img/b/R29vZ2xl/AVvXsEhANUqA9dNk1DEvv2U54iGB3hujLlkSK_m6Ub5HtNfkRtsc6Hu8mFbudDZwrqMN720L0jAvaZGcWBFUTviWl4sX1GhrlTd2jQ9K7lmJLFDjM_Y5vT0J1bXvZrcJQY2LRcCWn5nVeA/s400/IMG_4501.jpg)
![](https://blogger.googleusercontent.com/img/b/R29vZ2xl/AVvXsEjfd8ZntmQ6TGXhgc_eVcrEGUOhKXCeSFTWhOPzSFjy0Nn4TIOQ288-wZGfU7Tm-RxEdVOp1TE_FgldlGWpS-4dOaZdK-TSYVGsNXM6TtvFBjEiACCP9Tu4viDlsmRvxgBsf9SEyQ/s400/IMG_4506.jpg)
![](https://blogger.googleusercontent.com/img/b/R29vZ2xl/AVvXsEgvdKla1wQGOCjO3k8hXGH5fFTq-_FwwXsS6kRi2gOU9o7rhpKXPCi3uBDFbMhw1KzeKyxBVxld05xpp8-lArqDYQjEFXjM_cwJwWMx8JJQUZ68HPsjamz9OTgzu-d_5ebHyyYnIQ/s400/IMG_4511.jpg)
வரும் வழியில் உறைபனி முடியும் தொடர் வண்டி மாறும் இடத்தில் சிறிது நேரம் பனிபொழிவில் பனியை உருண்டை உருட்டி வீசி எறிந்து விளையாடி கழித்துவிட்டு, பிறகு மாறுபட்ட வழி இருந்தும் சென்ற வழியிலேயே திரும்பினோம், மாற்று வழியை விட 30 நிமிடம் விரைவாக அழைத்துச் சென்றுவிடும் என்கிற தகவல் தெரிந்தது. மேலும் மலைக்காட்சிகள் இரண்டிலும் பெரிய மாறுதல் இருக்காது என்பதால் விரைவாக திரும்பும் வழியைத் தேர்ந்தெடுத்தோம்.
![](https://blogger.googleusercontent.com/img/b/R29vZ2xl/AVvXsEgsbu2lEgrAJgBFV_Sc_ST78vmSfkANhCAXspmPAlbxzZuIdOs8IY_Hd-5L6ordS59PUV8O4xW9wbzmrahV0cS-Ez9cmOzYt9dajT8yZNVXcqvQX12P-hLZPyzT7Pe48Gc7WVTAFg/s400/IMG_4515.jpg)
![](https://blogger.googleusercontent.com/img/b/R29vZ2xl/AVvXsEiJerGO0aCMExtXgt5uDuQesqgBrfA9f27eHm0UrZHhyphenhyphenuYLDj7dlViaym5sJASeDcn3Xzqn9z9zx066IovISmjP9KU_vvgxdMarCmPoWrtpZtURVXlZowLo-96ArDLVB7wCJpLOYA/s400/IMG_4523.jpg)
![](https://blogger.googleusercontent.com/img/b/R29vZ2xl/AVvXsEg3gqSLYtSvUwZvY1j9R9o82CycMLkpbXfsipt7PBe-v9poc1oaDLgFAUDSDlbutYGPAKVliBaE7mZMqjqVK8d0AAcsQM_iTpIONVNEH34nuE5K5wyeqSlM7z0jdymRxgHRvTUQhg/s400/IMG_4542.jpg)
![](https://blogger.googleusercontent.com/img/b/R29vZ2xl/AVvXsEjZuf3B5KOjPXUJOCZW6adtW4o-SnweYz4vJtlzjVAUgYYYGAPDAlEsfO_RLqG7YOKcV-D66LnWUoCAFM8y31oMSQj3JDdLbKT4lBQYVI1KQe22MX7qfu1QiwqnA3EWhlVv8-3_hA/s400/IMG_4541.jpg)
![](https://blogger.googleusercontent.com/img/b/R29vZ2xl/AVvXsEiq74eVRR0KB_tSpLCNAWTEtR08BeFMVyilt2Vz9bpyUhfaKGMJH7uHCQMEnE0Sni3BMB3obLkW2nOIsHmxbks1E_HVi17YjCxRdGYD-q8LqQUkkcJ4BwpYNlpKWW4yR-1wWQQOcw/s400/IMG_4525.jpg)
![](https://blogger.googleusercontent.com/img/b/R29vZ2xl/AVvXsEhW0d8iuFb4yURAOiiDkTZojwTgulLapQaaT2mErVVad-h750Hwm_cjO245pg6xfV4b5GaHHTqDJMdnDZfkWebTvEniLjQyKZNUWN9XOiAZVeQC9lrtthaWhM-m94s8Zv7ryf_mIg/s400/IMG_4544.jpg)
Interlaken OST திரும்ப மலை 6 ஆகி இருந்தது. அந்த ஊரை கொஞ்சம் நடந்தே சுற்றினோம்.
![](https://blogger.googleusercontent.com/img/b/R29vZ2xl/AVvXsEj8AM6mIjeIdv9beelo5xRsqzfgNN8p_L9sRFYtBsMLKQ1a7-Bm7-6kc9-t9Oo3B-kERUl5vEsleOW-1wJFkh-fEamp_3TXd6MbKAVOziyBDyrJZiTxyyTBWJ7hLcd0y9b5ttcXhw/s400/IMG_4547.jpg)
![](https://blogger.googleusercontent.com/img/b/R29vZ2xl/AVvXsEj6uiwoD1f_wG3V0EajHIGcTOFSbgU5MQTLtr_nQSr5oS3a5MexDcpawjuhy6qWPRJ1tr3yC1XToqA3zOXVaMA8Zuq3wcNxkyJBZskYfADJQ_yZCEH8DPvjo6J9FEKPKZClyWBtJw/s400/IMG_4549.jpg)
பிறகு விடுதிக்குச் சென்று சற்று ஓய்வெடுத்துவிட்டு, இரவு உணவுக்கு அங்கே சற்று தொலைவில் Interlaken West நிலையத்திற்கு அருகே இருந்த தாஜ் இந்திய உணவகத்திற்குச் சென்று இரவு உணவை முடித்தோம். மூன்று பேருக்கும் சேர்த்து இரவு உணவாக ஒரு புலாவ், நான்கு வட இந்திய ரொட்டி(Nan), உருளை கிழங்குடன் காலிப்ளவர் மசாலா 40 ஸ்விஸ் ப்ராங்க், மிகுதிதான். ஆனால் அந்த ஊரில் இந்திய உணவு கிடைப்பதற்கு கொடுக்கலாம். பனிப் பொழிவு மழை பெய்யும் போது தான் ஏற்படுகிறது, அன்று மழை தூறியதால் அதே போன்ற பருவ நிலையால் மலை உச்சியிலும் மழைக்குக்கு பதிலாக பனிப் பூப்பொழிவாக இருந்தது அன்றைய பருவ நிலையால் ஏற்பட்ட ஒன்று, இல்லை என்றால் உறைபனியை மட்டும் பார்த்துவிட்டு திரும்பி இருப்போம். ஆங்கிலத் திரைப்படத்தில் மட்டுமே பார்த்து வந்த பனித் தூறல், பனிப்பூக்கள் கண்களில் காட்சியாகவும், உடலிலும் பட்டதும் மகிழ்வானதொரு துய்பு.
பயணக்குறிப்புகள் : Jungfraujoch பனி மலைக்கு தொடர்வண்டி மற்றும் கயிறுந்து (Rope Car) தடவழிகள் இருக்கின்றன, நமக்கு விருப்பமானவற்றில் செல்லலாம். கடும் குளிர்காலத்தில் செல்லும் போது தேவையான குளிராடைகள், கையுறைகள், பொருத்தமான காலணிகள் (ஷூ) அணிந்து செல்ல வேண்டும். Interlaken லிருந்து சென்று, ஒரு மணி நேரம் பார்த்துவிட்டு, திரும்ப 6 மணி நேரங்கள் தான் ஆகிறது, Interlaken -ல் மற்ற விடுமுறை தளங்களைவிட குறைவான வாடகைக்கு விடுதிகள் கிடைக்கும். மற்ற கடைகளும், இந்திய உணவகங்களும் அமைந்திருக்கின்றன. Jungfraujoch மலை உச்சியில் உணவு மற்றும் சுற்றுலா நினைவு பொருள்கள் விலை மிகுதி, முடிந்த வரை உணவு பொருள்களையும் குடிநீர் ஆகியவற்றை உடன் எடுத்துச் செல்வது செலவைக் குறைக்கும்.
மலை உச்சியில் பனிச்சறுக்கு, நாய்கள் இழுத்துச் செல்லும் வண்டியில் மூன்று நிமிடப் பயணம் போன்ற விளையாட்டுகள் இருக்கின்றன. இருந்தும் பருவ நிலையைப் பொருட்டே இவைகள் நடக்கும், நாங்கள் சென்ற அன்று மோசமான பருவ நிலை. விளையாட்டுகள் எதுவும் நடைபெற வில்லை.
![](https://blogger.googleusercontent.com/img/b/R29vZ2xl/AVvXsEha2bajB83ldUT-RcNo40SJYcPXulyvQ8VcVgyVKN1cZCjnjrFCCg4_M-CQC_22m1aXmXMoPvXqXoFs5Wdog3gkG1JbMVBmcJZEOwJwJRTNWLQO49UzFxYR6p8iDSPGuS_GiktE7Q/s400/jungfraujoch_map.jpg)
(படத்தின் மீது அழுத்து பெரிதாகப் பார்க்கவும்)
![](https://blogger.googleusercontent.com/img/b/R29vZ2xl/AVvXsEheQARVfXe_KLPp_rnXdsRP_O1uKpAFgf1dLJVqVSbsmNLcJdQaWW69GBc0rjLxz04c-P2y5_X1vs2czOhR0DsovgFwG7qTev-tK99bQ5IosOJIOkw71s4xSqJSy9Lcy3hKQhNe-g/s400/husky_sledge.jpg)
![](https://blogger.googleusercontent.com/img/b/R29vZ2xl/AVvXsEgZkbhAYaKJ2QnyYviDsam-SobgupmbSZy79rP8ZmySQ2tAUxvQxoazA9Ql0RDxOMnzz67TSa189m5852AJ9xkqEAo7X2RgwmDQu8FVSWVojcgr3AZoCdHREp5yxnTnXNLlQvTc8A/s400/SwissCow.Alpine.jpg)
கடைசி மூன்றும் இணையத்தில் இருந்து எடுத்தப் படங்கள்)
நாய்களுக்கு ஏன் மூச்சா போகக் கூட இட வசதி செய்து தருகிறார்கள் என்பது இப்பதான் புரிகிறது :) பயணிகளை ஈர்பதில் அவைகளும், மாடுகளும் ஸ்விசர்லாந்தில் தன்னுடைய பங்கையாற்றுகின்றன :) மாட்டு மணி மாதிரிகள் பயணிகள் விரும்பி வாங்கிச் செல்லும் பயண நினைவுப் பொருள்களில் ஒன்றாக இருக்கிறது.
இங்கே எழுதி இருப்பவை அனைத்தும் சென்ற வாரம் இதே வெள்ளிக் கிழமை முழுவதும் நடந்த நிகழ்வு, எழுதும் போதே ... மீண்டும் அங்கெல்லாம் செல்ல மனம் ஏங்குகிறது.