என் இனம் உயர்ந்தது ?

வெளிநாடு வாழ்மக்களுக்கு இன உணர்வு உண்டு, எப்பொழுதும் தங்கள் இனத்தைச் சேர்ந்தவர்களைப் பற்றி எப்பொழுதும் உயர்வான எண்ணம் உண்டு. அது தவறும் அல்ல. இனங்களைத் தாண்டி எல்லோரும் ஓர் இனம் என்ற உணர்வும் இருக்க வேண்டும் என்று நம் தமிழர்களே 'ஒன்றே குலமும் ஒருவனே தேவனும் என்று வழியுறுத்துகிறார்கள். அதைப் பற்றிய சிந்தனையாக எழுத நினைத்து எழுதியது இது.

இனம் என்பதற்கு பதில் சாதிக்கும் இது நன்றாக பொருந்தும்.

இனம் கண்டேன் !

அன்றாடச் செய்தித் தாள்களில்,
அனைவரின் கவனமாக, குற்றச்செயல் செய்திகள் !
அச்செய்திகள் காட்டும் பெயர்கள்,
அவைக்கு வந்த அவப்பெயர்கள் மட்டின்றி,
அவைகள் இனாமாக 'இனம்' காட்டும் முகப்பருக்கள்.

ஏனையதில் உயர்வாக நான் கருதும்,
என் இனத்தின் பெயர், செய்தியின் சேதி,
எல்லாம் தனிமனித ஒழுங்கீனம் என்ற ஆறுதல் !
ஏனைய மாற்று இனப் பெயர், அவை
எல்லாம் இன ஒழுங்கீனமென்ற இழித்தல் !

என் இனத்தோரால் நான் காயப்பட்டபோது
எனக்குள் வந்த மின்னல் வெளிச்சத்தில்,
என்னை, நானே இனம் கண்ட பொழுது,
எனக்குள் பேரிடி உணர்ந்து, முதன்முதலில்
என்னை, நான் பார்த்து உரக்கக் கேட்டேன்,

களவு, சூது, வஞ்சகம், பொய் மற்றும் விபசாரமென
ஊறு, கேடுசெய்யும் பஞ்சமா பாதகர்கள்,
உன் இனத்தில் ஒருவரும் இல்லையா ? இருந்தால்,
நீ பெருமைப்பட்டுக் கொள்ளலாம்,
உன் இனம் உயர்ந்ததென. அதுவரை என்றுமே
உலக மக்கள் யாவரும் ஒர் இனம் !

- கோவி.கண்ணன்