வலைப்பதிவில் மூன்று ஆண்டுகள் !

பதிவுலகம் அறிமுகமான பிறகு தயங்கி தயங்கி முதன் முதலில் கூகுள் புண்ணியத்தில் வலைப்பதிவில் துண்டுப் போட்டு இன்றோடு மூன்று ஆண்டுகள் ஆகிறது. இந்த மூன்று ஆண்டுகளில் தொடர்ச்சியாக செய்த ஒரே செயல் என்றால் அது வலையில் எழுதி வருவது மட்டுமே. இதற்காக தியாகம் செய்த மணித்துளிகள் ஏராளம் ஏராளம். இந்த மணித்துளிகளை தொழில் தொடர்பில் பயன்படுத்தி இருந்தால் பொருளாதாரத்தைக் கூட்டி இருக்கலாம். மற்றபடி செலவு செய்த மணித்துளிகளால் நட்பு வட்டம் பெருகியது, தனிப்பட்ட மகிழ்ச்சி, பொழுது போக்கு என்ற அளவில் பயன் தான்.

நமக்கு பிடித்த செயல் என்றால் அதில் அலுப்பே வராது. வலையுலகம் ஒரு போதை என்று சொல்வதும் ஓரளவு உண்மைதான். எண்ணங்களைப் பகிர்ந்து கொள்கிறோம் என்றாலும் அதற்குக் கிடைக்கும் அங்கீகாரம், பாராட்டுகள் இவற்றிற்கு அடிமை ஆகிறோம் என்பது ஒப்புக் கொள்ள வேண்டிய ஒன்று. மிகச் சிலரே நேரம் கிடைக்கும் போது எழுதுவதையும் வெறும் பொழுது போக்கு என்ற அளவில் வலைப்பதிவை மிகச் சரியாக கையாளுகின்றனர். கட்டட்டச் சுதந்திரத்தை வழங்குகிறது என்பதை தவறாகப் பயன்படுத்திக் கருத்து திணித்தலும் இங்கு உண்டென்றாலும் அதனால் பெரும் பாதிப்புகள் இல்லை என்று சொல்லலாம். இங்கும் மதப்பிரச்சாரங்கள், கொள்கைகள், பகுத்தறிவு போன்றவைகள் எழுதப்பட்டாலும் படித்தே ஆகவேண்டும் என்கிற கட்டாயம் எதுவும் இல்லை. சிற்றிதழ்கள், இலக்கிய இதழ்கள் பொதுவாக வாசகர் மனநிலையைக் கட்டமைத்துவிடும், அவற்றில் எழுதி இருப்பதே உலக நடப்பாகும் என்று தனது சிந்தனையை அவற்றிற்கு அடிமை ஆக்குவதும், அடகு வைப்பதும் போன்ற ஆபத்துகள் இங்கு இல்லை. சொல்லப் போனால் கட்டமைக்கப் பட்ட வாசக மனநிலையை வலைப்பதிவு என்னும் மாற்றூடகம் வெற்றிகரமாக உடைத்தே வருகிறது.

மாற்றுக் கருத்துகள் சிறப்பானவையாக இருக்கிறது என்று ஒத்துக் கொள்ளும் மனநிலையை வலைப்பதிவாளர்கள் பலர் பெற்றிருக்கிறார்கள், முன்பு போல் 'ஒரே பார்வை' அதுவே சரியாக இருக்கும் என்கிற மனநிலையை வலைப்பதிவு வாசகர் வட்டம் தொடர்ந்து உடைத்துக் கொண்டு வந்திருக்கிறது. ஆன்மிகவாதிகள் இறைமறுப்பாளர்களைவிட மென்மையான மனதுடையோர் என்கிற எண்ணம் ஒருகாலத்தில் எனக்கு இருந்தது, ஒருவன் திருந்தி வாழ இறைநம்பிக்கையே கைகொடுக்கிறது என்கிற கருத்தையெல்லாம் நான் கொண்டிருந்தேன். ஒழுக்கத்திற்கும் ஆன்மிகத்திற்குமான பலமான முடிச்சு இருப்பதாக நம்பிக்கைக் கொண்டிருந்தேன். அவையெல்லாம் உடைபட்டு...தனிமனித ஒழுக்கம் என்பது வேறு, நம்பிக்கைகள் வேறு அதற்கும் இறை நம்பிக்கை / நம்பிக்கை இன்மை இவற்றிற்கு யாதொரு தொடர்பும் இல்லை என்று தெளிந்தது வலைப்பதிவுகளில் வரும் பல்வேறு தரப்பினரின் கட்டுரைகளை எண்ணங்களை வாசித்து அறிந்த பிறகுதான். இங்கே வலைப்பதிவில் கருத்துத் திணித்தல் என்பது பலமாக எதிர்க்கப்படுகிறது, அப்படி முன்முடிவுடன் எழுத வருபவர்கள் வெறும் விளம்பரதாரர்களாக அறியப்படுகின்றனர்.

யார் யாரெல்லாம் எழுதலாம் என்கிற கட்டுப்பாட்டைக் கொண்டு அவர்களின் கருத்துக்களையே பொதுமக்களின் கருத்தாக அமைக்கும் அச்சு ஊடகங்களில் நச்சுத் தன்மைகள் போன்றவை வலைப்பதிவில் எடுபடுவதில்லை. ஒரு கட்டுரை எழுதப்பாட்டால் அதில் சொல்லப்பட்டிருப்பவை என்ன மறைமுகமாக திணிக்கப்பட்டுள்ளவை எவை என்பதை வாசகர்கள் மிகச் சரியாக அடையாளம் கண்டு உடனடியாக எதிர்வினையைப் பதியவைக்கிறார்கள், இதற்கு 'சிவாஜி' ஷங்கரோ, 'அயோத்தியா மண்டபம்' சுஜாதாவோ தப்புவதில்லை. வாசகர் கடிதம் என்ற அளவில் அதுவும் அந்த இதழிலுக்கு எதிராக அமையவில்லை என்றால் மட்டுமே பொதுமக்களின் கருத்துகள் ஊடகங்களில் இடம்பெற்று வந்தது. ஒரு இணைய இணைப்புடன் கணினி இருந்தால் நமது எண்ணங்களை உலகம் முழுவதும் உள்ள இணைய வாசர்களிடம் எடுத்துச் சொல்லிவிட முடியும்.




தொடர்ந்து ஆதரவு கொடுத்து, மாற்று கருத்து தெரிவித்து, பாராட்டுத் தெரிவிக்கும் அனைவருக்கும் மிக்க நன்றி !

காலம் தொடர்ந்து சுழலும்...