ஷங்கரின் ரோபோ கதை !

வழக்கம் போன்ற ஷங்கர் கதைதான் என்றாலும் இந்த முறை(யும்) தயாரிப்பாளரின் ஏகோபித்த பேராதரவுடன் மாபெரும் பொருட் செலவுடன் தயாரிக்கப்படுகிறது ரோபோ. சிவாஜியில் ரஜினிக்கு பரிபூரண திருப்தி இருந்தாதால் ரஜினி ரோபோவுக்கும் ஷங்கரிடம் ஓகே சொன்னதாக தட்ஸ்தமிழ் செய்தி அறிவித்து இருக்கிறது. ஷங்கரின் ஒன்லைன் ஸ்டோரி, கோடம்பாக்கம் நண்பர் மூலம் காத்து வாக்கில் எனக்கு கிடைத்தது உங்களுக்குச் சொல்லாவிட்டால் எப்படி?

தண்ணீர் பிரச்சனைத்தான் படத்திற்கு கரு. இலவசமாக மழை நீராக வரும் தண்ணீரை வில்லன் கும்பல் மினரல் வாட்டராக மாற்றி பணம் பண்ணுகிறது, ஏழைகள் ஒருகுடம், ஒரு தம்ளர் தண்ணீர் கிடைக்காமல் இறந்து போகிறார்கள். இதை கேள்விபட்ட கபாலீஸ்வரர் கோவிலின் குருக்கள் இரவோடு இரவாக விதவிதாமான ரோபோவை உருவாக்கி அதன் மீது அமர்ந்து வில்லன் கும்பலை தீர்த்துக்கட்டுகிறார்.

இதை திரைகதையாக மாற்றி ரஜினியை வைத்து செய்வதில் சில சிக்கல் இருக்கிறதாம், சாதுவான குருக்கள் வேடம் ரஜினிக்கு முதலில் பொருந்துமா என்று நினைத்து ஆழ்ந்து யோசித்தாராம். அதன் பிறகு ஹாலிவுட் மேக்கப்காரர்களின் தயவால் அச்சு அசலாக முதிர்ந்த இராகவேந்திரா போன்ற மேக்கப் ரஜினிக்கு செட் ஆகவே ஷங்கர் குஷி மூடில் இருக்கிறாராம்.

கதைப்படி கபாலீஸ்வரர் கோவிலில் ரஜினி தலைமை குருக்கள், ஒரு நாள் கபாலீஸ்வரர் கோவிலில் அபிசேகம் முடித்துவிட்டு வெளிப் பிராகாரத்திற்கு வந்த போது, அங்கே அபிசேகத்தண்ணீர் சாக்கடையில் கலக்கும் இடத்தில் ஒரு சிறுவன் அதை குடத்தில் பிடிக்கிறான். ஆண்டவனின் அபிசேக நீரை பக்தியுடன் பிடிகிறான் என்று ஆச்சரியமாக பார்த்தபோது, அந்த சிறுவன் தண்ணீரே கிடைக்காமல் வேறு வழியின்றி தீர்த்த நீரைபிடிப்பதை அவன் வாயால் சொல்லக் கேட்டு உணர்ச்சி வசபடுகிறார். அன்று இரவு முழுவதும் தூங்காமல் இருந்து பல்வேறு 'ஏன் ... ஏன்' என்று கேள்வி எழுப்பிக் கொண்டே பகவானை எண்ணி சேவிக்கிறார், அப்போது பரண் மீது குறுக்கே ஓடிய எலி ஒன்று பழைய பேப்பரை கீழே தள்ள அதிலிருந்த செய்தி அவருக்கு கோபத்தையும் ஆத்திரத்தையும் மூட்டுகிறது, "பாலாற்றில் மணல் கொள்ளை, நிலத்தடி நீர் குறைந்து கொண்டே வருகிறது", மேலும் மேலிருந்து ஒவ்வொரு பேப்பராக எடுத்துப்பார்க்கிறார். "வரட்சியில் வாடும் இராமநாதபுரம்","மரக் கொள்ளையர்களால் காடுகள் அழிப்பு, தமிழகத்தில் மழைவரத்து குறைகிறது", "குடிநீர் பதுக்கல் - மினரல் வாட்டர் விலை எகிரியது", என்பதாக பல பல தண்ணீர் செய்திகள்

மறுநாள் குருக்கள் கோவிலுக்குள் சென்று ஒவ்வொரு வாகனத்தைப் பார்க்கும் போது, அவை பேசுவது போலவும் அவற்றிற்கு உயிர் வந்தது போல் உணர்கிறார். மந்திர, மற்றும் அறிவியல் சக்தியுடன் எலக்டாரானிக் தொழில் நுட்ப உதவியுடன் வாகன ரோபோக்கள் உருவாக்கப்பட்டு குருக்கள் ரஜினி அதன்மீது ஏறி அமர்ந்து மணல் கொள்ளைக்காரர்களை வதம் செய்கிறார். முதலில் ஆட்டுக்கிடா வாகனத்தில் செல்கிறார். பாலாற்று மணல் திருடனை அழிக்க பாலாறு போன்ற செட் போடப் படுகிறது, மணல் பால் போன்று வெள்ளையாக இருக்க வேண்டும் என்பதற்காக சைனாவில் இருந்து இரண்டு கப்பலில் மணல் வருகிறது. அடுத்ததாக சிங்க வாகனத்தில் ஏறிச் சென்று மரக் கொள்ளையர்களை அழிக்கிறார். கடைசியாக மினரல் வாட்டர் கம்பெணி காரனை கருடவாகனத்தில் சென்று நடுக்கடலுக்குள் உப்பு நீரில் அமிழ்த்தி அழிக்கிறார்.

வாகன ரோபாக்களை உருவாக்குவதற்காக அவருக்கு உதவும் வெளிநாட்டில் படித்த தமிழ்பெண்ணாக கதாநாயகி ஐஸ்வர்யா பச்சன் நடிக்கிறார். படத்தில் நாயகிக்கு பெயர் 'எழிலரசி' தமிழ் பெயராக இருக்க வேண்டும் என்று ரஜினி விருப்பம் தெரிவித்ததராம். படத்தின் முடிவில் காவேரியும் கங்கையும் இணைந்து தமிழகம் பசுமை ஆனதாகவும், கூவத்தில் பொழுதுபோக்கு படகுகள் செல்வதாகவும் காட்டுவார்கள். ஐயர் கதையாக இருப்பதால் அனேகமாக ஜென்டில்மேன், ஜீன்ஸ் படத்திற்கு வசனம் எழுதிய பாலகுமரான் இதற்கும் கதைவசனம் எழுதுவார் என்று தெரிகிறது.

முழுக்கதையும் எழுதிவிட்டால் அப்பறம் ஷங்கர் கதையை மாற்ற திண்டாடுவார். பாவம் விட்டுடுவோம்.

பின்குறிப்பு : பாத்திரங்கள், தட்டுமுட்டு சமான் எல்லாம் கற்பனையே !