திருப்பூர் குமரர்கள் !

அண்ணாச்சியிடம் விடைபெற்று பல்லடம் வழியாக திருப்பூர் பேருந்தில் ஏறும் போது மணி மாலை 2:30 ஆகி இருந்தது. கோவையின் இதமான குளிர்காற்று கண் அயர்த்தினாலும், பேருந்தில் போட்ட 'உன்னாலே உன்னாலே' திரைப்படத்தில் ஒலியில் தூங்க முடியவில்லை. அரைமணிநேரம் 'விழித்தேன்' பிறகு அயர்ந்தேன். திருப்பூரை நெருங்கும் போது விழிப்புவர இறங்கும் போது மணி 4:00 ஆகி இருந்தது.

பரிசல்காரன் மற்றும் வெயிலான் ராமேஷுடனான மதிய உணவு நேரம் தப்பியதற்கு கோவையில் இருந்தே வருத்தம் தெரிவித்து இருந்தேன். திருப்பூரில் ஏற்கனவே தொலைபேசியில் அழைத்து அங்குவரச் சொல்லி இருந்த, எங்கள் வீட்டில் வளர்ந்த, அப்பாவின் நண்பரின் மகன் காத்திருந்தான், அவனிடம் உரையாடிக் கொண்டிருந்த போதே, பரிசல்காரனிடம் திருப்பூர் வந்து சேர்ந்ததை உறுதிபடுத்த... 5 நிமிடத்திற்கெல்லாம் பைக்கில் வந்து சேர்ந்தார் பரிசல்.


கிருஷ்ணாவின் முகம் ஏற்கனவே புகைப்படங்கள் மூலம் நன்கு அறிமுகமானதாலும், இருவருக்கும் நட்பு பிணைப்பு முன்பே ஏற்பட்டிருந்ததாலும் ஒருவருக்கொருவர் புதியவர் அல்ல, கைக்குலுக்களுடன் ஒரு தழுவல், அதன் பிறகு தனது இருசக்கர வாகனத்தில் என்னை ஏற்றிக் கொண்டு வெயிலான் ராமேஷ் அறையை நோக்கி பயணித்தார். இடையே 'புழுதிக்காடு' அருணும் சேர்ந்து கொள்ள சுமார் மாலை நான்கு மணிக்கு (28 புதன் ஜன 2009) ரமேஷின் அறைக்குச் சென்று சேர்ந்தோம். ரமேஷ் எனக்கு பிறகு தமிழ்மண நட்சத்திரவாரத்தில் எழுதியவர் மற்றும் ஓரளவு இருவரும் ஒருவரை ஒருவர் அறிவோம் என்பதால் இவரும் புதியவராக தெரியவில்லை. பரிசல் 'யாரைப் பார்த்தாலும் நாங்களெல்லாம் தழுவிக் கொள்வோம்' என்றார். ரமேஷின் 'தேகம்' கட்டியணைக்க முடியுமா ? சந்தேகம் !!!. பரிசலிடம் 'சிரமம் தான்' சொல்லி இருந்தாலும். அந்த அளவுக்கெல்லாம் இல்லை. ஒருவழியாக நேரில் பார்த்த போது... முடிந்தது ! :) நம்புங்கப்பா !

ரமேஷ் ஹார்லிக்ஸை அப்படியே சாப்பிடுபவர் என்பதை பார்த்ததும் தெரிந்து கொள்ளலாம். எனக்கு தேநீர் தான் கிடைத்தது :(



ரமேஷ் தன் அறை நண்பரிடம் சொல்லி அனைவருக்கும் தேநீர் வழங்கினார். அதன்பிறகு கிருஷ்ணா தன் முழுத்திறமையையும் வெளிப்படுத்தி நிழல்படங்களை சுட்டுத் தள்ளினார்.


(இவர் ரமேஷின் அறை நண்பர்)


(பரிசல் தரையில் படுத்துக் கொண்டு எடுத்தப்படம்)


(பரிசல் தரையில் நின்று எடுத்தப்படம்)





(இதெல்லாம் யாருடையதுன்னு சொல்லமாட்ட்டேன்... நிழல்படம் எடுப்பது அறிந்து அருகே காய்ந்து கொண்டிருந்த XXXL ஜட்டிகள் படத்தில் விழுவதை தவிர்பதற்காக உடனடியாக அகற்றப்பட்டதா என்பதையும் சொல்லமாட்டேன்)

மூவரின் கலகல பேச்சின் நடுவே கார்க்கி, தாமிரா லக்கிலுக் ஆகியோர் அலைபேசியில் பரிசல் / பரிசலை தொடர்பு கொள்ள என்னிடமும் பேசினார்கள்.



(இப்படி படம் எடுத்தால்...கீழே உள்ள காட்சி கிடைக்கும்)



புழுத்திகாடு அருணும் இயல்பாக பேசினார். 28 வயதாம், திருமணம் இன்னும் செய்து கொள்ளவில்லை. ஒல்லிய, மெல்லிய உடல்வாகு, நல்ல உயரம் (திருப்பூரில் வரன் இருக்கா ?).


வெயிலான் ரமேஷ் காலனி வீட்டில் வாடகைக்கு வசிக்கிறார் (சொந்த ஊர் விருதுநகர், தற்பொழுது திருப்பூர் தொழில் அதிபர், அப்படித்தான் கிருஷ்ணா சொன்னார்) அறை வாடகை ரூ5000மாம், ஓரு ஹால், ஒரு கிச்சன், ஒரு பெட்ரூம், மற்றும் அட்டாச்ட் குளியல் அறை, துணி உளர்த்த ஒரு சிறிய இடம், ரூ5000 வாடகை இதே அளவு சென்னை விடுகளைவிட மிகுதியோ என்று தோன்றியது.

தாமிரா ஏற்கனவே கொடுத்திருந்த திருநெல்வேலி அல்வாவை ரமேஷ் சபை நடுவே வைத்தார்.

(அல்வா இல்லாமல் சந்திப்பு தித்திப்பா ?)

தாமிராவுக்கு ஒரு 'ஓ' போட்டுவிட்டு அல்வாவை சுவைத்தோம். கலகல பேச்சு தொடர்ந்து கொண்டிருந்தது. மாலை 5:20 ஆகி இருந்தது. 'நான் கிளம்புறேன்' என்றேன். 'இருங்க நம்ம ஈரவெங்காயம்' 5:30 மணிக்கு வருவதாகச் சொன்னார் என்றார் ரமேஷ். 5:40 இருக்கும், ஈரவெங்காயம் வந்து சேர்ந்தார். பெயர் சாமி நாதன். புன்னகையை சிந்த தயாராக இருக்கும் முகம், சராசரி உயரம். எளிதில் பழகிவிடும் குணம்.

சாமி நாதனை இதற்கும் மேல் வரூணித்தால் கூச்சப்படுவார். போதும் ! சுவாமி நாதனுடன் சேர்ந்து நாங்கள் ஐவர் ஆனோம் (திஸ் ஈஸ் டூ மச்!!!) அவரும் சேர்ந்து கொள்ள மேலும் கலகல பேச்சுகள். மற்ற தனிப்பட்ட தகவல்கள் என அறிந்து கொண்டோம். அன்றுதான் அருண் மற்றும் சுவாமிநாதன் மற்ற இருவரை நேரடியாக சந்தித்தார்களாம்.


மணி மாலை 6 ஐ நெருங்கவே செல்ல வேண்டிய அடுத்த நிலையம் நினைவுக்குவர ... ம் கிளம்புவோம் என்று அரை மனதாகச் சொல்ல, (அப்பாடா கிளம்புறான்யா) , ஐவரும் கிளம்பினோம். வழியில் ரமேஷ் தனது அலுவலகம் எதிரே விடைபெற்றார்.

அதன் பிறகு திருப்பூர் குமரன் நினைவகம் இருக்குமிடத்தில் உள்ள உணவு விடுதியில் நால்வரும் பஜ்ஜி, காஃபி சுவைத்துவிட்டு.



அங்கு பஜ்ஜி மிகச் சுவையாக இருந்தது (திருப்பூர் போனால் சென்று... தின்று வாருங்கள், பில்லை கிருஷ்ணாவுக்கு அனுப்பி பெட்டிகேஷ் பெற்றுக் கொள்ளுங்கள், அன்று தொகை செலுத்தியது சாமி நாதன்),

சாமிநாதனும், அருணும் விடை பெற, அருகில் இருந்த திருப்பூர் குமரன் நினைவகத்தின் எதிரில் நிறுத்தி எனக்கு நிழல்படம் வாய்பளித்தார் கிருஷ்ணா. அதன் பிறகு திருப்பூர் குமரன் கொடியுடன் சரிந்து உயிர்நீத்த இடத்திற்கு அழைத்துச் சென்றார்.



பின்னர் பேருந்து நிலையத்தினுள்ளே விட்டுவிட்டு விடைபெற்றார். அன்றைய நாள் முழுவதும் (28 ஜன 2009 பார்ததவர்கள் ஸ்வாமி ஓம்கார், வடகரை வேலன் அண்ணாச்சி, திருப்பூர் பதிவர்களின் முகம் நினைவில் மாறி மாறி வந்து கொண்டிருக்க, அருகே மதுரை செல்லும் பேருந்து புறப்பட ஆயத்தமாக நின்று கொண்டிருந்தது.

தொடரும் ....