கழுவுகிற கையால் சாப்பிடலாமா ?

தீண்டாமை வெளியில் வெளிப்படையாக இன்னும் கிராமங்களில் இருக்கிறது என்பது வேதனையான விஷ(ய)ம் தான். ஆனால் நாம் கடைபிடிக்கும் (மூட) நம்பிக்கைகளின் உச்சத்தில் நமது உடல் உறுப்புக்கள் மீதும் இத்தகையை தீண்டாமையை வைத்திருந்து போற்றுகிறோம் என்பதே தெரியாமல் நாம் இருக்கிறோம்.

முன்பு சென்னையில் ஒரு மலையாளி டீ கடைக்கு சாயா குடிக்கப் போயிருந்தேன். அங்கு டீக்கடையில் டீ குடித்துவிட்டு ஒருவர் 50 ரூபாயைக் கொடுத்துவிட்டு மீதம் பெற்றுக் கொள்ள பணத்தை நீட்டினார். கடையில் கல்லாவில் இருந்தது சின்ன பையன், அவன் மீதம் பணத்தைக் அவருக்கு கொடுத்தான். பணம் மீதம் பெற்ற நபருக்கு கோவம் தலைக்கு மேல் ஏறிவிட்டது. என்னவென்று உடனே புரிந்தது. ஏனென்றால் கடைக்கார பையன் 'இடது கையால்' மீதம் பணத்தைக் கொடுத்துவிட்டானாம்.

இதில் என்ன வேடிக்கை என்றால் டீ குடித்த நபர் மசால் வடையும் தின்றுகொண்டிருந்ததை நான் பார்த்தேன். இதில் என்ன வேடிக்கை என்கிறீர்களா ? மசால் வடையை ஒரு கையால் தட்ட முடியாது. நன்றாக உருண்டையாக மாவை உருட்டி 'இடது உள்ளங்கையில்' வைத்து தட்டிப் போடுவார்கள். சென்னையில் பல மலையாளி டீ கடைகளில் மசால் வடை சுவையாக இருக்கும். அதற்கு காரணம் இடது கையால் தட்டுவதா ? :). கடைக்கு வெளியில் தான் மசால் வடை செய்வார்கள். எனவே செய்முறையை நன்றாக கவனிக்க முடியும்.

அந்த நபர் டீக்கடைக்கார சிறுவனை எகிறிய போது நினைத்தேன். 'அடப்பாவிகளா இடது கையால் தட்டிய மசால் வடை இப்பதானே உள்ளே இறங்கியது, அதற்குகுள் இடதுகையால் பணம் பெற்றதை பிரச்சனை ஆக்குறானே' என்று நினைத்துக் கொண்டேன்.

நம்ம இந்தியர்கள் தான் சாப்பாட்டிற்கென ஒரு கையையையும் கழுவுவதற்கென்றே ஒரு கையை 'ஒதுக்கி' வைத்திருக்கிறார்கள்ள். சாப்பாடு சாப்பிடும் கை நல்ல கையாம். கழுவுகிற கை தாழ்ந்த கையாம் நல்ல காரியங்களுக்கு இடதுகையை பயன்படுத்தக் கூடாதாம்.

இரண்டு கை இருப்பதால் இப்படியெல்லாம் சொந்த கையிலேயே உயர்வு / தாழ்வு பார்க்கிறோம். ஒருகை இருந்தால் இதெல்லாம் செய்வோமோ ? இடதுகை ஒதுக்கப்பட வேண்டும் என்பதற்கு அறிவியல் ரீதியாக எதாவது காரணம் இருக்கிறதா ? வலது காலை எடுத்து வைத்துச் செல்வதற்கும், இடது காலை எடுத்து வைத்து செல்வதற்கும் என்ன வேறுபாடு இருக்கிறது ? பூனையை கட்டிப்போட்டு பாடம் நடத்திய கதைதான் நினைவுக்கு வருகிறது.

என்றோ ஒரு நாள் வலது கையில் காயம் பட்டு சாப்பிடுவதற்கு முடியாமல் போய்விட்டால் இடது கையால் சாப்பிடுவது இழிவா ? இடது கை செய்த பாவம் என்ன ? கழுவதற்கு உதவுவதா ? மற்ற எல்லாவற்றையும் குறிப்பாக (பிறப்பு உறுப்பை கழுவுவதற்கோ, மற்றும் பல பல) வலது கையும் செய்கிறதே ! இடதுகை சுத்தமாகத்தான் வைத்திருக்கிறோம். சாப்பிட்ட தட்டை கழுவிவிட்டு சாப்பிடும் போது இடது கையால் சாப்பிடுவதில் என்ன தவறு ?

கைகள் தசைகளால் ஆனவை ஒரே இரத்தம் தான் ஓடுகிறது. இதில் இடதுகையை மட்டும் ஏன் ஒதுக்கி வைக்க வேண்டும் ?

இரண்டு கையையும் சமமாக பயன்படுத்துபவர்களுக்கு மூளையின் செயல்பாடுகள் அதிகரிக்கிறது என்பது அறிவியலாளர்களின் கருத்து.