கலவை 01/செப்/2009 !

நாடகமெல்லாம் கண்டேன் தமிழக அரங்கிலே...... நேற்று இல.கணேசன் தமிழக முதல்வரை சந்தித்தாராம், அது பற்றிய முழுவெவரம் தெரியவில்லை. அப்பறம் கர்நாடக பிஜேபி துணையுடன் வெகு சிறப்பாக திருவள்ளுவர் சிலையைத் திறந்தாச்சு. இதையெல்லாம் வைத்துப் பார்க்கும் போது காங் - திமுக உறவில் அரிப்பு ஏற்பட்டு இருக்கு, கொஞ்சம் கொஞ்சமாக சொறிந்துவிட்டுக் கொண்டு இரத்தமாகி விரிசல் ஆகிவிடும் சூழலுக்கு வளர்ந்து கொண்டு செல்லும் என்பதாக ஆருடம் அமைகிறது. தமிழகத்தில் காமராஜர் ஆட்சின்னு கனவு கண்டுப்பாத்தாங்க, அது கூறு அற்றது என்பதால் ஆட்சியில் பங்கு என்று சொல்லிப் பார்த்தார்கள், மயிலே மயிலே என்றால் இறகு போடாமல் திமுக விட்டையை மட்டும் போடுவதால் தமிழக காங்கிரசாருக்கு ஏகக் கடுப்பு ஏற்பட்டு இருப்பது தெரிகிறது. அது தவிர்த்து மத்தியில் திமுக ஆதரவு இல்லாமலேயே இனி ஆட்சியை தொடர முடியும் என்ற நிலையில் திமுகவிற்கு மத்திய அமைச்சர்கள் பதவி கொடுத்தது கூட தேவையற்ற சுமையாகவே கருதுகிறார்கள், இராஜிவ் காந்தி மகன் திருவாளர் ராகுல் வட இந்தியாவில் நல்லா செயல்படுகிறாராம், அவரது பார்வை இப்ப தமிழகம் பக்கம் பட்டு இருக்கிறதாம். (இப்ப தான் அவங்க குடும்பம் இலங்கையிலிருந்து தமிழகம் பக்கம் பார்வையை திருப்புது) கேப்டனை கூட்டு சேர்த்துக் கொண்டு காங்கிரசு தலைமை கூட்டணி வருகிற சட்டமன்ற தேர்தலை தனித்து சந்திக்கும் முடிவில் காங் இருக்கிறதாம். மயிரைக் கட்டி மலையை இழுப்போம்....வந்தால் மலை போனால் மயிர் என்பதாக தமிழக காங்கிரசார் தெம்புடன் வலம் வருகிறார்களாம். இந்த ஆருடங்கள் கிட்டதட்ட பலிக்கும் உறுதி என்ற நிலையில் தான் திமுக - பிஜேபி நெருங்கி வருவதாக மற்றொரு ஆருடம் சொல்கிறது. காங் - கை திட்டுவதற்காகவே திமுகவினர் திடீர் ஈழ ஆதரவாளர் ஆகும் நாடக வைபவம் இனி(தே) தொடங்கும்.

*****

முடித்திருத்தும் இலவச சேவை : பதிவர், நண்பர், மதுரைவாழ் பெரியவர் திரு கிருஷ்ண மூர்த்தி ஐயா அளித்த தகவல் ஒன்று அதை அப்படியே தருகிறேன்.

மாண்புமிகு மருத்துவச் சமூகத்தைப் பத்திக் கொஞ்சம் மனம் நெகிழ வைக்கும் பதிவு:

இன்று காலை ஜெயா செய்திகளில் ஒரு நெகிழ்ச்சியுற வைத்த செய்தித் தொகுப்பு.

சேலத்தில் ஐயனார் என்ற ஒரு முதிய முடிதிருத்தும் தொழிலாளி. இவர் மாதம் ஒருமுறை சேலத்திலுள்ள ஆதரவற்றோர் மற்றும் முதியோர் இல்லங்களுக்குச் சென்று அங்கிருப்பவர்களுக்கு இலவசமாக முடிதிருத்தும் மற்றும் ஷவரம் செய்யும் சேவையை செய்து வருகிறார். மேலும் அவரிடம் முடிதிருத்த வரும் ஏழை மக்களிடமும் பணம் வாங்குவதில்லையாம். இதுகுறித்து செய்தியாளர்களிடம் அவர் தெரிவித்தது., "எனக்கு பார்வை நல்லா தெரியற வரைக்கும் இதை தொடர்ந்து செஞ்சுகிட்டு வருவேன் சார். எனக்கு ஏழைகளுக்கு உதவணுங்கற எண்ணம் உண்டு ஆனா எனக்கு வசதி இல்ல அதனால என் தொழில் மூலமா மாசம் ஒரு முறை இத பண்ணிகிட்டு வரேன். எனக்கு கண்பார்வை நல்லா இருக்கற வரை இத செய்வேன்" என்று மிகவும் அடக்கமாகக் கூறினார்.

கொடைப்பணக்காரர்கள் அடுத்தவர்களுக்கு ஐந்து பைசா ஈவதற்கு மனமில்லாமல் இருக்கையில், இவர் மனதளவில் அனைவரையும் விட பணக்காரராக இருக்கிறார். இறைவன் இவருக்கு மேலும் பல்லாண்டு காலம் மங்காத பார்வையை அளித்து இவரது சேவையைத் தொடரச் செய்வாராக!!

- எதிராஜன்
http://idlyvadai.blogspot.com/2009/09/blog-post.html
(இதே தகவல் இட்லி வடையிலும் பரிமாறப்பட்டு இருக்கிறது)

நல்லார் ஒருவர் உளரேல் அவர் பொருட்டு எல்லோர்க்கும் பெய்யும் மழை ! - ஐயன் திருவள்ளுவரின் குறளுக்கு இலக்கணமாக சிலர் இன்னும் இருக்கிறார்கள்.

*****
வம்பு தும்பு :
ரஜினி ரசிகர்கள் அரசியல் அனாதைகள் - கார்த்தி சிதம்பரம் பரபரப்பு பேச்சு!

விஜய் தமிழக இளைஞர் காங்கிரஸ் தலைவர் ஆகுவது உறுதி என்பதாக செய்திகள் கசியும் இன்னேரத்தில் கார்திக் சிதம்பரம், ரஜினி ரசிகர்களை பற்றி சர்சைக்குரிய விதத்தில் பேசி இருக்கிறார். பூனை இளைச்சு இருந்தால் எலி பின்னால (சவாரி) ஏறிக் கொள்ளட்டுமான்னு கேட்குமாம். தமிழகத்தில் காங்கிரசு செயல்படுகிறது என்று காட்ட ரஜினி ரசிகர்களை சின்ன சிதம்பரம் சீண்டுகிறாரான்னு தெரியல. நானும் ரவுடிதான்னு அவர் அல்லது அவரே சொல்ல உரிமை இருக்கிறதே !

*****

பருப்பு வகைகள், பால், பேருந்து கட்டணமெல்லாம் சட்டென்று உயருதாம், இவை எல்லாம் மே மாதம் நடந்த பாராளுமன்ற தேர்தலின் போது சட்டென்று குறைக்கப்பட்டு நீதிமன்றத்தால் குட்டுபட்டு தமிழக அரசு விலை குறைவை மீட்டுக் கொண்டவை என்பது குறிப்பிடத் தக்கது, அதாவது ஒரு லிட்டர் பால் 20 ரூபாய் என்றால் தேர்தலை முன்னிட்டு 15 ஆக குறைத்து....திரும்ப 20 ஆக்கி, தற்போது 25 ரூபாய். அடுதத சட்டமன்ற தேர்தலுக்கு முன் மீண்டும் விலை குறையலாம் :) இதெல்லாம் எழுதினால் நம்ம உடன்பிறப்புகளுக்கு நகைச்சுவையாக தெரியுமான்னு தெரியல :)

*****

சுவிஸ்வங்கியில் பதுக்கி இருக்கும் கருப்பு பணத்தை இந்திய மக்களுக்கு பங்கிட்டு கொடுத்தால் தலா ஒரு லட்சம் கொடுக்கலாமாம். அந்த தொகைக்கு கிடைக்கும் வட்டியே ஏழு ஆண்டுகளுக்கு இந்தியாவுக்கே வரவு செலவு கணக்குக்கு சரியாக இருக்குமாம். வரி செலுத்தி சம்பாதித்த பணம் என்றால் அங்கே பதுக்க வேண்டி இருந்திருக்காது, மக்களை கொள்ளையடித்தப் பணம் தன் பதுங்கி இருக்கிறது. யாராவது சர்வாதிகாரி இந்திய அரசை கைப்பற்றினால் தான் அவற்றை மீட்க முடியும்.


*****

வேந்தன் has left a new comment on your post "குருவி தலை(மை)யில் பனங்காய் !":

நான் உங்களின் 200 ஆவது Follower.
இரட்டைச்சதம் அடித்ததிற்கு வாழ்த்துக்கள்.:

- சுப்பையா வாத்தியாரின் 700++ பின்தொடர்பவர்களை ஒப்பிடும் போது, பரிசல், கார்கி, நர்சிம் ஆகியோரின் பின்தொடர்பவர்களை ஒப்பிடும் போது என்னுடைய பதிவுக்கு 200 மிகக் குறைவுதான். 200 ஆவது பின் தொடர்பவராக வேந்தன் இணைந்து பாராட்டி இருக்கும், வேந்தனுக்கும், தற்போது பின்தொடர்பவர்களாக இருக்கும் 201 பேருக்கும் நன்றி !