போலியும் நானும் !

'நான் தான் கோவி.கண்ணன் பேசுறேன்' என் பெயரில் போலியாக அறிமுகப்படுத்திக் கொண்டு பலரை நம்ப வைத்து ஏமாற்றுபவர் அவர்.

அவர் சென்னை பதிவர் சந்திப்புக்கு வருவார் என்று எதிர்பார்த்தேன். 'நாமக்கல்லில் முட்டை வியாபராம் பெருகுவதற்காக ... நான் சென்று சேவல் விற்கப்போகிறேன்' என்று சொல்லிவிட்டு பதிவர் சந்திப்புக்கு வராமல் ஏமாற்றிவிட்டார்.

சென்ற வெள்ளி (30/மே/2008) சென்னையில் தான் இருக்கிறாரா என்று உறுதிபடுத்திக் கொள்ள தொலைபேச, 'இருக்கேன்...நிறைய ஆணி இருக்கு...முடிஞ்சா சாயங்காலம் 6 மணிக்கு மேல் பார்ப்போம்' தனது ஜனாதிபதி வேலையின் பளுவில் அலுத்துக் கொண்டாலும், மறுநாள் அவரே கூப்பிட்டார்... 'சாயங்காலம் 6 மணிக்கு திருமங்கலத்திற்கு வந்துடுங்க பார்ப்போம். அங்குதான் எனக்கு ஆப்பும், ஆணி அடிக்கிறாங்க' என்றார். சரியாக ஆறுமணிக்கு மணிக்கு அண்ணா நகர், புளூஸ்டார் அருகில் 'ஹை ஸ்டெயில்' கடைக்குள் நான் என் நண்பருடன் நின்று கொண்டிருந்த போது அழைத்தார்.

'வாய்யா...இங்கே தான் ஹைஸ்டெயிலில் இருக்கிறேன்' என்று இடம் சுட்டினேன்.

வந்தார்.

"நான் தான் கோவி.கண்ணன்" என்று தன்னை அறிமுகப்படுத்திக் கொண்டார்'

"பித்தானந்த பகவானே .... அது தெரியும் சுவாமி" என்றேன்

வெளியில் வந்து...

"இன்னிக்கு புகையிலை ஒழிப்பு தினம் நாமும் முடிந்தவரை புகையிலை ஒழிக்கலாம் " என்று அவர் சொல்ல...

"நல்ல வேலை நினைவு படுத்தினீர்கள்...செஞ்சிட்டா போவுது..." புகையிலை அழியும் வரை அங்கேயே நின்று கொண்டிருந்தோம்.

"கோவி, இது என்ன சார்ட்ஸ் போட்டு ஊரெல்லாம் சுத்திவர்றீங்க..."

"என்னை மாதிரி ஏழைகளுக்கு முக்கால் Pant தைத்துக் கொள்ளத்தான் துணி எடுக்க பணம் இருக்கு..."

"அதுசரி... சரியாத்தான் சொல்றிங்க"

"நமீதா, நயந்தாரா என்னைவிட ஏழைங்க...பரம ஏழைங்க ... என்ன தான் பெரிய பட்ஜெட்டில் நடித்தாலும் அவர்களுக்கு துணி எடுக்கும் போது தயாரிப்பாளர்களுக்கு விழும் சிறிய துண்டைத் தான் அவர்களுக்கு உடையாக்க வேண்டி இருக்கிறது"

"காலை காட்டுங்க....." என்றார்

"பித்தானந்த சாமி தரிசனம் கொடுதுட்டிங்க... சாமிக்கு காணிக்கை ?"

"சாமி காணிக்கை என காசை கையால் தொடுவது இல்லை. பக்தர்கள் விரும்பினால்... ஒரு கிளாஸ் தீர்த்தமே போதும்"

அதன் பிறகு அவரை தள்ளிக் கொண்டு தற்காலிக பேச்சிலராக இருக்கும் நண்பர் இல்லத்திற்கு சென்று கிரிக்கெட் பார்த்துக் கொண்டே....

வெறும் ஸ்னாக்ஸ் தான் சாப்பிட்டோம். (நம்பாதவங்களை யாரும் நம்ப வேண்டாம்)

சுவாமி அவரது இல்லத்திற்கு அழைத்தார்...நேரமின்மை காரணமாக செல்ல முடியவில்லை.

சுவாமியை நான் சந்திப்பது 2 ஆவது தடவை. இந்த முறை சாதாரண சாமியாக இருந்தவர் சற்று சுற்று பெறுத்து பிள்ளையார் சாமியாக ஆகி இருக்கிறார்.

என் பெயரில் போலியாக அறிமுகப்படுத்திக் கொள்ளும் அந்த போலிச்சாமி யார் தெரியுமா ? தெரியாதவங்க தெரிஞ்சவங்களிடம் கேட்டுக் கொள்ளுங்க !