இவர்களெல்லாம் வெட்கித் தலை குனிந்திருக்கிறார்களா ?

நான் இதை லாவனியாக எழுதித் தொடரவிரும்பியதில்லை, என்னைப் பொருத்த அளவில் முரண்பாடுகளை எடுத்து சொல்வது தேவையானது என்ற அளவில் விமர்சனங்களாக அவற்றை எழுதுவேன், அது லாவனியாகவோ அல்லது எதிர்வினையாகவோ தெரிந்தால் நான் பொறுப்பு இல்லை. முரண்பாடுகளின் மூட்டையாக அல்லது கூமுட்டையாக இருப்பவர்கள் அடுத்த முறை எதையாவது எழுதும் பொழுது தன்னை, தன்னுடைய கொள்கை சார்ப்பு நிலை பற்றிய மதிப்பீடு செய்து கொள்ள முடியும் என்று நம்புகிறேன்.

*****

அன்பு நண்பர் சுபி (சுவனப்பிரியன்) 'ஒரு பவுத்தன் என்ற வகையில் வெட்கித் தலை குனிகிறேன்' என்று தலைப்பிட்டு ஒரு பதிவை எழுதி இலங்கையில் யாரோ இஸ்லாமியர்களின் பள்ளி வாசல் மீது நடத்திய தாக்குதலுக்காக யாரோ வெட்கித் தலைகுனிந்ததாக அறிவித்ததை எழுதி ஒட்டுமொத்த மனித குலத்திற்கு மனித நேயப் பாடம் படித்துள்ளார். மகிழ்ச்சி.

இவற்றையெல்லாம் மறந்து இன்று தம்புள்ளை போன்ற பிரதேசங்களிலுள்ள முஸ்லிம்களின் பள்ளிவாசல்களை அகற்றுவதற்கு எனது இனத்தைச் சேர்ந்த சில தீய சக்திகள் முயற்சிப்பதையிட்டு ஒரு பௌத்தன் என்ற வகையில் நான் வெட்கித் தலை குனிய வேண்டியுள்ளது."

உலகில் நடைபெறும்  மதவாத செயல்களில் ஈடுபட்டு மாற்று மத மனித குலத்திற்கு தங்கள் மதம் கேடு விழைவித்திருந்தால், அந்த மதத்தில் தொடர்பு  உள்ளவர்களில் சார்பு உள்ளவர்களில் ஒரு சிலர் மனம் இளகி 'இந்த மதத்தில் பிறந்ததற்காக வெட்கப்படுகிறேன்' என்று சொல்லுவார்கள். இதுவே உலக நடைமுறை.

ஆஸ்திரேலியாவின் பாதிரியாரையும், அவரது குழந்தைகளையும் உயிரோடு எரித்த பிறகு 'இந்து' என்பதால் வெட்கம் அடைந்தோர் பலர்,  இது போல் உலகின் மதவாத செயல்கள் நடைபெறும் பொழுது அந்த மதத்தைச் சார்ந்தவர் ஒருசிலராவது வெட்க்கப்படுபவார்கள், அந்த மதங்களைப் பின்பற்றுபவர்களில் சிலருக்கு மனிதாபாபிமானம் உண்டு என்பதற்கு இவை தான் சாட்சி. தவிர அந்த மனிதாபிமானிகள் ஒரு சிலரை வைத்து அந்த மதத்திற்கு புனிதர்கள், நல்லவர்கள் நிறைந்த மதம் என்று சான்றிதழ் வழங்கிவிட முடியாது என்பது எனது தனிப்பட்ட நிலைப்பாடு. நிற்க.

எனக்கு தெரிந்து பதிவு எழுதும் சுபி உள்ளிட்ட இஸ்லாமியர்கள் இஸ்லாம் பெயரில் நடக்கும் அட்டூழியங்களுக்கு கிஞ்சித்தும் இது போல் வருத்தப்பட்டதோ, வெட்க்கப்பட்டதோ கிடையாது. மாறாக 'இஸ்லாத்தை சரிவர பின்பற்றாததினால் தான் அவர்கள் அவ்வாறு நடந்து கொண்டுள்ளனர்' என்றே சொல்லி வந்தனர். அதே போன்று ஏன் பவுத்த மதவாதிகள் பவுத்தத்தின் அன்புவழியை சரியாக பின்பற்றாததால் தான் மதவெறியர்களாக மாறியுள்ளனர், இஸ்லாமிய பள்ளி வாசல்களை இடித்துள்ளனர், விரைவில் அவர்கள் உண்மையான பவுத்திற்கு செல்வார்கள்அல்லது செல்லும் படி இறைவன் நாடவேண்டும்  என்று இவர்களால் ஏன் நினைக்க முடியவில்லை ?

மதவெறியால் கேரளாவில் ஆசிரியர் ஒருவர் கார்டூன் வரைந்தார் என்பதற்காக தலிபான் பாணி தீர்ப்பு வழங்கி அவரின் கைகளை துண்டித்தனர், சுபி போன்றவர்கள் அமெரிக்க இரட்டை கோபுரத்தை அமெரிக்காவே தகர்த்து கொண்டது என்றே தகவல் பரப்பிவருபவர்கள், கிஞ்சித்தும் பாமியன் மலைக்குன்றில் பழமை வாய்ந்த புத்தர் சிலைகளை பீரங்கி வைத்து தகர்த்த அல்கொய்தா, தலிபான் செயல்களை இவர்கள் கண்டித்தோ, அல்லது அந்த தீவிரவாத கும்பல்களும் இஸ்லாமியர்கள் என்பதால் இவர்கள் வெட்கப்பட்டதும் கிடையாது. பின்லேடனுக்கு சென்னையில் நடந்த சிறப்பு தொழுகையையும் கண்டித்தோ அதற்காக ஒரு இஸ்லாமியர் என்பதால் இவர்கள் வெட்கப்பட்டதோ கிடையாது.

மதத்தின் பெயரால் தீமைகள் நடந்தால் அந்த மதத்தைச் சார்ந்தவர்களும் வெட்கம் அடைவது தான் நடைமுறை, இதைத்தான் சுபி சொல்லாமல் எழுதி இருக்கிறார். ஆனாலும் அவரும் கடைபிடிக்க வேண்டும் என்பதே நம் விருப்பமாகும். சுபி எழுதிய பதிவைப்படித்து இனிமேலாவது தீவிரவாத செயல்களுக்கு இவர்களும் வெட்கம் அடைவார்கள் என்று நம்புவோம்.

உலகில் நடைபெறும் மதவாத செயல்களுக்கெல்லாம் அந்தந்தந்த மதத்தை சேர்ந்தவர்கள் வெட்கப்பட்டு கண்டனம் தெரிவித்தால் அன்றி மதவெறியை தடுத்து நிறுத்தலாகாது.

இன்ஷா அல்லா.