யாதும் நாடே யாவரும் பாரீர் - 1

எந்த ஒரு நாட்டிலும் பெரும்பாண்மை இனம் என்று ஒன்று உண்டு, அந்த நாட்டை உருவாக்கியவர்கள் என்கிற முறையில் அவர்களது பண்பாடும், மொழியும் அங்கு ஆளுமை பெற்றிருக்கும், (இலங்கை, இஸ்ரேல் தவிர்த்து)நாடுகள் தோறும் சுருக்கமான வரலாறு இவைதான். பெரும்பாண்மை மக்கள் என்பதைத் தாண்டி அந்தந்த நாடுகளில் பிற இன மக்கள் தொழில் தொடர்பிலும், அவர்களது வாரிசுகள் பிறப்பின் அடிப்படையிலும் அங்கே வசிக்கக் கூடும். நாடுகளின் எல்லைகளை திறந்துவிட்டால் அனைத்தும் ஒரே பூமியின் ஒரே நிலப்பரப்பு தான், எல்லைகள் அந்நாடுகளின் இயற்கை வளம், அம்மக்களின் உழைப்பு ஆகியவையற்றை உள்ளடக்கி உருவா(க்)கி இருப்பதால் அனைவருக்கும் திறந்துவிடுவதென்பது நடைமுறையில் இயலாத ஒன்று, ஒருவரின் உழைப்பை உழைக்காமல் இருக்கும் பிறர் பகிர்வது போன்றது எனவே தான் பல இனம் சேர்ந்து உருவாகிய நாடுகளுக்கும் எல்லைக் கோடுகளும் சட்டதிட்டங்களும் தனித்தனியாகவே இருக்கின்றன.

*****

ஆசிய நாடுகள் தவிர்த்து மனைவியின் பணித் தொடர்பில் சுவிஸ்சர்லாந்து சென்றுவரும் வாய்ப்புக் கிடைத்ததால், கூடவே ஐரோப்பிய நாடுகள் சிலவற்றிற்கு சுற்றுலா செல்லும் வாய்ப்பை ஏற்படுத்திக் கொண்டு, இங்கிலாந்து, பிரான்ஸ் மற்றும் சுவிச்சர்லாந்து செல்வது என்று இல்லத்தினருடன் முடிவு செய்தோம். 'இந்தியன் என்று சொல்லடா எங்கும் பெருமை இல்லைடா' என்கிற நிலமையில், அதாவது நம்ம அசோக சின்னம் பொறிக்கப்பட்ட கருப்பு வண்ண அட்டை பாஸ்போர்ட்டுக்கு எந்த நாட்டிலும் கதவு திறந்து வைப்பதில்லை. சிங்கை மலேசிய போன்ற நாடுகளின் பாஸ்போர்டுகள் நுழைவு அனுமதி (விசா) இல்லாமல் மூன்று மாதம் கூட தங்கும் அனுமதி பல நாடுகள் தருகிறது, இருக்கிறது. நம் இந்திய பாஸ்போர்ட் தெற்காசிய நாடுகள் தவிர்த்து எங்கும் நுழைவு அனுமதி இன்றி செல்லமுடியாது. இந்திய அரசியல்வாதிகள் டிப்ளமோட் என்னும் தூதரக சிறப்பு பாஸ்போர்ட் வைத்திருப்பார்கள் அவர்களுக்கு நுழைவு அனுமதி கிடைப்பதும் எளிது. நம் பாஸ்போர்டுக்கெல்லாம் நுழைவு அனுமதி வாங்க நிறைய நடைமுறைகள் பின்பற்ற வேண்டி இருக்கிறது. நம் வெளி உறவுத்துறை ரொம்ப பலவீனமானது என்பதை நாம் பிற நாட்டுக்கு நுழைவு அனுமதி பெற முயற்சிக்கும் போது தான் தெரியும். நுழைவு அனுமதிக்காக ஒவ்வொரு தூதரகத்திலும் ஏறி இறங்குவதும் அதற்காக விடுப்பு எடுத்து நேரங்களை வீனாக்குவதும் பெரும் எரிச்சல்.

இந்திய பாஸ்போர்ட் வைத்திருப்பவர்கள் ஐரோப்பிய நாடுகளுக்கு சுற்றுலா செல்ல ஆவணங்களாக அவர்கள் கேட்பது

1. குறைந்தது ஆறுமாதத்திற்குள் முடிவுறாத கடவு புத்தகம் (passport should be valid and not expired within 6 month)
2. கடந்த மூன்று மாத வங்கி வரவு செலவு கணக்கு (Last 3 months bank Staments with Transaction details)
3. உறுதிப்படுத்தப்பட்ட பயணச் சீட்டு (Confirmed Air ticket)
4. தங்கப் போகும் விடுதியின் முன்பதிவு ஆவணம் (Hotel Booking details)
5. தங்கும் நாட்களுக்கான பயண காப்பீடு (Travel insurance)
6. திருமணம் ஆனவர்கள் இல்லத்தினருடன் சென்றால் திருமண சான்றிதழ்
7. குழந்தைகளின் பிறப்பு சான்றிதழ் மற்றும் பள்ளி விடுமுறை கொடுத்ததன் ஒப்பம்
8. அலுவலக விடுமுறை ஒப்பம் பெற்ற சான்றிதழ் (vacation approval letter from employer)
9. பயணச் செலவுக்கான கையிருப்பு விவரம்
10. விசா கட்டணம் 160 வெள்ளி (for One passport)

இந்த பட்டியலில் இருப்பது அனைத்தும் இருந்தால் தான் நுழைவு அனுமதி தருவார்கள். ஆங்கில நாடுகளுக்கான (united kingdom) விசாவிற்கும், ஐரோப்பிய ஒன்றிய நாடுகளின் விசாவிற்கும் (schengen visa ) ஒரே மாதிரியான விசா பெரும் நடைமுறைதான். UK விசா வாங்கினால் இங்கிலாந்து, வேல்ஸ், ஐயர்லாந்து, ஸ்காட்லாந்து ஆகிய நாடுகளுக்குச் செல்ல முடியும், ஆறுமாத விசா தருகிறார்கள். ஐரோப்பிய நாடுகளுக்கான விசா எத்தனை நாள் அங்கு இருக்கிறோமோ பயணச் சீட்டு விவரப்படி அந்த தேதிகளுக்கு மட்டுமே தருவார்கள். இவ்வளவு விவரங்களும் கொடுத்து விசா வாங்கியாகிவிட்டது. போறது தான் போறோம், கொஞ்சம் கூடுதல் செலவானாலும் பரவாயில்லை வேறு ஆடம்பர செலவுகளை, ஷாப்பிங் போன்றவற்றைக் குறைத்துக் கொள்வோம் என்று, அன்மைய புதிய வரவான 700 பேர் வரை அமர்ந்து செல்லக் கூடிய A380 விமானத்தில் செல்வதற்கு பயணச் சீட்டும் வாங்கிவிட்டோம்.

மகளுக்கு மாதந்திர தேர்வு அதனால் மனைவியுடன் சேர்ந்து கிளம்ப முடியாத சூழலில் மனைவியை முன்பே அனுப்பிவிட்டு நானும் மகளும் ஐந்து நாட்கள் கழித்து திட்டமிட்ட படி இலண்டன் செல்லும் A380 யில் கடந்த அக்டோபர் 16 ஆம் தேதி நன்பகல் 12:40 மணிக்கு அமர்ந்தோம், அதற்கு முந்தைய சிறு குழப்பமாக பயணம் செய்யும் விமானத்தின் நுழைவாயில் எண்ணை சரியாக படிக்காததால்,
போடிங் பாஸையும் சரியாக பார்க்கமல், எதோ ஒரு குழப்பத்தில் வேறொரு நுழைவாயிலுக்கு சென்று அங்கு அறிவுறுத்தலின் படி காத்திருந்துவிட்டு, விமானம் புறப்படும் ஐந்து நிமிடத்திற்கு முன்பு எதற்கும் உதவி/தகவல் மையத்தில் கேட்கலாம் என்று சென்று கேட்டுக் கொண்டிருக்கும் போதே பெயரைச் சொல்லி மூன்றாம் நிலையம் (terminal three) முழுவதும் அறிவிப்பு கேட்க, பதறி அடித்து நுழைவாயில் நோக்கி நடக்கும் போது, 'you are the 2 indian passengers ?, Sir, do you know time of your boarding ?' என்ற மிக மென்மையான கடிந்து கொண்ட கேள்வியுடன், எங்களது போர்டிங்க் பாஸை சரிபார்த்து, அங்கே உள்ளுக்குள் விரைவாக செல்லும் பேட்ரி காரில் ஏற்றிக் கொண்டு விமானம் நுழைவு பகுதிக்கு அழைத்துச் சென்றார்கள்.

என்னைப் போன்ற நடுத்தரவர்க்கத்தில் பிறந்து, வளர்ந்து படித்தவர்களுக்கு வெளிநாட்டு வாழ்க்கையும், வேலையும் தற்பொழுது மிகவும் இயல்பான ஒன்று என்றாலும் படிக்கிற காலத்தில், சிறுவனாக இருந்த காலத்திலும், ஏழ்மையின் பிடியில் வளர்ந்த இல்லச் சூழலில் முற்றிலும் கற்பனையில் கூட நினைத்துப் பார்க்க முடியாத பயணம் தான் ஐரோப்பிய நாடுகளுக்குச் சுற்றுலாவிற்காகச் செல்வது என்பதை விமானத்தின் இருக்கையில் அமர்ந்திருந்த போது நினைக்காமல் இருக்க முடியவில்லை. இலண்டனில் குளிர் தொடங்கிவிட்டதால், சுற்றுலா செல்வோரின் எண்ணிக்கை குறைந்து, 50 விழுக்காடு இருக்கைகளே நிறைந்திருந்தது. பிற காரணங்களுக்காக ஐந்து நிமிடம் தாமதமாக விமானம் புறப்பட்டது. நேரடியாக சிங்கப்பூரிலிருந்து இலண்டன் ஹீத்ரூ மொத்தம் 13+ மணி நேரப் பயணம், பயணிகள் விமானங்களில் மிகப் பெரியதும், இரு தளங்கள் கொண்டதும், மிகுதியான இருக்கைகளும் கொண்ட விமானம், விமானப் பணிப்பெண்களின் கனிவான கவனிப்பு என பயணம் தொடர்ந்தது, இந்துமா கடலைக் கடந்து, இந்தியாவின் மீது ஒரிசா பகுதியில் நுழைந்து ஆப்கானிஸ்தான், ரஷ்யா எல்லை, கருங்கடல், ஐரோப்பிய நாடுகள் ஆகிவற்றை கடந்து இலண்டனை அடையும் போது மாலை சரியாக 7 ஆகி இருந்தது. பயணப்பதிவின் போதே இந்திய சைவ உணவு என்று குறிப்பிட்டு இருந்ததால் சைவ உணவு கிடைத்தது என்றாலும் இருமுறை உணவு நேரத்திற்கு அதே உணவைத்தான் திரும்பவும் கொடுத்தார்கள்.

பூமி சுற்றும் திசைக்கு எதிர் பயணம், அன்று பகல் 1 மணி வரை ஏழு மணி நேரப் பகல், அதைத்தொடர்ந்து 13+ மணி நேரப் பகல் பயணம், மொத்தமாக எனக்கு அன்று கிடைத்த பகல் 7 + 13 = 20 மணி நேரம். நீண்ட (நேர) பயணத்தில் தொடர்ந்து 20 மணி நேரம் சூரிய வெளிச்சத்தைப் பார்ப்பது கூட வியப்பு தானே. இலண்டன் விமான நிலையம் சிங்கப்பூர் அளவுக்கு அழகும், வசதிகளோ இல்லை. பெட்டி வைத்து இழுக்கும் தள்ளும் சிறு வண்டி (Trolly) கூட இழுக்கும் போது 'கிரீச்....கிரீச்' சத்தமிட்டது. சாலை போக்குவரத்து நெருக்கடியில் சிக்கிய உறவினர் இல்லத்தினருடன் என் மனைவியும் வந்து அழைத்துச் செல்ல சற்று கால தாமதம் ஆகியதால், மகளை மக்கள் நடமாட்டம் உள்ள வெளியேறும் வாயில் அருகில் பாதுகாப்பாக உட்கார வைத்துவிட்டு, அருகிலேயே இருக்கும் வெளியோறும் வழியில், விமான நிலையத்தை விட்டு வெளியே வந்து நின்றேன்...பழக்கமில்லாத கடும் குளிர் 8 டிகிரி... நான்கு அடி நடக்கும் போதே உடலெங்கும் நடுக்கியது.

தொடரும்...

பகுதி 2 (இலண்டனில் தீபாவளி, அரண்மனை)
பகுதி 3 (இலண்டன் மெழுகு அருங்காட்சியகம்)
பகுதி 4 (இலண்டன் கடற்கரை)
பகுதி 5 (பாரிஸ் - ஈபிள் கோபுரம்)
பகுதி 6 (பாரிஸ் - டிஸ்னி பொழுது போக்கு பூங்கா)
பகுதி 7 (பாரிஸ் - அருங்காட்சியகம்)
பகுதி 8 (சுவிஸ் - ஐரோப்பாவின் உயரமான இடம்)
பகுதி 9 யாதும் நாடே யாவரும் பாரீர் (Swiss, Singapore And Expenses) - 9