கொஞ்சம் தமிழக அரசியல் !

நாளிதழலைத் திறந்தாலே நாறிப் போன ஸ்பெக்ட்ரம் விவகார செய்திகள் தான். இதில் சம்பந்தப்பட்ட தரப்பு அரசின் வருமான இழப்பு ஊழல் ஆகாது என்று வெட்கமில்லாமல் சொல்லிக் கொண்டு திரிகிறார்கள். அரசுக்கு பல்வேறு வகைகளில், வரிகளில் கிடைக்கும் பணம் தான் நலத்திட்டங்களுக்கும், அரசு செலவீனங்களுக்கும் பயன்படுகிறது, அதைச் சரியாகச் செய்யாமல் அரசுக்கு வருமான இழப்பை அதையும் லட்சம் கோடிக் கணக்கில் செய்துவிட்டு தொடர்வதற்கு எந்த ஒரு அரசும் சர்வாதிகார அரசாக இருந்தால் மட்டுமே முடியும், ஆனால் அதை மக்கள் ஆட்சி என்றே சொல்லிக் கொண்டு தொடர்கிறார்கள். இன்றைய செய்தி அதிர்ச்சியை அளித்தது, நீதிபதிகள் திகைத்தார்களாம். அதாவது ஸ்பெக்டரம் ஏலம் பெற அரசுடமை வங்கிகளிடம் தனியார் பெற்ற கடன் இருபதாயிரம் கோடி. இவ்வாறு கடன் பெற்றே அந்த ஏலத்தை எடுத்து 10 மடங்கு இலாபத்திற்கு விற்றிருப்பதாக செய்திகள் தெரிவிக்கின்றன. ஒரு ஏழைமாணவன் கல்விக்கடனுக்குச் சென்றால் அப்பன்காரன் வங்கிக்கடன் வைத்திருந்தால் கொடுக்க முடியாது என்று திருப்பி அனுப்புகின்றன வங்கிகள், அவர்கள் கடன் கேட்கும் தொகையோ இன்றைய நாணய மதிப்புகளில் சொற்பமே. ஆனால் அரசியல்வாதிகள் கண் அசைத்தால் ஆயிரம் கோடிகளில் கடன் வழங்குகிறது இந்திய அரசுடமை வங்கிகள். தனது நிர்வாகத்தின் கீழ் பணி புரிந்த அமைச்சர் ராசா ஊழல் செய்ததில் தனக்கு தொடர்பில்லை என்பது போலவும், தனது பரிந்துரைகளை அவர் கேட்கவில்லை என்றும் கூறிவிட்டு ஒதுங்கிக் கொண்டேன், நாடாளுமன்றத்தை நடத்தவிடுங்கள் என்று இயலாமையாக கூறுகிறது மன்மோகன் அரசு. நிர்வாகம் சரியாக செயல்படாமல் போனதற்கு, ஊழல் மலிந்ததற்கும் நிர்வாகி பொறுப்பு ஏற்கமாட்டார் என்றால் நிர்வாகி என்கிற பதவியின் பொருள் என்ன ? இவர்களெல்லாம் ஏன் தொடரவேண்டும் ?

ஊழல் நடைபெற்றதை கண்டுபிடித்தால் ராசாவை கட்சியை விட்டே நீக்கி சமூக நீதி காட்கிறோம் என்கிறார் கருணாநிதி, ஊழல் நடைபெற்றது நிருபனம் செய்யப்பட்டால் ராசாவுக்கு கிடைப்பது சிறை தண்டனை, இவர் கட்சியை விட்டு நீக்கினால் என்ன நீக்காவிட்டால் என்ன, ஒரு குற்றவாளிக்கு உறுப்பினர் அட்டை கொடுப்பது / கொடுக்காதது பற்றி யாரும் கேட்கப்போவதில்லையே. அப்படியே என்றாலும் கூட கட்சியை விட்டு நீக்குவதெல்லாம் ஒரு தண்டனையா ? அதிமுக ஆட்சியில் ஊழல் செய்து தண்டனை அடைந்தவர்கள் இவருடைய கட்சியில் இன்றைக்கு உறுப்பினர்களாக இருக்கிறார்களா ? இல்லையா ? கட்சியை விட்டு நீக்குவது, நீக்காதது தனிப்பட்ட ஊழல் உறுப்பினருக்கு (ஊழலை செய்தபின்பு) என்ன நட்டம் ஏற்பட்டுவிடப் போகிறது ?

தமிழகத்தில் அதிமுக, தேமுதிக, பாஜக, காங்கிரஸ் இளங்கோவன் உட்பட ஸ்பெக்டரம் பற்றி கிழித்துவரும் வேளையில் பாமக மட்டும் அதுபற்றி இம்மி அளவும் மூச்சுவிடவில்லை என்பது புதிராகவே இருக்கிறது. கருணாநிதி மீது திராவிட சிந்தனையாளர், தமிழ்பற்றாளர், ஈழ ஆதரவாளர் என்கிற எண்ணமெல்லாம் இருந்ததாலேயே அவர் மீது நான் உட்பட பல்வேறு கட்சிசாராதவர்கள் அன்பு கொண்டிருந்தனர். இன்றைய தேதிக்கு திராவிடம் என்பது கட்சிப் பெயரில் இருக்கிறது என்பது தவிர்த்து அது ஒரு தனியார் உடமை வாரிசு உரிமை கட்சியாகிவிட்டது, வராலாறு பழிக்கும் என்பதற்காக அவசர கெதியில் இதுவரை ஐந்து முறை முதல்வராக இருந்தும் செய்திடாத உலக தமிழ்மாநாட்டை பெயரை மாற்றி முதல் செம்மொழி மாநாடு என்று அறிவித்து குடும்பவிழாவாக மாற்றினார். ஈழ நலம் முழுவதுமாக கைகழுவப் பெற்றது, எந்த ஒரு காரணத்தினால் கருணாநிதி ஆதரவாளர் என்கிற எண்ணம் இருந்ததோ, அந்த காரணங்கள் எதுவுமே கருணாநிதியிடம் இல்லை. இவர் குடும்பத்து பங்காளிச் சண்டைகளில் மதுரையில் தினகரனின் வேலைப்பார்த்த மூவர் படுகொலை செய்யப்பட்டனர். இதுவரை அது தொடர்புடையவர்கள் எவருக்குமே தண்டனைகள் வழங்கப்படவில்லை, பங்காளிகள் ஒன்று சேர்ந்த போது இதயம் இனித்து, கண்கள் பனித்தன என்றால்...... அவ்வளவு சுயநலவாதியா நீய்யீ........... என்று நினைக்க கருணாநிதிக்கு ஆதரவான நெஞ்சம் கசந்து நஞ்சை இறக்கி வைத்தது.

ஈழம் தவிர்த்து கூட கருணாநிதி ஆட்சித் தொடரவே வேண்டும் என்பதற்கு எந்த ஒரு சிறப்புக் காரணமும் தென்படவே இல்லை. சந்தர்பம் அமைந்தால் சிறுபான்மை காவலர் கருணாநிதி மதவாதக்கட்சியுடன் கூட கூட்டணி அமைப்பார் என்பது ஏற்கனவே உறுதியான ஒன்று தான். திராவிட இயக்கம் அதன் இலக்கை கருணாநிதியை வைத்து எட்டிவிட்டதால் கருணாநிதிக்கு திராவிடச் சிந்தனைகள் இனி தேவை அற்றதாகவே நினைத்துக் கொள்ளலாம் என்று சொல்லும் நிலைக்கு மக்கள் வாழ்க்கைத்தரத்தை சிறப்பாக ஆக்கி இருந்தால் கருணாநிதியின் திராவிட ஆட்சி தொடரலாம் என்றே சொல்லமுடியும், நிலைமை அவ்வாறு இல்லை. ஏழைகள் ஒரு ரூபாய் அரிசிக்கு கிடைத்தால் பிழைப்பையே ஓட்டமுடியும் என்கிற நிலையில் தான் கருணாநிதி ஆட்சி வைத்திருக்கிறது, ஆனால் கருணாநிதியின் வாரிசுகளோ டாட்டா அம்பானி ரேஞ்சுக்கு வளர்ந்துவருகிறார்கள். ஒரு தமிழனின் வாரிசுகள் அம்பானிக்கு ஈடுகொடுக்கிறார்கள் அல்லது பின்னுக்கு தள்ளுகிறார்கள் என்பது தமிழனுக்கு பெருமையா ? சத்தியமாக எனக்கு பெருமையாகத் தெரியவில்லை. குடும்பத்தை அம்பானிகள் ஆக்கியது தவிர்த்து ஒரு ரூபாய்க்கு அரிசி கிடைத்தால் தான் வாழமுடியும் என்கிற நிலையை ஏற்படுத்தி இருப்பதைத் தவிர்த்து கருணாநிதியின் எந்த ஒரு சாதனை கருணாநிதி ஆட்சி தொடரவேண்டும் என்கிறதோ அதை குப்பன் சுப்பன் கூட பதவியில் இருந்தால் செய்துவிட்டு போய்விடுவான்.