அலுப்பே இல்லாமல் பதிவு போடுறாங்களே எப்படி ?

சமயத்தில் எனக்கு, 'இவ்வளவு பதிவு எழுதிறிங்களே உங்களுக்கெல்லாம் எப்படி நேரம் கிடைக்குது ? என்று சிலர் பின்னூட்டத்தில் கேட்பார்கள், உண்மையிலேயே பதிவு போட நேரம் கிடைப்பதைவிட எதாவது உள்ளிடு கிடைப்பதுதான் கடினம். பதிவு எழுத பத்து நிமிடம் கூட ஆகாது, ஆனால் அதில் எதை எழுதுவது என்பது தான் புதியவர்களுக்கும், நெடுநாளாக எழுதுபவர்களுக்கும் இருக்கும் தடையே. நாள் தோறும் படிப்பவர்களுக்கு படிப்பதற்கு நேரம் கிடைப்பது போல் தான், நாள் தோறும் பதிவிடுபவர்களுக்கு எழுதுவதற்கு நேரம் கிடைக்கும், ஒரு 10 - 15 நிமிடம் படிப்பதைத் தவிர்த்துவிட்டு அந்த நேரத்தில் ஒன்றை எழுதிப் போடுகிறார்கள். நானும் அவ்வாறே.

சரி, பதிவர்கள் எப்படி மேட்டர் தேற்றுகிறார்கள் என்று பார்ப்போம், இந்த வழிமுறை மிகச் சரியானது இல்லை என்றாலும் எழுதத் திணறும் போது கை கொடுக்கும். (இதைச் சொல்லவில்லை என்றால் ஆசிப் அண்ணாச்சி ஒரு எதிர்பதிவு போட்டுவிடுவார்)

லக்கிலுக் : பைக்கிலிருந்து இறங்கும் போது பக்கத்து வீட்டு பரிமளா அக்காவைப் பார்த்து இருப்பார், அப்படியே முன்னோக்கி பைக்கை நிறுத்துவிட்டு, பின்னோக்கி நினைவுகளைச் சுழற்றி, 'பரிமளா அக்கா பற்றிய நினைவில் மூழ்கி, அதை பதிவாக ஆக்கிவிடுவார், இவர் கண்ணில் படுவதெல்லாம் பதிவாகிவிடும்

பரிசல்காரன் : பைக்கு தான் இவர் எழுத்தின் முக்கால்வாசி பதிவுகளுக்கு காரணம், டீக் கடையில் நிறுத்திவிட்டு அங்கு நடப்பதைப் பார்ப்பார், அல்லது போகும் வழியில் ஓடுவதைப் பார்ப்பார், நடப்பதையெல்லாம் எழுத்தாக்குவார். போறவழியில் ஒரு மெஸ்சைப் பார்த்தால் 3 ஆண்டுக்கு முன்னால் ஒரு ப்ளாஸ் பேக் நினைவு வரும் அப்பறம் என்ன ? பதிவுக்கு மேட்டர் தேறிடும். இவரது பைக்கு சாவியை உமா எடுத்து ஒளித்து வைக்காதவரை நாள் தோறும் 2 பதிவு கண்டிப்பாக உண்டு.

டிபிசிடி : இப்போதெல்லாம் அடிக்கடி வெளி மாநிலம் செல்வதால் வெளி மாநில தமிழர்கள், அங்குள்ளவர்களை சந்திக்கும் வாய்ப்புக் கிடைக்கும், 'இந்தியைப் பற்றி பெருமையாக பேசுறாங்களே...ன்னு மெல்லக் கேட்டு அவர்களிடம் பிட்டைப் போட்டு மேட்டரைக் கறந்து பதிவாக்கிவிடுவார். கொஞ்ச காலமாக இணைய இணைப்பு கிடைக்கலையாம், இப்ப கிடைச்சிருக்காம், 'அண்ணே நம்ம பதிவில் இனிமேல் இடுகை மழைதான்ணே' என்றார்

அதிஷா : சென்னையில் எங்காவது ஷகிலா போஸ்டரும், வியர்வை வழிய வழிய ரிக்க்ஷா ஓட்டுபவர்களைப் பார்த்தால் சிறு கதையாகிவிடும்

பொடியன் / Sanjai : எதிர்பதிவு ஏகாம்பரம் என்று பெயர் எடுக்கும் அளவுக்கு, சூடனா இடுகையில் ஒரு பதிவைப் பார்த்துவிட்டால் இவருக்கு கை பரபரப்பாகிவிடும் அப்பறம் என்ன உடனே நகைச்சுவையுடன் (கவரிங் என்றாலும் அதுவும் நகைதானே) எதிர்பதிவுதான்

ஆர்.கே.சதீஷ்குமார் : யாரும் தினமலர் பக்கம் போகமல் தடுக்கும் வேலையை இவர் தான் செய்துவருகிறார். வைரம் ராஜகோபால் எழுதும் ஆன்மிகம் முதல் அனுராதா ரமணின் அந்தரங்க ஆலோசனை வரையில் அப்படியே எடுத்துப் போடும் சமூக சேவையைச் செய்துவருகிறார். கொஞ்ச நாளில் சொந்தமாகவும் நிறைய எழுதுவார் என்று எதிர்பார்க்கிறேன்

குமரன் : யாராவது நண்பர் இவருக்கு தொலைபேசி இருந்தாலோ, சாட் செய்து இருந்தாலோ அந்த நண்பர் பெயர் எதாவது சாமியின் பெயராக இருந்தால், அந்த சாமியைப் பற்றி சுலோகங்கள் உடனே மனதில் வந்திவிடும், அந்த பாட்டையும் அதற்கான பொருளையும் உடனே பதிவில் எழுதிவிடுவர். பெண் நண்பர்களும் நிறைய இருப்பார்கள் போல.

ரத்னேஷ் : செய்தித்தாள்களையும், தொலைக்காட்சி செய்தியையும் இரண்டு நாள் படிக்கவில்லை, பார்க்கவில்லை என்றால் அடுத்த இரண்டு நாளுக்கு நாள் ஒன்று ஒரே ஒரு பதிவைத் தான் எழுதுவார்.

கேஆர்எஸ் : காலையில் எழுந்து காலெண்டரைப் பார்ப்பார், இன்னிக்கு 'கார்த்திகை' உடனே முருகன் பதிவு, அடுத்த அடுத்த நாள், 'ராம நவமி' சிறப்பு பதிவு. இசையமைப்பாளர் பற்றிய நல்ல, துக்க செய்தியைப் படித்துவிட்டால் இசை இன்பத்தில் பதிவுகள் வந்துவிடும்

கோவியார் : நேற்றுப் படித்த செய்தியை, கட்டுரையை, விவாதத்தை மனதில் போட்டு வைத்திருப்பார், அன்றே எழுதினால் இரவல் சிந்தனை போல் தெரிந்துவிடும், புதிய சிந்தனைப் போல் அந்த செய்தியைப் பற்றி உயர்வாக அல்லது எதிராக தன்னுடய மனநிலையின் ஏற்புக்கு ஏற்றவாறு எழுதுவார்

வாத்தியார் : நண்பர் யாரும் மின் அஞ்சலை அனுப்பி இருந்தால் அன்று கண்டிப்பாக ஒரு பதிவு வரும், மற்ற நாட்களில் பரண் மீது இருக்கும் பழைய புத்தகங்களில் ஒன்றை நாள் தோறும் எலித் தொல்லையால், எலி தட்டிவிட, அதை எடுத்து வைக்கும் நேரத்தில் அதில் உள்ளவற்றைப் படித்து பதிவு போட்டுவிடுவார். முக்கால் வாசி கவியரசர் கண்ணதாசன் புத்தகங்களையே எலி கீழே தள்ளிக் கொண்டு இருக்கிறது, ஒரு முறை பெரிய ஜோதிட புத்தகத்தை கீழே தள்ளிவிட்டதாம், அதன் எடை காரணமாக அதை இன்னும் மேலே தூக்கி வைக்காமல் இருக்கிறார்

இன்னும் பல பதிவர்களை எழுதிக் கொண்டே செல்லலாம்...இடுகை தாங்காது

*******

நாள் தோறும் எழுதும் பதிவர்கள் அனைவருக்குமே, பதிவுக்கான உள்ளிடு பொருள் சுற்றி நடப்பவைகள் தான் மற்றும் அதன் தொடர்பில் பழசை அசைபோடுவது. அதை சரியாக கவனித்து, எண்ணத்தில் கொண்டுவந்து, எழுத்தில் ஏற்றினால் பதிவு ஆயத்தம்

பின்குறிப்பு : இங்கே சொல்லப்பட்டுள்ள பதிவர்களிடம் 'இதில் தவறும் இருக்கலாம், தயவு செய்து தப்பாக நினைக்காதீர்கள்' என்று சொல்லி அவர்களின் புரிந்துணர்வை கொச்சைப் படுத்த விருப்பவில்லை :)))